އެޓަލަންޓާ ބަލިކޮށް، އިންޓަރ އެއް ވަނައިގައި

އިޓާލިއަން ލީގުގައި އެޓަލަންޓާއާ ދެކޮޅަށް ކުޅުނު މެޗުން މޮޅުވެ، އިންޓަރ މިލާން އިން ލީގު ތާވަލްގެ އެއް ވަަނައިގައި ޕޮއިންޓެއްގެ ލީޑު ނަގައިފި އެވެ.

އާދީއްތަ ދުވަހުގެ ރޭ އެޓަލަންޓާގެ އަމިއްލަ ދަނޑުގައި ކުޅުނު މެޗު އިންޓަރ އިން ކާމިޔާބު ކުރީ 1-0 އިންނެވެ. މެޗުގައި އިންޓަރ އިން އެ ޓީމުގެ ހަމައެކަނި ލަނޑު ޖެހީ ވެސް މެޗުގެ ދެ ވަނަ ހާފުގަ އެވެ. 

މެޗު ފަށައިގެން ރަނގަޅަށް ކުޅެމުން ދިޔަ އިންޓަރ އިން ވަނީ ލަނޑު ޖަހަން ފުރުސަތު ތަކެއް ތަނަވަސްކޮށްފަ އެވެ. މެޗުގެ ފުރަތަމަ ހާފުގެ 35 ވަނަ މިނެޓުގައި އިންޓަރގެ މާކަސް ތުރަމް ލަނޑެއް ޖަހައި ކުރި ހޯދި ނަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) ބެލުމަށް ފަހު ވަނީ އެ ލަނޑު ބަލައި ނުގަންނަން ނިންމައިފަ އެވެ.

މެޗުގެ ދެ ވަނަ ހާފުގައި އިންޓަރ އިން ވަނީ ލަނޑު ޖަހައި ލީޑު ނަގައިފަ އެވެ. އެގޮތުން މެޗުގެ 65 ވަނަ މިނެޓުގައި އިންޓަރ އަށް ލީޑު ނަގައިދިނީ އާޖެންޓީނާގެ ލައުޓާރޯ މާޓިނޭޒް އެވެ. އެއީ ފްރެންސެސްކޯ ޕިއޯ އެސްޕޮސިޓޯ ތަނަވަސްކޮށްދިން ފުރުސަތެއްގައި މާޓިނޭޒް ޖެހި ލަނޑެކެވެ.

މޮޅާއެކު އިންޓަރ އެއް ވަނަ އަށް ޖެހިލާފައިވާއިރު، އެއް ވަނައިގައި އެ ޓީމު އޮތީ އެއް ޕޮއިންޓުގެ ލީޑަކުންނެވެ. މިހާތަނަށް ކުޅެފައިވާ 16 މެޗުން އެ ޓީމަށް ލިބެނީ 36 ޕޮއިންޓެވެ. ހަމަ އެ އަދަދަށް މެޗު ކުޅެގެން ދެ ވަަނައިގައި އޭސީ މިލާނަށް ލިބެނީ 35 ޕޮއިންޓެވެ. ތިން ވަނައިގައި އޮތް އެންމެ ފަހުގެ ޗެމްޕިއަން ނަޕޯލީ އަށް 34 ޕޮއިންޓު ލިބޭއިރު، ހަތަރު ވަނައިގައި ޔުވެންޓަސް އަށް ލިބެނީ 32 ޕޮއިންޓެވެ. 

މެޗަށް ފަހު ވާހަކަ ދައްކަމުން އިންޓަރ މިލާންގެ ކޯޗު ކްރިސްޓިއަން ޗިވޫ ބުނެފައި ވަނީ، އެއީ ވަރަށް އުނދަގޫ ޓީމަކާ ދެކޮޅަށް ކުޅެ، އިންޓަރ އިން ހޯދި ވަރަށް މުހިންމު މޮޅެއް ކަމަށެވެ. އޭނާ ބުނީ މެޗުގައި އެޓަލަންޓާ އިން ކުޅެމުން ގެންދިޔައީ ވަރަށް ރަނގަޅަށް ކަމަށާއި، އެ ޓީމުގެ ފަރާތުން އުނދަގޫ ތަކެއް ވެސް ކުރިމަތިވި ކަމަށެވެ.

އޭނާ ބުނީ މެޗުގެ ފުރަތަމަ ހާފުގައި އިންޓަރ އަށް ކޮންމެ ވެސް ވަރެއްގެ އުނދަގޫ ތަކެއް ވެސް ކުރިމަތިވި ކަމަށާއި، ނަމަވެސް އިންޓަރ އަށް ފުރުސަތު ލިބުނު ކަމަށެވެ. އޭނާ ބުނީ މެޗުގައި ބަދަލު ކުޅުންތެރިންގެ ގޮތުގައި ނިކުތް ކުޅުންތެރިންނާއި، މުޅި ޓީމު އެކުވެގެން ކުރި މަސައްކަތުގެ ނަތީޖާ އަކީ ތިން ޕޮއިންޓު ކަމަށެވެ.