އީރާނުގެ މަނަވަރަށް ދިން ހަމަލާގައި އެމެރިކާއަށް އެހީވިކަމަށް ދެކެވޭ ވާހަކަ އިންޑިއާއިން ދޮގުކޮށްފި
އިންޑިއާގައި ބޭއްވި އަސްކަރީ ތަމްރީނުތަކެއް ނިންމާލުމަށްފަހު އެނބުރި ދަތުރުކުރި އީރާނުގެ މަނަވަރަކަށް، ސްރީލަންކާ ކައިރިން އެމެރިކާގެ ސަބްމެރީނަކުން ދިން ޓޯޕީޑޯ ހަމަލާއެއްގައި އެ އުޅަނދު ފައްތާލައި 84 ފަޅުވެރިއަކު ވަނީ މަރުވެފައި. މި ހާދިސާއާ ގުޅިގެން އިންޑިއާ ސަރުކާރުން އެއްޗެއް ނުބުނުމުން އިދިކޮޅު ފަރާތްތަކުގެ ފާޑުކިޔުން އަމާޒުވެފައިވާއިރު، މިއީ ސަރަހައްދީ ހަމަޖެހުމަށާއި އިންޑިއާގެ މިނިވަންކަމަށް އޮތް ނުރައްކަލެއް ކަމަށް އެ ފަރާތްތަކުން ބުނޭ. ހަމަލާގެ ވަގުތުގައި އީރާނުގެ އެހެން މަނަވަރަކަށް ދިމާވި ފަންނީ މައްސަލައަކާ ގުޅިގެން، އިންޑިއާއިން ވަނީ އެ އުޅަނދުގެ ފަޅުވެރިންނަށް އިންސާނީ އެހީތެރިކަން ފޯރުކޮށްދީފައި.
އީރާނުގެ ޑިފެންސް މިނިސްޓްރީން 12 މާރިޗު 2024 ގައި އާންމުކޮށްފައިވާ މި ފޮޓޯއިން ފެންނަނީ، އޮމާން ކަނޑުގެ ސަރަހައްދުގައި ދަތުރުކުރަމުންދާ އިސްލާމިކް ރިޕަބްލިކް އޮފް އީރާން ނޭވީގެ މަނަވަރު "އައި.އާރް.އައި.އެސް ދެނާ (75)". | އޭއެފްޕީ
ސްރީލަންކާގެ ކަނޑުގެ ސަރަހައްދު ކައިރިން އީރާނުގެ އުޅަނދަކަށް ހަމަލާދިނުމުގައި އެމެރިކާއަށް އިންޑިއާއިން އެހީތެރިވި ކަމަށް ދެކެވޭ ވާހަކަތައް އިންޑިއާ ސަރުކާރުން ދޮގުކޮށްފިއެވެ. މިދިޔަ ހުކުރު ދުވަހު (6 މާރިޗު 2026) އިންޑިއާގެ ކަނޑުގެ ސިފައިންގެ އިސް އޮފިޝަލަކު ވިދާޅުވީ، އެ ރިޕޯޓްތަކަކީ އެއްވެސް އަސާސެއް ނެތް ވާހަކަތަކެއް ކަމަށެވެ. އީރާނުގެ މަނަވަރަށް ދިން ހަމަލާއާ ގުޅިގެން އެމެރިކާގެ ކަމާބެހޭ އިދާރާތަކަށް ނުވަތަ އެމެރިކާގެ އަސްކަރިއްޔާއަށް އިންޑިއާއިން އެއްވެސް އެހީތެރިކަމެއް ފޯރުކޮށްދީފައި ނުވާނެ ކަމަށް އެ އޮފިޝަލް ވިދާޅުވިއެވެ. އަދި އިންޑިއާ އާއި އެމެރިކާއާ ދެމެދު އޮންނަ މުއާސަލާތީ އަދި ލޮޖިސްޓިކްސް އެއްބަސްވުންތަކުގެ ދަށުން، މިފަދަ ހާލަތްތަކުގައި އަމަލުކުރުން ލާޒިމް ނުވާކަން އޭނާ ސާފުކޮށްދެއްވިއެވެ.
އިންޑިއާ އާއި އެމެރިކާއާ ދެމެދު އޮންނަ އެއްބަސްވުންތަކުގެ ދަށުން ކަނޑުގެ ސަރަހައްދުގެ ބައެއް މައުލޫމާތުތައް ހިއްސާކުރި ނަމަވެސް، އެމެރިކާގެ ދިފާއީ އޮޕަރޭޝަންތަކަށް އެހީތެރިވުމަކީ އިންޑިއާއަށް މަޖުބޫރު ކަމެއް ނޫން ކަމަށާއި، އެއީ އަސްކަރީ އިއްތިހާދެއް ނޫން ކަމަށް އޮފިޝަލުން ތަކުރާރުކޮށް ވިދާޅުވިއެވެ. މިދިޔަ މާރިޗު މަހުގެ 4 ވަނަ ދުވަހު، އީރާނުގެ "އައި.އާރް.އައި.އެސް ދޭނާ" މަނަވަރު ފައްތާލާފައިވަނީ އެމެރިކާގެ ކަނޑުގެ ސިފައިންގެ ސަބްމެރީނަކުން ދިން ޓޯޕީޑޯ ހަމަލާއެއްގައެވެ. މި މަނަވަރަކީ އިންޑިއާއިން ބޭއްވި 'މިލާން' ކަނޑުގެ އަސްކަރީ ތަމްރީނުތަކުގައި ބައިވެރިވުމަށްފަހު އެނބުރި ގައުމަށް ދަތުރުކުރި މަނަވަރެކެވެ. މި ހާދިސާ ހިނގާފައިވަނީ ސްރީލަންކާގެ ގޯލްގެ އައްސޭރިފަށުން ގާތްގަނޑަކަށް 40 ނޯޓިކަލް މޭލު ބޭރުން، ބައިނަލްއަގުވާމީ ކަނޑުގެ ސަރަހައްދުގައެވެ.
އެމެރިކާގެ ޑިފެންސް ޑިޕާޓްމަންޓުން އާންމުކުރި ވީޑިއޯތަކުން ފެންނަ ގޮތުގައި، މާރިޗު 4 ވަނަ ދުވަހު އީރާނުގެ މަނަވަރުގައި ބާރުގަދަ ގޮވުމެއް ގޮވާފައިވެއެވެ. "އައި.އާރް.އައި.އެސް ދޭނާ" އަކީ ފެބްރުއަރީ 19 އިން 25 އަށް ވިޝާކަޕަޓްނަމްގައި ބޭއްވި 13 ވަނަ 'މިލާން' ތަމްރީނުތަކުގައި އިންޑިއާގެ މެހެމާނެއްގެ ގޮތުގައި ބައިވެރިވި މަނަވަރެކެވެ. އެމެރިކާ އާއި އީރާނު ހިމެނޭހެން އެކި ގައުމުތަކުގެ 18 މަނަވަރު މި ތަމްރީނުތަކުގައި ބައިވެރިވިއެވެ.
މި ހަމަލާއާ ގުޅިގެން ސްރީލަންކާގެ ކަނޑުގެ ސިފައިން ހިންގި ސާޗް އެންޑް ރެސްކިއު އޮޕަރޭޝަންގައި، އީރާނުގެ 84 ފަޅުވެރިއެއްގެ ހަށިގަނޑު ވަނީ ފެނިފައެވެ. ހަމަ އެދުވަހު، ޓެކްނިކަލް މައްސަލައެއް ދިމާވި އީރާނުގެ އެހެން މަނަވަރެއް ކަމަށްވާ "އައި.އާރް.އައި.އެސް ލަވަން" އަށް އިންޑިއާގެ ކޮޗިން ބަނދަރަށް ވަނުމުގެ ހުއްދަ ވަނީ ދީފައެވެ. އެ މަނަވަރުގައި ތިބި 183 ފަޅުވެރިންނަށް މިހާރު އިންޑިއާގެ ކަނޑުގެ ސިފައިންގެ މަރުކަޒުތަކުގައި ވަނީ ހިޔާވަހިކަން ފޯރުކޮށްދީފައެވެ. އީރާނުގެ މަނަވަރު ފައްތާލި ހާދިސާއާ ގުޅިގެން އިންޑިއާ ސަރުކާރުން އެއްޗެއް ނުބުނެ އޮތުމާއެކު، އިދިކޮޅު ލީޑަރުންގެ ފާޑުކިޔުން ވަނީ އަމާޒުވެފައެވެ. ކޮންގްރެސް ޕާޓީގެ ލީޑަރުން އިންޒާރު ދެއްވާފައިވަނީ، މި ހަމަނުޖެހުން ސަރަހައްދުގެ "ގޯތިތެރެއަށް" ފެތުރިގެން ދިއުމަކީ އިންޑިއާގެ ހަކަތައިގެ ރައްކާތެރިކަމަށާއި ސްޓްރެޓެޖިކް މިނިވަންކަމަށް އޮތް ނުރައްކަލެއް ކަމަށެވެ.
