ވޯޓުލުން އަމާންކޮށް ކުރިއަށް ގޮސް ޑިމޮކްރަސީ ހިނގާތީ އުފާވޭ: ރައީސް ނަޝީދު
4 އެޕްރީލު 2026 | ހޮނިހިރު 08:10އިންތިޚާބުގެ ކަންކަން އަމާންކަމާއެކު ކުރިއަށްދާތީ އެކަމާ އުފާކުރައްވާ ކަމަށާއި، ޑިމޮކްރަސީގެ ނިޒާމު ހިނގަމުންދާ މަންޒަރު ފެނުމަކީ ހިތްހަމަޖެހުމެއް ކަމަށް ރައީސް ނަޝީދު ވިދާޅުވި.
ކުރީގެ ރައީސް މުހައްމަދު ނަޝީދު މީޑިއާތަކަށް މައުލޫމާތުދެއްވަނީ | ރާއްޖެ އެމްވީ
ވޯޓުލުން އަމާންކޮށް ކުރިއަށް ގޮސް ޑިމޮކްރަސީ ހިނގާތީ އުފާވެވަޑައިގަންނަވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
މިހާރު ކުރިއަށްދާ ލޯކަލް ކައުންސިލް، ޑަބްލިއުޑީސީ އަދި ރެފަރެންޑަމް ވޯޓުގައި ވޯޓުލެއްވުމަށް ފަހު ނޫސްވރިންނަށް މައުލޫމާތުދެއްވަމުން ރައީސް ނަޝީދު ވިދާޅުވީ ވަރަށް އޮމާންކަމާއި އެކު އިންތިޚާބު ދިއުމަކީ އުފާކުރައްވާ ކަމެއް ކަމަށެވެ. މި މަންޒަރުތަކުން ލިބެނީ އުފާވެރިކަން ކަމަށާއި ޑިމޮކްރަސީ ހިނގާ މަންޒަރު ފެނުމަކީ އުފަލެއް ކަމަށް އެ މަނިކުފާނު ވިދާޅުވި އެވެ. ވޯޓުލުމުގެ ހައްގަކީ ކޮންމެ މީހަކު ވެސް އަދާކުރަންޖެހޭ މަސްއޫލިއްޔަތެއް އަދި ވާޖިބެއް ކަމަށް އެ މަނިކުފާނު ވިދާޅުވި އެވެ.
"އަމާން އޮމާންކޮށް އިންތިޚާބު ދިއުމަކީ ވަރަށް ހިތްހަމަޖެހުން ލިބޭ ކަމެއް. އަޅުގަނޑުގެ ހިތަށް ވަރަށް އުފާވެރިކަމެއް ލިބޭ މަންޒަރުތަކެއް ޑިމޮކްެރަސީ ހިނގަމުންދާ ތަން ފެންނަކަމީ" ރައީސް ނަޝީދު ވިދާޅުވި އެވެ.
ގާނޫނީ ދައުލަތެއް ހިފެހެއްޓި ރައްޔިތުންގެ ތަނަވަސްކަން ދެމެހެއްޓޭނީ ހިންގުމުގެ ނިޒާމް ފައްކާކޮށް ބެލެހެއްޓިގެން ކަމަށް އެ މަނިކުފާނު ވަނީ ވިދާޅުވެފަ އެވެ. އެހެންކަމުން ވޯޓުގެ ބޭނުން ހިފުމަކީ ކޮންމެހެން މުހިންމު ކަމެއް ކަމަށް އެ މަނިކުފާނު ވިދާޅުވި އެވެ.
