އިންތިޚާބާއި ގުޅިގެން އަންނަ އާދިއްތަ ދުވަހާއި ހޯމަ ދުވަސް ސަރުކާރު ބަންދު ކޮށްފި
ތިން އިންތިޚާބާ ގުޅިގެން، އާދިއްތަ އާއި ހޯމަ ދުވަހަކީ ސަރުކާރު ބަންދު ދެ ދުވަސް ކަމަށް ރައީސް ވަނީ ހަމަޖައްސަވާފައި. މި ދެ ދުވަސް ބަންދުކުރަން ނިންމެވީ އިންތިޚާބުގެ އެކި މަސައްކަތްތަކުގައި ދައުލަތުގެ ގިނަ އަދަދެއްގެ މުވައްޒަފުން ހަރަކާތްތެރިވާތީ، އިލެކްޝަންސް ކޮމިޝަނުގެ އެދުމުގެ މަތިން.
ތިން އިންތިޚާބެއްގެ ވޯޓުލުން ގުނުމުގެ މަސައްކަތް ކުރަނީ. | ރާއްޖެއެމްވީ
ހޮނިހިރު ދުވަހު ކުރިއަށް ގެންދިޔަ ތިން އިންތިޚާބާ ގުޅިގެން އަންނަ އާދިއްތަ ދުވަހާއި ހޯމަ ދުވަސް ސަރުކާރު ބަންދު ދުވަހެއްގެ ގޮތުގައި ރައީސް ޑރ. މުހައްމަދު މުއިއްޒު ހަމަޖައްސަވައިފި އެވެ.
ހޮނިހިރު ދުވަހު ރައީސް އޮފީހުން ނެރުނު ދެންނެވުމުގައި ބުނީ، 5 އޭޕްރީލް 2026 ވާ އާދިއްތަ ދުވަހާއި 6 އޭޕްރީލް 2026 ވާ ހޯމަ ދުވަސް ސަރުކާރު ބަންދު ދުވަހެއްގެ ގޮތުގައި ރައީސް ހަމަޖައްސަވާފައިވާ ކަަމަށެވެ.
މިގޮތަށް ހަމަޖެއްސެވީ ލޯކަލް ކައުންސިލްތަކާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ އިންތިޚާބާއި ރައްޔިތުންގެ ހިޔާލު ހޯދުމުގެ އާއްމު ވޯޓުލުން 4 އޭޕްރީލް 2026 އޮތުމާއެކު އިންތިޚާބާ ގުޅޭ އެކިއެކި މަސައްކަތްތަކުގައި ދައުލަތުގެ މުއައްސަސާތަކާއި ސިވިސް ސަރވިސްގެ ގިނަ އަދަދެއްގެ މުވައްޒަފުން ހަރަކާތްތެރިވާތީ އާދިއްތަ ދުވަހަކީ ސަރުކާރު ބަންދު ދުވަހެއްގެ ގޮތުގައި ހަމަޖައްސައިދިނުމަށް އިލެކްޝަން ކޮމިޝަން (އީސީ) އިން އެދިފައިވާތީ ކަމަށެވެ.
މީގެ އިތުރުން އިންތިޚާބަށް ފަހު ވެސް އިންތިޚާބާ ގުޅުންހުރި މުހިންމު މަސައްކަތްތަކެއް ކުރުމަށް ހަމަޖެހިފައިވާތީ އޭޕްރީލް 6 ވާ ހޯމަ ދުވަހު ވެސް ސަރުކާރު ބަންދު ދުވަހެއްގެ ގޮތުގައި ހަމަޖައްސައިދިނުމަށް ކޮމިޝަނުން އެދިފައިވާ ކަމަށް ދެންނެވުމުގައި ބުނެފައިވެ އެވެ.
