އީރާން އިން މަޝްވަރާ ތަކުގައި ބައިވެރި ނުވިޔަސް، އަހަރުންނަށް ހެޔޮ: ޓްރަމްޕް

އީރާން އިން އަލުން ސުލްޙައިގެ މަޝްވަރާ ތަކުގައި ބައިވެރި ވުމަކީ އެމެރިކާ އަށް މާ މުހިންމު ކަމެއް ނޫން ކަމަށާއި، އެމެރިކާގެ އަމާޒަކީ އީރާން އަށް ނިއުކްލިއާ ހަތިޔާރު ހޯދުމުގެ ފުރުސަަތު ނުދިނުން ކަމަށް އެމެެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

އެމެރިކާގެ ރިޔާސީ ގަނޑުވަރު ވައިޓް ހައުސްގައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، އީރާން އިން މަޝްވަރާގެ މޭޒަށް އަލުން އަނބުރާ އައުމާއި، ނައުމާމެދު އޭނާގެ އެއްވެސް ފަރުވާލެއް ނެތް ކަމަށެވެ. އީރާން އިން މަޝްވަރާ ކުރަން ބޭނުން ވިޔަސް، އަދި ނުވިޔަސް، އެމެރިކާގެ ސިޔާސަތަށް އެއްވެސް ބަދަލެއް ނާންނާނެ ކަމަށާއި، އީރާން އަށް ދުވަހަކު ވެސް ނިއުކްލިއާ ހަތިޔާރު އުފެއްދުމުގެ ފުރުސަތު ނުދޭނެ ކަމަށް ޓްރަމްޕް ވިދާޅުވި އެވެ. 

މީގެ އިތުރުން އީރާންއާ މެދު ގެންގުޅޭ ހަރުކަށި ސިޔާސަތު ތަކުގެ ސަބަބުން އެ ޤައުމުގު އިޤްތިޞާދަށް ބޮޑެތި ލޮޅުން ތަކެއް އަރަމުންދާ ކަމަށް އީރާން އިން ވަނީ ބުނެފަ އެވެ. ޓްރަމްޕްގެ ވާހަކަފުޅު ތަކާ އެކު މެދު އިރުމަތީގެ މަސްރަހު އިތުރަށް ނު ތަނަވަސްވެފައިވާ އިރު، ބައިނަލްއަޤުވާމީ މުޖުތަމައުން ދަނީ ޙާލަތު ވަރަށް ގާތުން ބަލަމުންނެވެ. 

އެމެރިކާ އިން އީރާންއާ މެދު މިފަދަ ހަރުކަށި ފިޔަވަޅު ތަކެއް އަޅަން ނިންމާފައި ވަނީ، އީރާންގެ ނިއުކްލިއާ ޕްރޮގްރާމް އާއި، ބެލިސްޓިކް މިސައިލް އުފެއްދުމުގެ މަސައްކަތް ހުއްޓުމަށް ބާރު އެޅުމުގެ ގޮތުންނެވެ. ނަމަވެސް، އީރާން އިން އަދިވެސް ބުނަމުން ދަނީ އެ ޤައުމުގެ ނިއުކްލިއާ މަސައްކަތް ތަކަކީ ސުލްޙަވެރި ބޭނުން ތަކަށް ކުރާ މަސައްކަތް ތަކެއް ކަމަށެވެ. 

އީރާންގެ މަޝްވަރާ ތަކާ ގުޅޭ ގޮތުން ޓްރަމްޕް މިހެން ވިދާޅުވެފައިވާއިރު، ޕާކިސްތާންގެ ވެރި ރަށް އިސްލާމްއާބާދުގައި ކުރިއަށް ގެންދިޔަ މަޝްވަރާތައް ނިމުނީ އެއްބަސްވުމަކަށް ނާދެވި އެވެ. އެމެރިކާ އިން ބުނެފައި ވަނީ، މަޝްވަރާ ތަކުގައި އެމެރިކާ އިން ހުށަހެޅި ޝަރުތުތައް އީރާން އިން ޤަބޫލު ކޮށްފައި ނުވާ ކަމަށެވެ.