އެމެރިކާ އާއި އީރާންގެ މަޝްވަރާގެ ދެ ވަނަ ބައްދަލުވުން ވަރަށް އަވަހަށް އޮންނާނެ: ޓްރަމްޕް

އެމެރިކާ އާއި އީރާންއާ ދެމެދު ސުލްޙަ ޤާއިމު ކުރުމަށް ކުރިއަށް ގެންދާ މަޝްވަރާ ތަކުގެ ދެ ވަނަ ބައްދަލުވުން، ވަރަށް އަވަހަށް އޮންނާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ޓްރަމްޕް މިހެން ވިދާޅުވެފައި ވަނީ، އެމެރިކާ އާއި އީރާންއާ ދެމެދު ސުލްޙަ ޤާއިމު ކުރުމަށް މިދިޔަ ހަފުތާ ބަންދުގައި ޕާކިސްތާންގައި ކުރިއަށް ގެންދިޔަ މަޝްވަރާތަައް ނާކާމިޔާބު ވެފައިވާ ވަގުތެއްގަ އެވެ. ނަމަވެސް ޕާކިސްތާން އިން ވެސް ވަނީ، މަޝްވަރާގެ ދެ ވަނަ ބައްދަލުވުމެއް އިންތިޒާމު ކުރުމަށް އެ ޤައުމުން ތައްޔާރަށް އޮތް ކަމަށް ހާމަ ކޮށްފަ އެވެ.

އަންގާރަ ދުވަހު ނިއުޔޯކް ޕޯސްޓަށް ދެއްވި އިންޓަވިޔުއެއްގައި ޓްރަމްޕް ވިދާޅުވީ، ކުރިއަށް އޮތް ދެ ދުވަހެއްގެ ތެރޭގައި ކަންތައްތަކެއް ހިނގުމުގެ ފުރުސަތު އޮތުމުން މަޝްވަރާ ތަކަށް އެނބުރި ދިޔުމުގެ ޝައުޤުވެރިކަން އެބަހުރި ކަމަށެވެ. ސަރަހައްދީ މަސްދަރު ތަކަށާއި، ޕާކިސްތާން އާއި އީރާންގެ އޮފިޝަލުން ވެސް ވަނީ ދެ ޤައުމުގެ މަންދޫބުން މި ހަފުތާގެ ފަހުކޮޅު އަލުން ޕާކިސްތާނަށް ވަޑައިގެންފާނެ ކަމަށް ބުނެފަ އެވެ. ނަމަވެސް، އީރާންގެ އިސް މަސްދަރަކުން ބުނެފައި ވަނީ މަޝްވަރާތައް ފެށޭނެ ވަކި ތާރީޚެއް މިހާތަނަށް ކަނޑައެޅިފައި ނުވާ ކަމަށެވެ.

އެމެރިކާ އިން އީރާންގެ ބަނދަރުތައް ބްލޮކް ކުރުމާ ގުޅިގެން އީރާން އިން ހަރުކަށި އިންޒާރު ތަކެއް ދެމުން ގެންދިޔަ ނަމަވެސް، ޑިޕްލޮމެޓިކް މަޝްވަރާތައް ކުރިއަށް ދާނެ ކަމުގެ ނިޝާންތަކާ އެކު ތެލުގެ ބާޒާރަށް ވަނީ ކޮންމެ ވެސް ވަރެއްގެ ބަދަލު ތަކެއް އައިސްފަ އެވެ. މިގޮތުން އަންގާރަ ދުވަހު ސާފު ނުކުރާ ތެލުގެ އަގު ވަނީ ފީފާއެއް 100 އެެމެރިކާ ޑޮލަރަށް ވުރެ ދަށަށް ގޮސްފަ އެވެ. 

1979 ވަނަ އަހަރުގެ އިސްލާމީ އިންޤިލާބަށް ފަހު ދެ ޤައުމުގެ ދެ މެދުގައި ބޭއްވުނު އެންމެ މަތީ ފަންތީގެ މަޝްވަރާތައް ޕާކިސްތާންގައި ނިމިގެން ދިޔައީ އެންމެ އެދެވޭ ނަތީޖާއެއް ނުނިކުމެ އެވެ. މީގެ ސަބަބުން މިހާރު އޮތް ދެ ހަފުތާގެ މުއްދަތުގެ ހަނގުރާމަ ހުއްޓާލުމުގެ އެއްބަސްވުން ދެމި އޮންނާނެތޯ ވަނީ ސުވާލު އުފެދިފަ އެވެ. އެ އެއްބަސްވުމުގެ މުއްދަތު ހަމަވާން ބާކީ އޮތީ ހަފުތާ އެކެވެ.