އިންޑިއާގެ ދެ ޒުވާނަކު 6.7 ކިލޯ ހަޝިޝް އޮއިލް އާއެކު ހައްޔަރުކޮށްފި
މި މައްސަލާގައި ހައްޔަރުކުރި 19 އަހަރާއި 21 އަހަރުގެ މި ދެ މީހުންގެ ބަންދަށް ކޯޓުން ހަ ދުވަހުގެ މުއްދަތެއް ދީފައިވާއިރު، ފުލުހުން ދަނީ މި މައްސަލަ އިތުރަށް ތަހުގީގު ކުރަމުން. މި ތަކެތި ފެނިފައި ވަނީ އެމީހުންގެ ލަގެޖުގައި ހުރި ފުޅިތަކެއް ބަލައި ފާސްކުރުމުގެ ތެރެއިން.
ހައްޔަރު ކުރި މީހުންގެ ލަގެޖު ބަލައި ފާސްކުރިއިރު، 6.7 ކިލޯގެ ހަޝިޝް އޮއިލް ހުރި ކަމަށް ޝައްކުކުރެވޭ ފުޅިތަކެއް ވަނީ ފެނިފަ. | ރާއްޖެއެމްވީ
ރާއްޖެއަށް ގިނަ އަދަދެއްގެ މަސްތުވާތަކެތި އެތެރެކުރަން އުޅުނު ކަމުގެ ތުހުމަތުގައި އިންޑިއާގެ ދެ ޒުވާނަކު ވެލާނާ އިންޓަރނޭޝަނަލް އެއާޕޯޓުން ހައްޔަރުކޮށްފި އެވެ.
މި ދެ މީހުންގެ ލަގެޖުން ފެނުނު ތަކެތީގެ ވަގުތީ ބަރުދަނުގައި ޖުމްލަ 6.7 ކިލޯގެ ހަޝިޝް އޮއިލް ހިމެނެ އެވެ.
މަސްތުވާތަކެތި އެތެރެކުރި ކަމުގެ ތުހުމަތުގައި ހައްޔަރުކުރީ އިންޑިއާގެ ދެ މީހުން ކަމަށްވާ ކަތިރިވިލް މަނިމަރަން، 21 އަދި ދަނޫޝްކާނދަން ގޯޕާލް، 19 އެވެ. މި ދެ މީހުން ހައްޔަރުކޮށްފައި ވަނީ އެއާޕޯޓުގެ ކަސްޓަމްސް އޮފިސަރުން އެމީހުންގެ ލަގެޖު ބަލައި ފާސްކުރުމަށް ފަހު އެވެ.
ފުލުހުން މައުލޫމާތު ދޭ ގޮތުގައި، މި ދެމީހުންގެ ލަގެޖު ބަލައި ފާސްކުރިއިރު، މަސްތުވާތަކެތި އަޅާފައި ހުރި ކަމަށް ޝައްކުކުރެވޭ ފުޅިތަކެއް ވަނީ ފެނިފަ އެވެ. އެ ފުޅިތަކުގައި ހުރި ތަކެތި ތަހުލީލު ކުރި އިރު، މަސްތުވާތަކެތީގެ ބާވަތެއް ކަމަށްވާ ހަޝިޝް އޮއިލް އަށް ވަނީ ޕޮޒިޓިވް ވެފަ އެވެ.
އެ ތަކެތި ތަހުލީލު ކުރުމަށް ފަހު، މަސްތުވާތަކެތި ކަމަށް ކަށަވަރުވުމާއެކު، މި ދެ މީހުން ވަނީ ހައްޔަރުކޮށްފަ އެވެ.
މި މައްސަލާގައި ހައްޔަރުކުރި ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، މިހާރު ވަނީ އެމީހުންގެ ބަންދަށް ހަ ދުވަހުގެ މުއްދަތެއް ދީފަ އެވެ. ފުލުހުން ބުނީ މަސްތުވާތަކެތި ރާއްޖެއަށް އެތެރެކުރަން އުޅުނު މި މައްސަލަ އެ އިދާރާ އިން ދަނީ އިތުރަށް ތަހުގީގު ކުރަމުން ކަމަށެވެ.
