ހަނގުރާމައާއި ގުޅިގެން ސަރުކާރަށް ކަންކަން ނުވުމުން، އިންތިޚާބަށް ފަހު އަދިވެސް ރޯޅި ބާލަން އުޅެނީ އެހެން ބަޔަކަށް: އަމްރު
ރާއްޖޭގެ އިޤްތިޞާދީ އަދި މާލީ ހާލަތު އިންތިހާއަށް ގޯސްވެފައިވާއިރު، ސަރުކާރުން ކަންކަން ނިންމަނީ ސިޔާސީ މަންފާއަށް އިސްކަންދީގެން ކަމަށް އެސްޓީއޯގެ ކުރީގެ މެނޭޖިންގ ޑިރެކްޓަރ ހުސައިން އަމްރު ވިދާޅުވެއްޖެ. އިންތިޚާބާ ދިމާކޮށް ތަކެތީގެ އަގުތަކަށް ބަދަލު ގެނައުމާއި، ރިޒާވްގައި ފައިސާ ނެތްއިރު ހަގީގަތާ ހިލާފު ބޮޑެތި މަޝްރޫއުތަކުގެ ވާހަކަ ދެއްކުމަކީ ރައްޔިތުންނަށް އޮޅުވާލުން ކަމަށް އޭނާ ފާހަގަކުރެއްވި. މީގެ އިތުރުން ބޭސް ލިބުމުގެ ދަތިކަމާއި ފަތުރުވެރިކަން ދަށްވުމުގެ ސަބަބުން ކުރިމަތިވެފައިވާ ގޮންޖެހުންތަކަށް ސަރުކާރުން އެކަށީގެންވާ ފިޔަވަޅުތަކެއް ނާޅާކަމަށް ވިދާޅުވެ އަމްރު ވަނީ ކަންބޮޑުވުން ފާޅުކުރައްވާފަ.
އެސްޓީއޯގެ ކުރީގެ މެނޭޖިންގ ޑިރެކްޓަރ ހުސައިން އަމްރު. | ރާއްޖެ އެމްވީ
މެދުއިރުމަތީގައި ކުރަމުންދާ ހަނގުރާމައާ ގުޅިގެން ދުނިޔޭގެ އިޤްތިޞާދަށް އަންނަ ބަދަލުތަކާއެކު ސަރުކާރަށް ކަންކަން މެނޭޖުނުކުރެވުމުން، އިންތިޚާބު ނިމުމާއެކު އޭގެ "ރޯޅި" އެހެން ބަޔަކަށް ބާލަން ސަރުކާރުން މަސައްކަތް ކުރަމުންދާ ކަމަށް އެސްޓީއޯގެ ކުރީގެ މެނޭޖިންގ ޑިރެކްޓަރ ހުސައިން އަމްރު ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަ ދައްކަވަމުން އަމްރު ވިދާޅުވީ، މިދިޔަ ލޯކަލް ކައުންސިލް އިންތިހާބާއި ފެންނަ ނުފެންނަ ވޯޓަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ރައްޔިތުންގެ އިތުބާރު ނެތްކަން ހާމަކޮށްދިން ފުރުސަތެއް ކަމަށެވެ.
އަމްރު ވިދާޅުވީ އިންތިޚާބުގެ ކުރީ މަހު ސަރުކާރުން އަމިއްލައަށް އިސްނަގައިގެން މަސްދަޅު ބަހާފައިވާ ކަމަށާއި، ނަމަވެސް އިންތިޚާބު ނިމުނުތާ ފުރަތަމަ ދުވަހު މަސްދަޅުގެ އަގު ބޮޑުކުރި ކަމަށެވެ. އަދި އާންމުންގެ ނުރުހުން އަމާޒުވުމުން ހަމަ އެ ދުވަހުގެ އިރުއޮއްސުނުއިރު އަގު ހެޔޮކުރިކަން އޭނާ ފާހަގަކުރެއްވި އެވެ. މިފްކޯއަށް ވަމުންދާ ގެއްލުން އެނގިތިބެ، އިންތިޚާބަށްޓަކައި މަސްދަޅު ބަހާފައި، އިންތިޚާބު ނިމުމާއެކު އަގު ބޮޑުކުރުމަކީ ރައްޔިތުންނަށް އޮޅުވާލުން ކަމަށް އަމްރު ސިފަކުރެއްވި އެވެ.
ސަރުކާރުގެ ސިޔާސަތުތަކަށް ފާޑުވިދާޅުވަމުން އަމްރު ވިދާޅުވީ، ރާއްޖޭގައި އެއް އަހަރު ދުވަހުގެ ތެޔޮ ރައްކާކުރާނެ ކަމަށް ބުނެ ސަރުކާރުން ދައްކަނީ އެއްވެސް ހަގީގަތެއް ނެތް "ހޮޅި" ވާހަކަތަކެއް ކަމަށެވެ. އެއް އަހަރުގެ ތެލަށް އެކަނިވެސް އެއް ބިލިއަން ޑޮލަރު ހޭދަވާނެ ކަމަށާއި، އެ ތެޔޮ ރައްކާކުރާނެ ތާނގީއާއި، ޖެޓީ އަދި ފަޔަރ ލައިން ފަދަ ވަސީލަތްތަކަށް އިތުރު އެއް ބިލިއަން ޑޮލަރު ބޭނުންވާނެ ކަމަށް އޭނާ ވިދާޅުވި އެވެ. ރާއްޖޭގެ ރިޒާވްގައި ތެޔޮ ގަންނާނެ ފައިސާ ވެސް ނެތް އިރު، ދެ ބިލިއަން ޑޮލަރުގެ މަޝްރޫއެއްގެ ވާހަކަ ދެއްކުމަކީ ބުއްދި ގަބޫލުކުރާ ކަމެއް ނޫން ކަމަށް އޭނާ ވިދާޅުވި އެވެ.
މީގެ 2 މަސް ދުވަސް ވާއިރުގައި ދެން ހަދާނެ ގޮތެއް ޙަޤީޤަތުގައި ނެތް. އަޅުގަނޑުމެން މި ތިބީ ވަރަށް ބޮޑަށް ކަންބޮޑުވެފައި ޙަޤީޤަތުގައި ވެސް. އެއީ މިއަދާ ހިސާބަށް އައިއިރު ސުކޫކަކާއި އެހެން ލޯނެއް ނަގައިގެން އެކަން ކުރާނީއޭ އެގޮތަށް ވަރަށް ހަމަޖެހިލައިގެން ތިބީ. އެކަމަކު އައިސް ދުވަސް ޖެހުނުއިރު ކިހިނެއްތޯ ވީ؟ ލާރިއެއް ނުލިބުނީ. ނުލިބުނީމަ ބީ.އެމް.އެލުން ލާރިކޮޅަކާއި، އެސް.ޓީ.އޯ. ލައްވާ ލޯނެއް ނަގައިގެންނާއި، ރިޒާވްގައި ހުރި ހުރިހާ ފައިސާއެއް ބޭނުންކޮށްގެން އެ ލޯނު ދައްކާލީ. އެ ދައްކާ ލީމާ ދެން ކިހިނެއްތޯ ވީ؟ ރާއްޖެއަށް މިހާރު އަންނަ ފަތުރުވެރިންގެ އަދަދު މަދުވޭ އެބަ. ތިރީސް ޕަސެންޓް މިހާރު ދަށް. އެކަމަކު ތެޔޮ ބިލަށް އަރާ އަދަދު މިހާރު އިންތިހާއަށް ބޮޑުވޭ، ބޭރުވާލެއް އެބަ އިތުރުވޭ، ވަންނަލެއް އެބަ މަދުވޭ. ރިޒާވަކީ ޙަޤީޤަތުގައި އެކަހަލަ ކަންތައްތަކުގައި ބެލެންސްކުރަން އޮންނަ އެއްޗެއް. އެކަމަކު އޭތި މިހާރު ހުސްވެގެން އެ ދިޔައީ. ދިޔައިރު އަދި ހަނގުރާމަ އެ އޮތީ ކުރިއަށް.އެސްޓީއޯގެ ކުރީގެ މެނޭޖިންގ ޑިރެކްޓަރ ހުސައިން އަމްރު
ދުނިޔޭގެ އެހެން ގައުމުތަކުން އިޤްތިޞާދީ ފިޔަވަޅުތައް އަޅަމުންދާއިރު، ރާއްޖެއިން އެފަދަ ފިޔަވަޅެއް ނާޅައި އިންތިޚާބަށް މަޑުކޮށްގެން ތިބި ކަމަށް އަމްރު ވިދާޅުވި އެވެ. އަދި އެހެން ގައުމުތަކުން ފިޔަވަޅު އަޅަނީ ސިޔާސީ ބޭނުމެއްގައި ކަމަށް ސަރުކާރުން ބުނަމުންދިޔަ ނަމަވެސް، މިހާރު ރާއްޖޭގެ ހާލަތު އޮތީ ވަރަށް ނާޒުކު ހާލަތެއްގައި ކަމަށް އޭނާ ވިދާޅުވި އެވެ.
ސިއްހީ ދާއިރާއަށް އަލިއަޅުވާލައްވަމުން އަމްރު ވިދާޅުވީ، ބޭސް ލިބުމުގެ ދަތިކަން އިންތިހާއަށް ބޮޑުވެފައިވާ ކަމަށެވެ. ސަރުކާރުން ބޭސް ހުރިތޯ ބަލާނެ ޕްލެޓްފޯމެއް ހަދާ ވާހަކަ ދައްކާއިރު، އޭގެ މާނައަކީ ބަލިމީހާއަށް ބޭނުންވާ ބޭސް ލިޔެދިނުމުގެ ބަދަލުގައި، ފިހާރައިގައި ހުރި ބޭހެއް ބަލާފައި ޑޮކްޓަރުން ބޭސް ސިޓީ ލިޔަންޖެހުން ކަމަށް އޭނާ ވިދާޅުވި އެވެ. މިއީ ސަރުކާރުގެ ވިސްނުން ހުރި ގޮތް ކަމަށް ވިދާޅުވެ އަމްރު ވަނީ ކަންބޮޑުވުން ފާޅުކުރައްވާފަ އެވެ.
