މަރާމާތު ކުރުމަށް ރަސްފަންނު ސަރަހައްދު ވަަގުތީ ގޮތުން ބަންދުކޮށްފި
ރަސްފަންނު ސަރަހައްދު ވަރަށް ބޮޑަށް ގިރައި، އެތަނުގެ ވަސީލަތްތައް ވީރާނާވެފައިވާތީ، އެ ސަރަހައްދު އަލުން މަރާމާތުކުރުމުގެ މަސައްކަތް ކޮންސްޓްރަކްޝަން މިނިސްޓްރީން މިހާރު ވަނީ ފަށާފަ.
ރަސްފަންނު ސަރަހައްދު. | ރާއްޖެއެމްވީ
މާލޭގެ ހުޅަނގު ފަރާތުގައި އޮންނަ ރަސްފަންނު ސަރަހައްދު މަރާމާތު ކުރުމުގެ މަސައްކަތް ފެށުމަށްޓަކައި، އެ ސަރަހައްދުގެ އެކި ބައިތައް ވަގުތީ ގޮތުން ބަންދުކުރަން ނިންމައިފި އެވެ.
މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗާ އިން ބުރާސްފަތި ދުވަހު ކުރި އިއުލާނެއްގައި ބުނީ، ހުކުރު ދުވަހުން ފެށިގެން ރަސްފަންނު މަރާމާތު ކުރުމުގެ އަމަލީ މަސައްކަތްތައް ކުރިއަށް ގެންދަން ނިންމާފައިވާ ކަމަށެވެ.
އެ މިނިސްޓްރީން ގެޒެޓްކޮށްފައިވާ އިއުލާނުގައި ބުނެފައިވަނީ، މަރާމާތުގެ މަސައްކަތް ކުރިއަށްދާ މުއްދަތުގައި، ރަސްފަންނުގެ ތެރެއިން މަސައްކަތް ހިނގަމުންދާ ސަރަހައްދުތައް ވަގުތީ ގޮތުން ބަންދުކުރަމުން ގެންދާނެ ކަމަށެވެ. އެހެންކަމުން އެ ސަރަހައްދު ބޭނުންކުރާ އާންމު ރައްޔިތުން އެކަމަށް ސަމާލުވުމަށް މިނިސްޓްރީން ވަނީ އިލްތިމާސްކޮށްފަ އެވެ.
ރަސްފަންނަކީ މާލޭ ސިޓީ ކައުންސިލްގެ ބެލުމުގެ ދަށުގައި އޮންނަ ތަނަކަށް ވީނަމަވެސް، އެ ތަނުގެ މަރާމާތުގެ މަސައްކަތްތައް ސިޓީ ކައުންސިލުން ކޮންސްޓްރަކްޝަން މިނިސްޓްރީއާ ހަވާލުކޮށްފައިވާ ކަމަށް އެ މިނިސްޓްރީން ވަނީ މިދިޔަ އަހަރުގެ ފެބްރުއަރީ މަހުގެ ތެރޭގައި ހާމަކޮށްފަ އެވެ. ރަސްފަންނު ސަރަހައްދު ވަރަށް ބޮޑަށް ގިރައިގެން ދިއުމާއި، އެ ތަނުގައި ބަހައްޓާފައި ހުރި ހަޓުތަކާއި އެހެނިހެން ވަސީލަތްތައް ވީރާނާވެ ހަލާކުވަމުންދާތީ، އެ ސަރަހައްދު އެދެވޭ ގޮތެއްގައި ބޭނުން ނުކުރެވޭތާ މިހާރު ވަނީ ގިނަ ދުވަސްތަކެއް ވެފަ އެވެ.
މިދިޔަ އަހަރުގެ ފެބްރުއަރީ މަހު، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ރަސްފަންނާއި ސަލްޓަން ޕާކު ފަދަ ތަންތަން ވީރާނާވަމުންދާތީ އެކަމާ ހިތާމަކުރައްވާ ކަމަށް ވިދާޅުވެފަ އެވެ. އަދި އެ ތަންތަން މަރާމާތުކޮށް، އަލުން އާރޯކަން ގެނެސްދެއްވާނެ ކަމަށް އެމަނިކުފާނު ވަނީ ވައުދުވެވަޑައިގެންފަ އެވެ. ފާހަގަކޮށްލެވޭ ގޮތުގައި ރަސްފަންނާއި ސަލްޓަން ޕާކަކީ ކުރީގެ ރައީސް އަބްދުﷲ ޔާމީންގެ ވެރިކަމުގައި، ރައީސް މުއިއްޒު ހައުސިން މިނިސްޓަރަކަށް ހުންނަވައިގެން ތަރައްގީކުރެއްވި ދެ ތަނެވެ.
