އެއްބަސްވުމަކާ "އިންޗިއެއްހާ" ކައިރި އަށް ދެވުނު: އީރާންގެ ފޮރިން މިނިސްޓަރު

އެމެރިކާ އާއި އީރާންއާ ދެމެދު އެއްބަސްވުމެއް ޤާއިމު ކުރުމަށް ޕާކިސްތާންގައި ކުރިއަށް ގެންދިޔަ މަޝްވަރާ ތަކުގައި، އެއްބަސްވުމެއް ޤާއިމު ކުރުމާއި އިންޗިއެއް ހާ ކައިރި އަށް ދެވުނު ކަމަށް އީރާންގެ ފޮރިން މިނިސްޓަރު އައްބާސް އަރާގްޗީ ވިދާޅުވެއްޖެ އެވެ. 

ސޯޝަލް މީޑިއާގައި ކުރެއްވި ޕޯސްޓެއްގައި އަރާގްޗީ ވިދާޅުވީ، ފާއިތުވި 60 އަހަރުގެ އެންމެ މަތީ ފެންވަރުގައި ބޭއްވި ވަރުގަދަ މަޝްވަރާ ތަކުގައި އީރާން އިން ބައިވެރި ވެފައި ވަނީ ހަނގުރާމަ ނިންމުމުގެ ހަގީގީ ނިޔަތުގައި ކަމަށެވެ. 

ޕާކިސްތާންގެ ވެރި ރަށް އިސްލާމްއާބާދުގައި ކުރިއަށް ދިޔަ މަޝްވަރާތައް ފުރިހަމަ މިންވަރެއްގައި އެއްބަސްވުމަކާ ކައިވެރިވެފައި ވަނިކޮށް، ހަނގުރާމައިގެ ވިސްނުމާއި، އަމާޒުތައް ބަދަލު ވެގެންދާ ފަދަ ހުރަސް ތަކެއް އެމެރިކާ އިން ކުރިމަތި ކުރުވި ކަމަށް އަރާގްޗީ ވިދާޅުވި އެވެ. 

އެއާ އެކު އަރާގްޗީ ވިދާޅުވީ، އެ ތަޖުރިބާ އިން އެއްވެސް ފިލާވަޅެއް ލިބިފައި ނުވާ ކަމަށެވެ. އެންމެ ފަހުން އެމެރިކާ އާއި އީރާންއާ ދެމެދު ކުރިއަށް ގެންދިޔަ މަޝްވަރާތައް ނާކާމިޔާބު ވެފައިވާއިރު، މިހާތަނަށް ވަނީ ހަނގުރާމަ މެދު ކަނޑާލުމަށް އެއްބަސްވެފަ އެވެ. ދެ ހަފުތާ އަށް ހަނގުރާމަ މެދު ކަނޑާލަން އެއްބަސްވެފައިވާއިރު، މި މުއްދަތުގެ ތެރޭގައި ދާއިމީ ގޮތެއްގައި ހަނގުރާމަ ހުއްޓާލުމުގެ އެއްބަސްވުމެއް ޤާއިމު ކުރަން ޖެހެ އެވެ. 

ފުރަތަމަ ބުރުގެ މަޝްވަރާ ބައްދަލުވުން ނާކާމިޔާބު ވެފައިވާއިރު، ދެ ވަނަ ބުރުގެ ބައްދަލުވުމެއް ބާއްވަން ޕާކިސްތާން އިން ހުށަހަޅާފައިވާ ކަމަށް މީޑިއާ ތަކުގައި މިހާރު ވަނީ ބުނެފަ އެވެ.