2024 ވަނަ އަހަރު ފަށަން ބުނި ތ.ގާދިއްފުށި ބިން ހިއްކުމުގެ އަމަލީ މަސައްކަތް 2 އަހަރު ފަހުން ފަށައިފި
ތ. ގާދިއްފުށިން 11 ހެކްޓަރުގެ ބިން ހިއްކުމުގެ މަޝްރޫޢު އެމް.ޓީ.ސީ.ސީ އާ ހަވާލުކޮށްގެން ކުރިއަށްގެންދާއިރު، މި މަސައްކަތަށް ގާތްގަނޑަކަށް 110.5 މިލިއަން ރުފިޔާ ޚަރަދުވާނެ ކަމަށް ސަރުކާރުން ހާމަކުރެއެވެ. ނިމިދިޔަ ކައުންސިލް އިންތިޚާބުގައި ސަރުކާރު ހިންގާ ޕާޓީއަށް ނާކާމިޔާބީއާ ކުރިމަތިވުމާ ގުޅިގެން، ބިން ހިއްކުމަށް ގެންދިޔަ ސާމާނުތައް އަނބުރާ ގެންދަން އުޅޭ ކަމުގެ ޝަކުވާ ރަށުގެ ބައެއް ރައްޔިތުން ވަނީ ކޮށްފައެވެ. މި މަޝްރޫޢުގެ ދަށުން ބިން ހިއްކުމުގެ އިތުރުން ރިވެޓްމަންޓް ޖެހުމާއި ބްރޭކްވޯޓަރ ގާއިމުކުރުމުގެ މަސައްކަތް ވެސް ކުރިއަށްދާނެއެވެ.
ތ.ގާދިއްފުށި ހިއްކުމުގެ މަސައްކަތް ކުރިއަށްދާ ކަމަށް ސަރުކާރުން ބުނޭ | މުއިއްޒު
2024 ވަނަ އަހަރު ފަށަން ބުނި ގާދިއްފުށި ބިން ހިއްކުމުގެ އަމަލީ މަސައްކަތް 2 އަހަރު ފަހުން ފަށައިފި އެވެ.
އެކަން ހާމަކުރެއްވީ ރައީސް ޑރ.މުހައްމަދު މުއިއްޒު އެކްސްގައި ކުރެއްވި ޕޯސްޓެއްގަ އެވެ.
ގާދިއްފުށްޓަކައި ބިން އިތުރުކޮށްދީ ބިން ހިއްކުމުގެ މަސައްކަތް ކުރިއަށްގެންދާނެކަން ރައީސުލްޖުމްހޫރިއްޔާ ވިދާޅުވީ މިދިޔަ ސެޕްޓެމްބަރ މަހު އެރަށަށް ކުރެއްވި ދަތުރުފުޅުފައި އެރަށުގެ ރައްޔިތުންނާ ބައްދަލުކުރައްވާ ކަމަށް ދައުލަތުގެ މީޑިއާ އިން ވަނީ ރިޕޯޓްކޮށްފަ އެވެ. އެހެންނަމަވެސް 2024 ވަނަ އަހަރުގެ ފެބްރުއަރީ މަހު އެ ރަށަށް ވަޑައިގެންނެވި އިރު ވެސް ރައީސް ޑރ.މުހައްމަދު މުއިއްޒު ވަނީ އެ ރަށުގެ ބިން ހިއްކުން އެ އަހަރު ފައްޓަވާ ދެއްވާނެ ކަމަށް ވިދާޅުވެފަ އެވެ.
މި މަސައްކަތުގެ އަމަލީ މަސައްކަތް ފެށި ކަމަށް ސަރުކާރުން ހޮނިހިރު ދުވަހު އިއުލާންކޮށްފައި ވާއިރު އެ ރަށް ބިންހިއްކުމަށް ބޭނުންވާ ތަކެތި ގެންގޮސްގެން ނިމިދިޔަ އިންތިޚާބާއި ދިމާކޮށް މަސައްކަތް ކުރި ކަމަށް އެ ރަށުން މި ނޫހަށް މައުލޫމާތު ދިން ފަރާތްތަކުން ވަނީ ބުނެފަ އެވެ.
ތ. ގާދިއްފުށި ބިން ހިއްކުމުގެ މަޝްރޫޢުގެ އެއްބަސްވުމުގައި މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ (އެމް.ޓީ.ސީ.ސީ) އާއެކު ސޮއިކޮށްފައި ވަނީ މި ވެރިކަމުގެ ތެރޭގަ އެވެ. ނިމިދިޔަ އިންތިޚާބާއި ދިމާކޮށް އެތަން ހިއްކުމުގެ މަސައްކަތް ކުރިއަށް ގެންދިޔަ ކަމަށާއި ތ. ގާދިއްފުށިން ނިމިދިޔަ ކައުންސިލް އިންތިޚާބުގައި ސަރުކާރަށް ލިބުނު ބޮޑު ބައްޔަށް ފަހު އެ ރަށް ހިއްކުމަށް ގެންގޮސްފައިވާ ތަކެއްޗާއި، ވަސީލަތްތައް އެ ރަށުން އަނބުރާ ގެންދަން މަސައްކަތް ކުރި ކަމަށް އާއްމުން ވަނީ ބުނެފަ އެވެ.
ތ. ގާދިއްފުށީގައި މިހާރު އޮތީ ޕީއެންސީގެ ކައުންސިލެއް ކަމަށް ވީ ނަމަވެސް ކައުންސިލް އިންތިޚާބުގެ އެއްވެސް ގޮނޑި އެއް އެ ޕާޓީ އަށް ކާމިޔާބު ވެފަ އެއް ނުވެ އެވެ. އާ ކައުންސިލަށް ހޮވުނީ އެމްޑީޕީގެ ކެނޑިޑޭޓުންނެވެ. ކައުންސިލަށް ހޮވުނު މެމްބަރުންނަކީ ކައުންސިލްގެ ރައީސް ކަމަށް މުހައްމަދު މުއާޒް، ދެ މެމްބަރުންނަކީ މުހައްމަދު ހަސަން އަދި ޒުލޭހާ އަހުމަދު އެވެ.
ކައުންސިލަށް ޕީއެންސީ ނުހޮވުމާއި އެކު އެ ތަނުގައި ތިބި މީހުން އަނބުރާ ގެންދިއުމަށް ވެސް މަސައްކަތް ކުރަމުންދާ ކަމަށް އެ ރަށުން މައުލޫމާތު ދިން މީހަކު ވަނީ ބުނެފަ އެވެ. އަދި ބިން ހިއްކުމަށް ރޭގަނޑު މަސައްކަތް ކުރަން ގެންގުޅޭ ލައިޓާއި އެހެނިހެން ސާމާނު ވެސް އަނބުރާ ގެންދިއުމަށް ތައްޔާރުވެފައިވާ ކަމަށް އޭނާ ވަނީ ބުނެފަ އެވެ.
އެ ރަށުން މައުލޫމާތި ދިން އިތުރު މީހަކު ބުނީ ޕީއެންސީ ނުހޮވުނު ހިސާބުން އެ ރަށުގައި ހުރި ބިންހިއްކަން ގެންދިޔަ ތަކެތި އަނބުރާ ފޮނުވާލަންވީ ކަމަށް ބުނެ ޕީއެންސީ އިން ބިރު ދައްކާފައިވާ ކަމަށެވެ. އަދި އެ ބިރުދެއްކުމާއި އެއްގޮތަށް ތަކެތި އަނބުރާ ގެންދާ ކަމަށް އޭނާ ވަނީ ބުނެފަ އެވެ. އަނބުރާ ގެންދިއުމަށްޓަކައި ބަނދަރުމައްޗަށް ތަކެތި އެއްކޮށްފައިވާ މަންޒަރު ފެނުނު ކަމަށް އޭނާ ވަނީ ބުނެފައިވެ އެވެ.
ހޮނިހިރު ދުވަހު ހަވީރު އެކްސްގައި ހިއްސާކުރެއްވި ޕޯސްޓެއްގައި މީޑިއާގައި ހިއްސާކުރެއްވި ޕޯސްޓެއްގައި ރައީސުލްޖުމްހޫރިއްޔާ ވަނީ ގާދިއްފުށި ބިން ހިއްކުމުގެ މި މަޝްރޫޢުގެ ދަށުން އެރަށުން 11 ހެކްޓަރުގެ ބިން ހިއްކުމަށް ހަމަޖެހިފައިވާކަން ހާމަކުރައްވާފަ އެވެ. އަދި އެ މަސައްކަތަށް ހޭދަ ވާނީ 10 ދުވަސްކަމަށާއި މި މަޝްރޫޢަށް 110.5 މިލިޔަން ރުފިޔާ ޚަރަދުކުރާ ކަމަށް ވެސް ރައީސް ވަނީ ވިދާޅުވެފަ އެވެ.
ތ. ގާދިއްފުށީގެ ބިން ހިއްކުމުގެ މަޝްރޫޢު ހަވާލުކޮށްފައި ވަނީ މޯލްޑިވްސް ޓްރާންސްޕޯރޓް އެންޑް ކޮންޓްރެކްޓިންގ ކޮމްޕެނީ އާއި އެވެ. 110,455,574.40 ރުފިޔާގެ އަގަކަށް ހަވާލުކޮށްފައިވާ މި ކޮންޓްރެކްޓްގެ މުއްދަތަކީ 540 ދުވަހެވެ.
މި މަޝްރޫޢުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކަކީ 10 ހެކްޓަރުގެ ބިން ހިއްކުން (390،701 ކޮޑިމީޓަރު ވެލިން)މާއި، 100 މީޓަރުގެ ބޮޑުހިލަ ބްރޭކްވޯޓަރޖެހުމާއި، 704 މީޓަރުގެ ބޮޑުހިލަ ރިވެޓްމަންޓްޖެހުމާއި އަދި 100 މީޓަރުގެ ގްރޮއިން ލުމެވެ.
