ހޮނިހިރު ދުވަހު ނަގާ ވޯޓުތަކުގައި ކޮންމެ މީހަކަށް ވެސް ދޭނީ އެމީހަކު ވޯޓުލާން ބޭނުންކަމަށް ބުނާ ކަރުދާސްކޮޅު އެކަނި: އީސީ
4 އެޕްރީލު 2026 | ހޮނިހިރު 02:23ހޮނިހިރު ދުވަހު ބާއްވާ ތިން އިންތިޚާބުގައި ވޯޓުލާ މީހާ ބޭނުންވާ ކަރުދާސް އެކަނި ދޫކުރަން އިލެކްޝަންސް ކޮމިޝަނުން ނިންމުމާ ގުޅިގެން، ވޯޓުގެ ސިއްރުކަން ގެއްލޭ ކަމަށް ބުނެ ގިނަ ބަޔަކު ދަނީ ކަންބޮޑުވުން ފާޅުކުރަމުން. މިގޮތަށް އަމަލުކުރުމަކީ އިންތިޚާބަށް ނުފޫޒު ފޯރުވުމަށް ކުރާ ކަމެއް ކަމަށް އިދިކޮޅު އެމްޑީޕީން ތުހުމަތުކުރާއިރު، ކޮމިޝަނުން ބުނީ މި ބަދަލު ގެނައީ މަރުހަލާގެ ތެރެއިން ދިމާވެދާނެ މައްސަލައެއް ހައްލުކުރުމަށް ކަމަށް.
ހުކުރު ދުހަވުގެ ރޭ ބޭއްވި ޕްރެސް ކޮންފަރެންސްގައި އީސީގެ ރައީސް މުހައްމަދު ޒާހިދު ވާހަކަދައްކަވަނީ | ރާއްޖެ އެމްވީ
ހޮނިހިރު ދުވަހު ބާއްވާ ތިން ވޯޓުގައި ކޮންމެ މީހަކަށް ވެސް ދޭނީ އެމީހަކު ލާން ބޭނުންވާ ވޯޓެއްގެ ކަރުދާސް އެކަނި ކަމަށް އިލެކްޝަންސް ކޮމިޝަނުން ބުނުމާ ގުޅިގެން ގިނަ ބަޔަކު ވަނީ ކަންބޮޑުވުން ފާޅުކޮށްފަ އެވެ.
މިއީ ވޯޓުގެ ސިއްރުކަން ގެއްލޭ ކަމެއް ކަމަށް ބުނެ ބައެއް ފަރާތްތަކުން ވަނީ ކަންބޮޑުވުން ފާޅުކޮށްފައެވެ.
ހުކުރު ދުވަހުގެ ރޭ ފުލުހުންނާ އެކު ބޭއްވި ޕްރެސް ކޮންފަރެންސްގައި އިލެކްޝަންސް ކޮމިޝަންގެ ރައީސް މުހައްމަދު ޒާހިދު ވިދާޅުވީ ވަކި އިންތިހާބެއްގެ ކަރުދާސް ބޭނުން ނަމަ އެ މީހަކަށް ދޭނީ އެ އިންތިހާބެއްގެ ވޯޓު ދޭން ބޭނުންވާ ކަރުދާސް އެކަނި ކަމަށެވެ.
ވޯޓުލާން ދާ މީހާ ވަކި އިންތިހާބެއްގެ ކަރުދާސް ބޭނުން ނުވާ ހާލަތުގައި އެކަން އޮބްޒާވަރުންގެ ކުރިމަތީގައި އިއުލާންކުރާނެ ކަމަށް ޒާހިދު ވިދާޅުވިއެވެ. އެގޮތަށް ހަދަނީ ވޯޓުލުމުގެ މަރުހަލާ އިތުރަށް ކުރިއަށްދާއިރު މައްސަލައެއް ކުރިމަތިވި ނަމަވެސް އެކަން އެންމެންނަށް އަންގާފައި ބޭއްވުމުގެ ގޮތުން ކަމަށް ޒާހިދު ވިދާޅުވި އެވެ.
ތިން ކަރުދާސްކޮޅު އަޅުގަނޑުމެން އޭނާއަށް ދޭނެ. ދެން އެއްވެސް މީހަކު ވަކި، ލާން ބޭނުން ނޫން ކަމަށްވަންޏާ އެ ކަރުދާސްކޮޅެއް ނުދޭނެ. ނުދީ އަޅުގަނޑުމެން އިއުލާންކުރާނެ އިނގޭތޯ. އަޅުގަނޑުމެން އިއުލާންކުރާނެ މިވެނި މީހަކު އެ ކަރުދާސްކޮޅު ބޭނުންނޫން ކަމަށް.އިލެކްޝަންސް ކޮމިޝަންގެ ރައީސް މުހައްމަދު ޒާހިދު
ހޮނިހިރު ދުވަހުގެ ވޯޓަށް ވަގުތުކުޑަތަން ވެފައިވަނިކޮށް އިލެކްޝަންސް ކޮމިޝަނުން މިފަދައިން އިއުލާނުކުރުމުން ގިނަ ބަޔަކު ވަނީ ކަންބޮޑުވުން ފާޅުކޮށްފަ އެވެ. މީގެ ކުރިން ވެސް ބައެއް ފަރާތްތަކުން ވަނީ އިލެކްޝަންސް ކޮމިޝަނުން މިފަދައިން އަމަލުކުރަން އުޅޭ ކަމަށް ބުނެ މިއީ ވޯޓުގެ ސިއްރުކަން ގެއްލޭ ކަމެއް ކަމަށް ބުނެ ކަންބޮޑުވުން ފާޅުކޮށްފަ އެވެ.
މިކަމާ ގުޅިގެން އިދިކޮޅު މައި ޕާޓީ އެމްޑީޕީގެ ކައުންސިލް އިންތިހާބުގެ ތަރުޖަމާނު އަބްދުﷲ ވަހީދު ވިދާޅުވީ އިންތިހާބު އިއުލާނު ކުރީއްސުރެ އިލެކްޝަންސް ކޮމިޝަންގެ ފަރާތުން ވަކި އަތަކަށް ނަތީޖާ އަނބުރާލުމުގެ މަސައްކަތް ކުރަމުންދާ ކަމަށެވެ. އަދި މިއީ ސީދާ ގޮތެއްގައި އިންތިހާބުތަކަށް ނުފޫޒު ފޯރުވުމަށް ކުރާ ކަމެއްގެ ގޮތުގައި ވަހީދު ވަނީ ތުހުމަތު ކުރައްވާފަ އެވެ.
ވޯޓުގެ ސިއްރުކަން ދިފާއުކުރުމަކީ ޑިމޮކްރަސީގެ މުހިންމު އަސާސެކެވެ. ވޯޓުލާ މީހާ ކޮން ވޯޓެއް ލާކަން އެހެން މީހަކަށް އެނގޭ ގޮތަށް އަމަލުކުރުމަކީ ވޯޓުގެ ސިއްރުކަމަށް ނުރައްކާވާނެ ކަމެއް ކަމަށް ބައެއް ފަރާތްތަކުން ބުނެ އެވެ.
ހޮނިހިރު ދުވަހު ބާއްވާ 3 އިންތިހާބުގެ ވޯޓުލުން ކުރިޔަށް ދާނީ ހެނދުނު 8:00 އިން ހަވީރު 4:00 އަށެވެ. ހޮނިހުރި ދުވަހު ބާއްވާ އިންތިހާބު ތަކަކީ ލޯކަލް ކައުންސިލް އިންތިޚާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުގެ އިންތިޚާބާއި މައި ދެ އިންތިޚާބު އެއްކޮށްލުމާ ގުޅޭ ގޮތުން ޚިޔާލު ހޯދަން ނަގާ ވޯޓެވެ.
