ދިވެހިންގެ ކުރިމަތީގައި ރައީސް މުއިއްޒަށް ތާއީދު އޮތީ އެންމެ 30 އިންސައްތަ އަށް: ނިޔާޒް
ލާމަރުކަޒީ ނިޒާމު ހަރުދަނާކުރާނެ ކަމަށް ވިދާޅުވެ ރައީސް ޑރ. މުއިއްޒު ރައްޔިތުންނަށް އިތުރުފުޅު ހައްދަވާފައިވާ ކަމަށް ކުރީގެ މެންބަރު އަލީ ނިޔާޒް ވިދާޅުވެއްޖެ. އޭނާ ވިދާޅުވީ މި ނިޒާމު ހިންގަން އެނގެނީ ހަމައެކަނި އެމްޑީޕީއަށް ކަމަށާއި، ފަސް ސިޓީގެ މޭޔަރުކަން އެ ޕާޓީން ކާމިޔާބު ކުރުމަކީ ރައްޔިތުން އެމްޑީޕީއަށް ކުރާ އިތުބާރު ހާމަވާ ކަމެއް ކަމަށް. އަދި ސަރުކާރުގެ ކެންޑިޑޭޓުންނާ ނުލައިވެސް މި ނިޒާމު ހިންގޭނެކަން ރައްޔިތުން މިހާރު ސާބިތުކޮށްދީފައިވާ ކަމަށްވެސް ނިޔާޒް ފާހަގަކުރެއްވި.
ރައްޔިތުންގެ މަޖިލީހުގެ ހުޅުމާލެ ދާއިރާގެ ކުރީގެ މެންބަރު އަލީ ނިޔާޒު | ރާއްޖެއެމްވީ
ރައީސް ޑރ. މުހައްމަދު މުއިއްޒުގެ ތާއީދު، ރާއްޖޭގެ ރައްޔިތުންގެ ކުރިމަތީގައި މިހާރު އޮތީ އެންމެ 30 އިންސައްތަ ކަމަށް ރައްޔިތުންގެ މަޖިލީހުގެ ހުޅުމާލެ ދާއިރާގެ ކުރީގެ މެންބަރު އަލީ ނިޔާޒް ވިދާޅުވެއްޖެ އެވެ.
ލޯކަލް ކައުންސިލް އިންތިޚާބުގައި އެމްޑީޕީ އަށް ލިބުނު ކާމިޔާބީ ފާހަގަ ކުރުމަށް ޅ. ހިންނަވަރުގައި ބޭއްވި ޖަލްސާގައި ވާހަކަ ދައްކަވަމުން ނިޔާޒް ވިދާޅުވީ ވެރިކަމަށް އައުމަށްޓަކައި ވެރިކަމަށް ކުރިމަތިލާ ހުރިހާ ބޭފުޅުން ވެސް ރައްޔިތުންނަށް ވިއްކާ އެންމެ ވަރުގަދަ އެއްޗަކީ ލާމަރުކަޒީ ނިޒާމު ކަމަށެވެ. ކޮންމެ ބޭފުޅަކު ވެސް އެ ބޭފުޅަކީ ލާމަރުކަޒީ ނިޒާމު އެންމެ ހަރުދަނާ ކުރާނެ މީހާ ކަމަށް ވިދާޅުވާ ކަމަށާ އެހެން ނަމަވެސް އެމްޑީޕީ ނޫން ބަޔަކަށް އެ ނިޒާމު ނޭނގޭ ކަމަށް ނިޔާޒް ވިދާޅުވި އެވެ.
ނިޔާޒް ވިދާޅުވީ އެމްޑީޕީ ފިޔަވައި ދެން ރާއްޖޭގައި ވެރިކަން ކުރި ވެރިން ލާމަރުކަޒީ ނިޒާމު ހަރުދަނާކުރައްވާނެ ކަމަށް ވިދާޅުވެ ރައްޔިތުންނަށް ދޮގު ހެއްދެވި ކަމަށެވެ. އެގޮތުން މިއަދުގެ ރައީސް ޑރ. މުއިއްޒު ވެސް އެމަނިކުފާނު ވެރިކަމަށް ވަޑައިގަތުމަށް ފަހު ލާމަރުކަޒީ ނިޒާމުގެ ޗެމްޕިއަނަކަށް ވާނެ ކަމަށް ވިދާޅުވި ކަމަށާއި ނަމަވެސް އެމަނިކުފާނު ޗެމްޕިއަނަކަށް ވެވަޑައިގެންނެވީ އެ ނިޒާމު ބަލި ކުރައްވައިގެން ކަމަށް ނިޔާޒް ވިދާޅުވި އެވެ.
ޑރ. މުއިއްޒު ވިދާޅުވީ ތިމަންނަ އައިސް ތިމަންނަ އަކީ ލާމަރުކަޒީ ޗެމްޕިއަން އަށް ވާނަމޭ. އެމަނިކުފާނު ޗެމްޕިއަން އަށް ވީ ލާމަރުކަޒީ ނިޒާމް ބަލި ކޮށްގެން. ތަޅާ މަރައިގެން. އެހެން ނަމަވެސް އަޅުގަނޑުމެން ދިވެހި ރައްޔިތުން އެދެނީ ޗެމްޕިއަން އަށް ވުމަށްޓަކައި ލާމަރުކަޒީ ގާނޫނުގެ ފުރިހަމަ ބާރު ރައްޔިތުންނަށް ދިނުމަށް. ރައީސް މުއިއްޒަށް ދަންނަވަން. މަނިކުފާނުގެ އަމިއްލަ އެދުމާ އެއްގޮތަށް ކަންކަން ނުކުރައްވާށޭ.ރައްޔިތުންގެ މަޖިލީހުގެ ހުޅުމާލެ ދާއިރާގެ ކުރީގެ މެންބަރު އަލީ ނިޔާޒް
ނިޔާޒް ވިދާޅުވީ އޭޕްރީލް 4 ވަނަ ދުވަހުގެ އިންތިޚާބުން ހާމަވީ ރައްޔިތުން ލާމަރުކަޒީ ނިޒާމު ބަލައިގެންފި ކަމާ އެ ނިޒާމު ގަބޫލުކޮށްފި ކަން ކަމަށެވެ. އަދި އެ ނިޒާމު ހިންގުމަށް ކޮންމެހެން ސަރުކާރުގެ ކެންޑިޑޭޓުން ބޭނުން ނުވާ ކަމަށް ވެސް ރައްޔިތުން ބުނެފައިވާ ކަމަށް ނިޔާޒް ވިދާޅުވި އެވެ.
ފަސް ސިޓީގެ މޭޔަރު ކަން ވެސް އެމްޑީޕީ އިން ކާމިޔާބު ކޮށްފައިވާއިރު މިކަމުން ހާމަވަނީ މި ނިޒާމު ހިންގުމަށް ރައްޔިތުން އެންމެ އިތުބާރު ކުރަނީ އެމްޑީޕީ އަށް ކަމަށް ކަން ވެސް ނިޔާޒް ވިދާޅުވި އެވެ. ރައްޔިތުން ބޭނުންވަނީ ލާމަރުކަޒީ ނިޒާމު ދަންނަ ބައެއް ކަމާ މި ނިޒާމުން މިހާތަނަށް ފައިދާ ލިބި އެކަން ރައްޔިތުންނަށް ހާމަ ކޮށްދިން ބަޔަކީ ވެސް އެމްޑީޕީ ކަން ރައްޔިތުން މިއަދު ގަބޫލުކުރާ ކަން ހާމަވެފައިވާ ކަމަށް ވެސް ނިޔާޒް ވިދާޅުވި އެވެ.
