ނަޕޯލީ އިން، އިޓާލިއަން ސުޕަ ކަޕް ކާމިޔާބު ކޮށްފި
މެޗަށް ފަހު ވާހަކަ ދައްކަމުން ނަޕޯލީގެ ކޯޗު އެންޓޯނިއޯ ކޮންޓޭ ބުނީ، މެޗުގައި އޭނާާގެ ކުޅުންތެރިން ދެއްކި ކުޅުމާާ މެދު ވަރަށް ބޮަޑަށް ހިތްހަމަ ޖެހޭ ކަމަށާއި، މިއީ ނަޕޯލީ އަށް ހައްގު ކާމިޔާބެއް ކަމަށް. މުބާރާތުގެ ފައިނަލްގެ ޖާގަ ނަޕޯލީ އިން ހޯދީ ސެމީ ފައިނަލްގައި އޭސީ މިލާާންގެ މައްޗަށް ކުރި ހޯދައިގެން. ކޮންޓޭ ބުނީ ދެ މެޗުގައި ވެސް ނަޕޯލީ އިން ދެއްކީ ރަނގަޅު ކުޅުމެއް ކަމަށް.
ނަޕޯލީ އިން އިޓާލިއަން ސުޕަ ކަޕްގެ ތަށި އުފުލާލަނީ
އިޓާލިއަން ސުޕަ ކަޕްގެ ފައިނަލްގައި ބޮލޯނާއާ ދެކޮޅަށް ކުޅުނު މެޗުން މޮޅުވެ، ނަޕޯލީ އިން މުބާރާތުގެ ޗެމްޕިއަންކަން ހޯދައިފި އެވެ.
ހޯމަ ދުވަހުގެ ރޭ ކުޅުނު ފައިނަލް މެޗު ނަޕޯލީ އިން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި ނަޕޯލީ އިން އެއް ލަނޑު ޖެހިއިރު، އަނެއް ލަނޑު އެ ޓީމުން ޖެހީ މެޗުގެ ދެ ވަނަ ހާފުގަ އެވެ.
މެޗުގެ ފުރަތަމަ ހާފުގެ 39 ވަނަ މިނެޓުގައި ނަޕޯލީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޑޭވިޑް ނެރެސް އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ މެތެއޯ ޕޮލިޓާނޯ އެވެ. އޭގެ ފަހުން ވެސް މެޗުގައި ލަނޑު ޖަހަން ނަޕޯލީ އަށް ވަނީ ފުރުސަތު ލިބިފަ އެވެ.
މެޗުގެ ދެ ވަނަ ހާފު ފަށައިގެން ވެސް ނަޕޯލީ އިން ވަނީ ލަނޑު ޖަހަން ފުރުސަތު ތަނަވަސްކޮށްފަ އެވެ. މެޗުގެ ދެ ވަނަ ހާފު ފަށައިގެން ކުރީ ކޮޅު ނަޕޯލީ އިން ދެ ވަނަ ލަނޑެއް ޖަހައި ލީޑު ފުޅާ ކުރި އެވެ. އެގޮތުން މެޗުގެ 57 ވަނަ މިނެޓުގައި ނަޕޯލީގެ ދެ ވަނަ ލަނޑު ވެސް ޖެހީ ނެރެސް އެވެ.
މިއީ ނަޕޯލީ އިން އެ ޓީމުގެ ތާރީޚުގައި އިޓާލިއަން ސުޕަ ކަޕް ކާމިޔާބު ކުރި ތިން ވަނަ ފަހަރެވެ.
މެޗަށް ފަހު ވާހަކަ ދައްކަމުން ނަޕޯލީގެ ކޯޗު އެންޓޯނިއޯ ކޮންޓޭ ބުނީ، މެޗުގައި އޭނާާގެ ކުޅުންތެރިން ދެއްކި ކުޅުމާާ މެދު ވަރަށް ބޮަޑަށް ހިތްހަމަ ޖެހޭ ކަމަށާއި، މިއީ ނަޕޯލީ އަށް ހައްގު ކާމިޔާބެއް ކަމަށެވެ. މުބާރާތުގެ ފައިނަލްގެ ޖާގަ ނަޕޯލީ އިން ހޯދީ ސެމީ ފައިނަލްގައި އޭސީ މިލާާންގެ މައްޗަށް ކުރި ހޯދައިގެންނެވެ. ކޮންޓޭ ބުނީ ދެ މެޗުގައި ވެސް ނަޕޯލީ އިން ދެއްކީ ރަނގަޅު ކުޅުމެއް ކަމަށެވެ.
މިއީ ކޮންޓޭގެ އިރުޝާދުގެ ދަށުން ނަޕޯލީ އިން ކާމިޔާބު ކުރި ދެ ވަނަ ތައްޓެވެ. އޭނާގެ އިރުޝާދުގެ ދަށުން މިދިޔަ ސީޒަންގައި ނަޕޯލީ އިން ވަނީ އިޓާލިއަން ލީގު ކާމިޔާބު ކޮށްފަ އެވެ. ކޮންޓޭ ބުނީ މި ކާމިޔާބާމެދު ވަރަށް ބޮޑަށް ހިތްހަމަ ޖެހޭ ކަމަށާއި، ކުރިއަށް އޮތް ތަނުގައި އިތުރު ކަންކަން ހާސިލު ކުރުމަށް މަސައްކަތް ކުރާނެ ކަމަށެވެ.
އިތުރަށް ވާހަކަ ދައްކަމުން ކޮންޓޭ ބުނީ ނަޕޯލީގައި ތިބީ ފެންވަރު ރަނގަޅު އަދި ޓީމަށް ބޭނުންވާ ކާމިޔާބީ ހޯދޭނެ ފެންވަރުގެ ކުޅުންތެރިން ކަމަށެވެ. އިޓާލިއަން ސުޕަ ކަޕާ އެކު ނަޕޯލީ އަށް އިތުރު ހިތްވަރެއް ލިބިއްޖެ ކަމަށާއި، އެކަމުން ހިތްވަރު ލިބިގެން ކުރިއަށް ދާން އެންމެން ވެސް މަސައްކަތް ކުރާނެ ކަމަށް އޭނާ ބުންޏެވެ.
