ހިންނަވަރު ދާއިރާގެ ގޮނޑި ކާމިޔާބުކުރަން ޕީއެންސީގެ ކެންޑިޑޭޓް 30 މިލިއަން އަށް ވުރެ ގިނަ ރުފިޔާ ހަރަދުކުރި: ރައީސް ސޯލިހު
ނިމިދިޔަ ރައްޔިތުންގެ މަޖިލީހުގެ އިންތިޚާބުގައި ހިންނަވަރު ދާއިރާގެ ގޮނޑި ސަރުކާރު ހިންގާ ޕީއެންސީގެ ކެންޑިޑޭޓު ކާމިޔާބުކުރީ 30 މިލިއަނަށް ވުރެ ގިނަ ރުފިޔާ ހަރަދުކޮށްގެން ކަމަށް ރައީސް ސޯލިހު ވިދާޅުވި. އެމަނިކުފާނު ވިދާޅުވީ، އެ ދާއިރާގެ ގޮނޑި އެމްޑީޕީއަށް ގެއްލުނީ ސަރުކާރުން ނުފޫޒު ފޯރުވުމުގެ ސަބަބުން ކަމަށާއި، ނަމަވެސް ކުރިއަށް އޮތް ތަނުގައި އެ ގޮނޑި އަނބުރާ ހޯއްދަވާނެ ކަމަށް. މީގެ އިތުރުން، އެމްޑީޕީން ރައްޔިތުންނާ ގުޅިގެން މަސައްކަތް ކޮށްފިނަމަ ކުރިއަށް އޮތް އިންތިޚާބުތަކުގެ ފުރިހަމަ އަޣުލަބިއްޔަތު ލިބޭނެ ކަމުގެ ޔަގީންކަން ވެސް ރައީސް ސޯލިހު ދެއްވި.
އެމްޑީޕީން ބޭއްވި ރަސްމިއްޔާތެއްގައި ކުރީގެ ރައީސް އިބްރާހިމް މުހައްމަދު ސޯލިހު ވާހަކަ ދައްކަވަނީ. | އެމްޑީޕީ ސެކްރިޓޭރިއެޓް
ހިންނަވަރު ދާއިރާގެ ގޮނޑި ކާމިޔާބުކުރަން ސަރުކާރު ހިންގާ ޕާޓީ، ޕީއެންސީގެ ކެންޑިޑޭޓް މުހައްމަދު އަބްދުއްރަހްމާން 30 މިލިއަން އަށް ވުރެ ގިނަ ރުފިޔާ ހަރަދު ކުރި ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ހުކުރު ދުވަހުގެ ރޭ ލޯކަލް ކައުންސިލް އިންތިޚާބުގައި އެމްޑީޕީ އަށް ލިބުނު ކާމިޔާބީ ފާހަގަ ކުރުމަށް ޅ. ހިންނަވަރުގައި ބޭއްވި ޖަލްސާގައި ރައީސް ސޯލިހު ވިދާޅުވީ ހިންނަވަރަކީ އަބަދުވެސް އެމްޑީޕީ ރަށެއް ކަމަށާއި، ކުރިއަށް އޮތްތަނުގައި ވެސް އެރަށުގައި އޮންނާނީ އެފިކުރު ކަމަށެވެ.
2024 ވަނަ އަހަރު މަޖިލިސް އިންތިޚާބުގައި ހިންނަވަރު ދާއިރާގެ ގޮނޑި އެމްޑީޕީއަށް ގެއްލުނު ގޮތަށް އިޝާރާތް ކުރައްވައި ރައީސް ސޯލިހު ވިދާޅުވީ އެގޮނޑި ސަރުކާރުގެ ކެންޑިޑޭޓު ކާމިޔާބު ކުރުމަށް 30 މިލިއަނަށް ވުރެ ގިނަ ރުފިޔާ ހަރަދު ކުރި ކަމަށް މައުލޫމާތު ލިބިފައިވާ ކަމަށެވެ.
އެހެންނަމަވެސް މި ބުނިހެން ތާރީހަށް ބަލާއިރު އަޅުގަނޑުމެންނަށް ރައްޔިތުން މަޖިލީހުގެ އިންތިޚާބެއް އެމްޑީޕީ ފިކުރާ، އެމްޑީޕީ އުފެދުނީއްސުރެ މިހާތަނަށް ގެއްލިފައި މިއޮތީ އެންމެ ފަހަރަކު. އެއީ ވޭތުވެދިޔަ 30 އަހަރުގެ ތެރޭގައި މިރަށުގެ ގޮނޑިއެއް އަޅުގަނޑުމެންގެ ވިސްނުމާއި އަޅުގަނޑުމެންގެ ހިޔާލާ އިދިކޮޅަށް ކާމިޔާބުވި ފުރަތަމަ ފަހަރު. ރިޔާސީ އިންތިޚާބު 2023 ވަނަ އަހަރު ނާކާމިޔާބުވުމާއި ގުޅިގެން އެއައި މާޔޫސް ކަމާއި، އަދި ސަރުކާރުން އެ ފޯރުވި ނުފޫޒާއި ބާރާއެކީގައި އަޅުގަނޑުމެންނަށް އެކަން ކުރިމަތިލާން ޖެހުނީ. އަޅުގަނޑަށް މައުލުމާތު ލިބިފައިވާ ގޮތުގައި އެފަހަރު ވެސް އެގޮނޑި ކާމިޔާބު ކުރުމަށްޓަކައި މިހާރުގެ ކެންޑިޑޭޓު 30 މިލިއަނަށް ވުރެ ގިނަ ރުފިޔާ މިދާއިރާއަށް ހަރަދު ކުރި ކަމަށްވޭ. 30 މިލިއަން ރުފިޔާ. މިރަށުގެ ގޮނޑީގައި އެވަރުގެ އަގެއް ހުރީމަ އެއީ އަޅުގަނޑު އެކަމާ ދޭތެރޭގައި ފަހުރުވެރިވެސްވާ ކަމެއް. ކުރިއަށް އޮތްތަނުގައި އަނބުރާ އަނެއްކާ ވެސް އެގޮނޑި އަޅުގަނޑުމެން ހޯދާނަން.ކުރީގެ ރައީސް އިބްރާހިމް މުހައްމަދު ސޯލިހު
މީގެ އިތުރުން ރައީސް ސޯލިހު ވިދާޅުވީ ލާމާރުކަޒީ ނިޒާމު އައިފަހުން ކައުންސިލްތަކުގެ މެޖޯރިޓީ ވެސް ކައުންސިލްގެ ރައީސް ކަމުގެ މަގާމު ވެސް އެމްޑީޕީއަށް ގެއްލިގެން ދިޔައީ އެންމެ ފަހަރަކު ކަމަށެވެ. އަދި އެހެންކޮންމެ ފަހަރަކު ބޮޑު މެޖޯރިޓީއެއް އެމްޑީޕީން ނަގާ ކަމަށް އެމަނިކުފާނު ވިދާޅުވި އެވެ.
ރައީސް ސޯލިހު ވިދާޅުވީ ކުރިއަށް އޮތްތަނުގައި ރައްޔިތުންނާ ގުޅިގެން އެމްޑީޕީން އެކުއެކީގައި މަސައްކަތް ކޮށްފިނަމަ ރިޔާސީ އިންތިޚާބު، ރައްޔިތުންގެ މަޖިލިސް އިންތިޚާބުގެ އިތުރުން ކައުންސިލް އިންތިޚާބުގެ ފުލް މެޖޯރިޓީ އެމްޑީޕީއަށް ލިބޭނެ ކަމަށެވެ. އަދި އެގޮތަށް މަސައްކަތް ކުރުމަށް ވެސް އެމަނިކުފާނު ގޮވާލެއްވި އެވެ.
