އިންތިޚާބުގައި ފެނިގެންދިޔައީ މުޅި ރާއްޖެ އަލުން ރަން ރީނދޫވި މަންޒަރު: ޝާހިދު

ފެނިގެންދިޔައީ މުޅި ރާއްޖެ އަލުން ރަން ރީނދޫވި މަންޒަރު ކަމަށް އެމްޑީޕީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.

ޝާހިދު އެފަދައިން ވިދާޅުވީ ލޯކަލް ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބު އަދި ރައްޔިތުންގެ ޚިޔާލު ހޯދުމުގެ ޢާންމު ވޯޓުގައި އެމްޑީޕީ އިން ކާމިޔާބު ކުރުމާގުޅިގެން އެކްސްގައި ކުރެއްވި ޕޯސްޓެއްގަ އެވެ. ޝާހިދު ވަނީ މި އިންތިޚާބުގައި ރައްޔިތުން ސަރުކާރަށް ދީފައި ވަނީ ވަރަށް ސާފު މެސެޖެއް ކަމަށް ބުނެފަ އެވެ. އެމްޑީޕީގެ ހިތްވަރުގަދަ ކެންޑިޑޭޓުންނާއި ކެންޕެއިން ޓީމުތަކާއި، ރަންރީނދޫ ލަޝްކަރާއި، މި މަސައްކަތުގައި ބައިވެރިވެވަޑައިގެންދެއްވި އެންމެހައި ބޭފުޅުންނަށް ވެސް ޝާހިދުގެ ޕޯސްޓްގައި ހިތްވަރު ދެއްވާފައިވެ އެވެ.

ހޮނިހިރު ދުވަހު ނަގާފައިވާ ރައްޔިތުންގެ ހިޔާލު ހޯދުމުގެ ވޯޓުގައި، ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލުމާއި ގިނަ ރައްޔިތުން ވަނީ ދެކޮޅު ހަދާފަ އެވެ. ވަގުތީ ނަތީޖާ އަށް ބަލާ ނަމަ ވޯޓުލީ މީހުންގެ 70% އަށް ވުރެ ބޮޑުބައި ބޭނުން ވަނީ  ރިޔާސީ އިންތިޚާބާއި މަޖިލިސް އިންތިޚާބު ވަކިން ބޭއްވުމެވެ.

މީގެ އިތުރުން މާލެ ހިމެނޭހެން ފަސް ސިޓީގެ މޭޔަރު ކަމުގެ ގޮނޑި ވެސް ކާމިޔާބުކޮށްފައި ވަނީ އިދިކޮޅު އެމްޑީޕީ އިންނެވެ. މީގެ އިތުރުން އެމްޑީޕީ އިން ވަކީ ކައުންސިލްތަކުގެ ތެރެއިން ގިނަ ކައުންސިލްތަކުގެ ގޮނޑިތައް ކާމިޔާބުކޮށްފަ އެވެ.