އެމްޑީޕީގެ ޗެއާޕަރސަންގެ ނައިބު އިބުރޭ އާއި ލީގަލް ޑިރެކްޓަރ މައުރޫފްގެ މަޤާމް އިއާދަކޮށްފި
އެމްޑީޕީގެ ޑެޕިއުޓީ ޗެއަރޕަރސަން އިބްރާހިމް ވަހީދާއި ލީގަލް ޑިރެކްޓަރު އަހުމަދު މައުރޫފް މި މަހުގެ ކުރީކޮޅު މަގާމުން ވަކިކުރި ނިންމުން ބަދަލުކޮށް، އެ ދެ ބޭފުޅުންގެ މަގާމުތައް އަލުން އިއާދަކުރީ ޕާޓީގެ އެތެރޭގެ ޚިޔާލުތަފާތުވުންތަކަށް މަޝްވަރާކޮށްގެން ހައްލު ހޯދުމަށް ފަހު.
އެމްޑީޕީގެ ޑެޕިއުޓީ ޗެއަރޕަރސަން (އިދާރީ)ގެ މަގާމުގައި ހުންނެވި އިބްރާހިމް ވަހީދު އާއި އެމްޑީޕީގެ ލީގަލް ޑިރެކްޓަރުގެ މަގާމުގައި ހުންނެވި އަހުމަދު މައުރޫފް | އެމްޑީޕީ
މޯލްޑިވިއަން ޑިމޮކްރެޓިކް ޕާޓީގެ އިސް މަޤާމުތަކުން ވަކި ކުރި މީހުންގެ މަޤާމްތައް އިއާދަކޮށްފި އެވެ.
ރާއްޖެއެމްވީ އަށް އިތުބާރު ހުރި މަސްދަރަކުން މައުލޫމާތު ލިބިފައިވާ ގޮތުގައި އެމްޑީޕީގެ ޑެޕިއުޓީ ޗެއަރޕަރސަން (އިދާރީ)ގެ މަގާމުގައި ހުންނެވި އިބްރާހިމް ވަހީދު އާއި އެމްޑީޕީގެ ލީގަލް ޑިރެކްޓަރުގެ މަގާމުގައި ހުންނެވި އަހުމަދު މައުރޫފްގެ މަޤާމް އަލުން އިއާދަކޮށްފައި ވަނީ ހޮނިހިރު ދުވަހު އެވެ.
މި ހިނގާ އެޕްރިލް މަހުގެ 7 ވަނަ ދުވަހު މަގާމުން ވަކި ކުރިކަން ވަހީދަށް އަންގައި ޣަފޫރު ފޮނުއްވާފައިވާ ސިޓީގައި އޭނާ ވަކި ކުރި ސަބަބެއް ހާމަކޮށްފަ އެއް ނުވެ އެވެ. އޭރު އޭނާ ވަކި ކުރީ ދިވެހި ރައްޔިތުންގެ ޑިމޮކްރެޓިކް ޕާޓީގެ އަސާސީ ގަވާއިދުގެ 70 ވަނަ މާއްދާއާ ހަވާލާދީ އެވެ. މައުރޫފް ވެސް ވަކި ކުރީ 7 ވަނަ ދުވަހު އެވެ. އެކަން ހާމަކޮށް ޣަފޫރު ފޮނުވި ސިޓީގައި މައުރޫފް ވަކި ކުރި ސަބަބެއް ވެސް ބަޔާންކޮށްފަ އެއް ނެތެވެ.
އެ ދެ ބޭފުޅުންގެ މަޤާމުން ވަަކިކޮށްފައި ވާތީ، އެ ނިންމުމަކީ ޕާޓީގެ އަސާސީ ޤަވާއިދާއި ޚިލާފު ނިންމުމެއް ކަމަށް ފާހަގަކޮށް ޣަފޫރުގެ އިތުބާރު ނެތްކަމުގެ މައްސަލަ އެއް ހުށަހަޅާފައިވެ އެވެ. ނަމަވެސް ދިމާވި ޚިޔާލުތަފާތުވުންތަކަށް ހައްލު ގެނެސް، މިހާރު ޣަފޫރުގެ އިތުބާރު ނެތްކަމުގެ މައްސަލަ ވެސް ވަނީ އަނބުރާ ގެންގޮސްފަ އެވެ.
