ސަރުކާރެއް ފާލުން ނެއްޓިގެން ދިއުމުން ދިވެހި ރައްޔިތުން މިވަނީ ވަރަށް ޒިންމާދާރު ކަމާއި އެކު ބަސް ބުނެފައި: ފައިސަލް
ބޭއްވި އިންތިޚާބުތަކުގައި އެމްޑީޕީން ހޯދި ކާމިޔާބީއާ ގުޅިގެން، ކުރީގެ ނައިބު ރައީސް ފައިސަލް ނަސީމް ވަނީ އެ ޕާޓީގެ ލީޑަރޝިޕުން ދެއްކެވި އެއްބައިވަންތަކަމަށް ތައުރީފު ކުރައްވާފަ.
ކުރީގެ ނައިބު ރައީސް ފައިސަލް ނަސީމް | ރާއްޖެ އެމްވީ
ސަރުކާރެއް ފާލުން ނެއްޓިގެން ދިއުމުން ދިވެހި ރައްޔިތުން މިވަނީ ވަރަށް ޒިންމާދާރު ކަމާއި އެކު ބަސް ބުނެފައި ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެ އެވެ.
އެމަނިކުފާނު އެފަދައިން ވިދާޅުވީ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީ އަށް މަސައްކަތް ކުރާ ކޮމިޓީ އަދި ފެންނަނުފެންނަ ވޯޓުގައި އެމްޑީޕީ އިން ހޯދި ނަތީޖާ އާއި ގުޅިގެން އެކްސްގައި ހިއްސާކުރެއްވި ޕޯސްޓެއްގަ އެވެ. ފައިސަލް ވަނީ ދިވެހިން ބަސް ބުނެފައި ވަނީ ވަރަށް ޒިންމާދާރުކަމާއި އެކުގައި ކަމަށް ވެސް ވިދޅުވެފަ އެވެ.
ކުރިމަތިވި ގޮންޖެހުންތަކުން އަރައިގަނެ އެމްޑީޕީގެ ލީޑަރޝިޕް އެކަތިގަނޑަކަށްވެ ކުރެއްވި ނަމޫނާ މަސައްކަތުގެ ސަބަބުން މިއަދު ބޭއްވި އިންތިޚާބުގައި ލިބުނީ ފުރިހަމަ ކާމިޔާބީ އެއް ކަމަށް ވެސް އެ މަނިކުފާނު ވިދާޅުވި އެވެ. ފައިސަލް ވަނީ މި އިންތިޚާބަށް ނުފޫޒު ފޯރުވަން ސަރުކާރުން ކުރި އެންމެހައި ކަންތަކާއި އެކުވެސް އިންތިޚާބު ކާމިޔާބު ކުރެވިފައިވާތީ އެކަމާއި މެދު އުފާފާޅުކުރައްވާފަ އެވެ.
