ރާއްޖެއަށް ބޭނުންވާ ޒަރޫރީ މުދާ އެކްސްޕޯޓް ކުރުމުގެ ކޯޓާ އިންޑިއާއިން ރެކޯޑް މިންވަރަކަށް އިތުރުކޮށްފި
ރާއްޖެއަށް ބޭނުންވާ ޒަރޫރީ މުދަލުގެ ބާވަތްތައް އެކްސްޕޯޓް ކުރުމަށް އިންޑިއާއިން ކަނޑައަޅާފައިވާ ކޯޓާ، 1981 ވަނަ އަހަރުގެ ފަހުން އެންމެ މަތީ މިންވަރަކަށް މިފަހަރު ވަނީ އިތުރުކޮށްފައި. މި ނިންމުމުގެ ދަށުން ކުކުޅުބިހާއި، ފިޔާ އަދި ހަނޑޫ ފަދަ ބާވަތްތަކުގެ ކޯޓާ ފަސް އިންސައްތަ އިތުރުކޮށްފައިވާއިރު، މިއީ ރާއްޖޭގެ ތަރައްގީއަށް އެހީތެރިވުމަށް އިންޑިއާއިން ގެންގުޅޭ "ނެއިބަހުޑް ފަސްޓް" ސިޔާސަތުގެ ދަށުން ނިންމި ނިންމުމެއް ކަމަށް އިންޑިއާ އިން ބުނޭ. ރާއްޖެއާއި ޗައިނާގެ ގުޅުން ބަދަހިވަމުންދާ ދަނޑިވަޅެއްގައި އިންޑިއާއިން މިފަދަ ލުއިތަކެއް ދީފައިވަނީ، ދިވެހި ރައްޔިތުންނަށް ފޯރުކޮށްދޭ އެހީތެރިކަމަށް ބަދަލެއް ނާންނާނެކަން ހާމަކުރުމުގެ ގޮތުން.
އިންޑިއާގެ ނިއުދިއްލީގައި ހުންނަ ރާޝްތުރަޕަތީ ބަވަންގައި 2024 އޮކްޓޫބަރު 7 ވަނަ ދުވަހު ބޭއްވި ރަސްމީ މަރުހަބާ ދެންނެވުމުގެ ރަސްމިއްޔާތުގެ ތެރެއިން، ދިވެހިރާއްޖޭގެ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ގާޑް އޮފް އޮނަރ އެއް އިންސްޕެކްޓް ކޮށްދެއްވަނީ. | ގެޓީ އިމޭޖަސް
ދިވެހި ސަރުކާރުގެ އެދުމުގެ މަތިން، 2024 އިން 2025 އަށް ބޭނުންވާ ޒަރޫރީ މުދަލުގެ ބައެއް ބާވަތްތައް ރާއްޖެއަށް އެކްސްޕޯޓް ކުރުމުގެ ހުއްދަ އިންޑިއާ ސަރުކާރުން ދީފިއެވެ.
މާލޭގައި ހުންނަ އިންޑިއާގެ ހައިކޮމިޝަނުން ހުކުރު ދުވަހު ނެރުނު ބަޔާނެއްގައި ބުނެފައިވަނީ، މި ނިންމުމަކީ ދެ ގައުމުގެ ދެމެދުގައި އެއްބަސްވެފައި އޮންނަ ހާއްސަ އުސޫލެއްގެ ދަށުން ނިންމި ނިންމުމެއް ކަމަށާއި، މި އުސޫލުގެ ދަށުން ރާއްޖެއަށް މުދާ އެތެރެކުރުމަށް ކަނޑައަޅާފައިވާ ކޯޓާ މިހާރު އިތުރުކޮށްފައިވާ ކަމަށެވެ.
އިންޑިއާ ހައިކޮމިޝަނުން ނެރުނު ނޯޓިސްގައި ބުނެފައިވާ ގޮތުގައި، މިފަހަރު ހުއްދަ ދީފައިވާ މުދަލުގެ މިންވަރަކީ 1981 ވަނަ އަހަރު މި އުސޫލަށް އަމަލުކުރަން ފެށި ފަހުން ކަނޑައެޅުނު އެންމެ މަތީ މިންވަރެވެ. އިންޑިއާ އާއި ރާއްޖެއާ ދެމެދު 1981 ވަނަ އަހަރު ވެފައިވާ ވިޔަފާރީގެ އެއްބަސްވުމުގެ ދަށުން ޒަރޫރީ މުދަލުގެ ބާވަތްތައް އެކްސްޕޯޓް ކުރުމުގެ މަގު ފަހިކޮށްދެއެވެ. ހައިކޮމިޝަނުގެ ތަފާސްހިސާބުތަކުން ދައްކާ ގޮތުގައި، ދެ ގައުމުގެ ދެމެދުގައި ކުރެވޭ ވިޔަފާރީގެ އަދަދު 2021 ވަނަ އަހަރު ފުރަތަމަ ފަހަރަށް 300 މިލިއަން ޑޮލަރަށް އަރާފައިވާއިރު، 2022 ވަނަ އަހަރު މި އަދަދު ވަނީ 500 މިލިއަން ޑޮލަރަށް ވުރެ މައްޗަށް ގޮސްފައެވެ.
އިންޑިއާއަކީ 2022 ވަނަ އަހަރު ރާއްޖޭގެ ދެވަނައަށް އެންމެ ބޮޑު ވިޔަފާރި ބައިވެރިޔާއެވެ. އަދި 2023 ވަނަ އަހަރު ރާއްޖޭގެ އެންމެ ބޮޑު ވިޔަފާރި ބައިވެރިޔާގެ މަގާމު ހޯދީވެސް އިންޑިއާއެވެ. ހުކުރު ދުވަހުގެ އިއުލާނުގައިވާ ގޮތުން ކުކުޅުބިސް، އަލުވި، ފިޔާ، ހަކުރު، ހަނޑޫ، ފުށް އަދި މުގުގެ ބާވަތްތަކަށް ކަނޑައަޅާފައިވާ ކޯޓާ ވަނީ 5 އިންސައްތަ އިތުރުކޮށްފައެވެ. މީގެ އިތުރުން، އިންޑިއާއިން ބައެއް ބާވަތްތައް ބޭރު ގައުމުތަކަށް އެކްސްޕޯޓް ކުރުން މުޅި ދުނިޔެއަށް މަނާކޮށްފައި އޮތް ނަމަވެސް، މިދިޔަ އަހަރުވެސް އެ ގައުމުން ވަނީ ރާއްޖެއަށް ހަނޑޫ، ހަކުރު އަދި ފިޔާ އެކްސްޕޯޓް ކުރުން މެދުނުކެނޑި ކުރިއަށް ގެންގޮސްފައެވެ.
އިންޑިއާ ހައިކޮމިޝަނުން ބުނި ގޮތުގައި، އެ ގައުމުގެ "ނެއިބަހުޑް ފަސްޓް" ނުވަތަ އަވަށްޓެރި ގައުމުތަކަށް އިސްކަންދިނުމުގެ ސިޔާސަތުގެ ދަށުން، ރާއްޖޭގެ އިންސާނީ ތަރައްގީއަށް އެހީތެރިވުމުގައި އިންޑިއާ ދެމިއޮންނާނެއެވެ. އިންޑިއާއިން މި ނިންމުން ނިންމާފައި މިވަނީ، އިންޑިއާ އައުޓް ނަމުގައި އިންޑިއާ އާ މެދު ދިވެހިންގެ މެދުގައި ނަފްރަތު އުފެއްދުމަށް ހިންގި ކެމްޕޭނުގައި އިސްދައުރެއް އަދާ ކުރެއްވި މިހާރުގެ ރައީސް ޑރ. މުހައްމަދު މުއިއްޒުގެ ސަރުކާރުން ޗައިނާއާއެކު އޮންނަ އިގްތިސާދީ އަދި ސްޓްރެޓެޖިކް ގުޅުންތައް އިތުރަށް ވަރުގަދަ ކުރަމުންދާ ދަނޑިވަޅެއްގައެވެ. މި އަހަރުގެ ކުރީކޮޅު ރާއްޖެ އާއި ޗައިނާއާ ދެމެދު މިނިވަން ވިޔަފާރީގެ އެއްބަސްވުމެއް (އެފްޓީއޭ) ތަންފީޒު ކުރަން ފެށުމާ ގުޅިގެން، ރާއްޖެއިން ޗައިނާއާ ގާތް ގުޅުމެއް ބޭއްވުމާ މެދު ނިއު ދިއްލީން ވަނީ ކަންބޮޑުވުން ފާޅުކޮށްފައެވެ.
ބުރާސްފަތި ދުވަހު ބޭއްވި ހަފުތާގެ ނޫސްވެރިންގެ ބައްދަލުވުމުގައި، އިންޑިއާގެ އެކްސްޓާނަލް އެފެއާޒް މިނިސްޓްރީގެ ތަރުޖަމާނު ރަންދީރު ޖައިސްވާލް ވިދާޅުވީ، ރާއްޖޭގެ މިނިވަން ނިންމުންތަކަށް އިންޑިއާއިން އިހުތިރާމް ކުރާ ކަމަށެވެ. ނަމަވެސް، ރާއްޖޭގެ ދަރަނި އިތުރުވެދާނެ ފަދަ އެއްބަސްވުންތަކާ މެދު އިންޑިއާގެ ކަންބޮޑުވުން އޮތްކަން އޭނާ ފާހަގަކުރެއްވިއެވެ. އެހެންނަމަވެސް، ޒަރޫރީ މުދަލުގެ ކޯޓާ އިތުރުކުރުމަށް ނިންމި ނިންމުމުން ހާމަވަނީ ދިވެހި ރައްޔިތުންނަށް އިންޑިއާއިން ދޭ އެހީތެރިކަމަށް ބަދަލެއް ނާންނަކަން ކަމަށް އޭނާ ވިދާޅުވިއެވެ. ރާއްޖެއިން މިހާރުވެސް ޗައިނާއަށް ބޮޑު ދަރަންޏެއް ދައްކަން ޖެހިފައިވާއިރު، ބައިނަލްއަގުވާމީ މާލީ އިދާރާތަކުން ދަނީ ރާއްޖޭގެ މާލީ ކަންކަން ހަރުދަނާކުރުމަށް އިލްތިމާސް ކުރަމުންނެވެ.
