ވެނެޒުއެލާގެ ވަގުތީ ރައީސާއާ ދެކޮޅަށް އަޅާފައިވާ ފިޔަވަޅުތައް އެމެރިކާ އިން އުވާލައިފި

ވެނެޒުއެލާގެ ވަގުތީ ރައީސާ ޑެލްސީ ރޮޑްގްރިގޭޒްއާ ދެކޮޅަށް އަޅާފައިވާ ފިޔަވަޅުތައް އުވާލަން އެމެރިކާގެ ސަރުކާރުން ނިންމައިފި އެވެ.

އެމެރިކާގެ ރައީސް ޑޮނަލްޑް ޓްރަމްޕްގެ އަމުރަށް ހިންގި އޮޕަރޭޝަނެއްގައި އެމެރިކާގެ އަސްކަރިއްޔާ އިން ވަނީ، ވެނެޒުއެލާގެ ރައީސް ނިކޮލަސް މަދޫރޯ ހައްޔަރު ކޮށްފަ އެވެ. އެއާ އެކު، ވެނެޒުއެލާގެ ވަގުތީ ރައީސާގެ މަގާމަށް ވަނީ ޑެލްސީ ހަމަޖައްސަވައިފަ އެވެ. 

އެމެރިކާގެ ޓްރެޒަރީ ޑިޕާޓްމަންޓުގެ އޮފީސް އޮފް ފޮރިން އެސެޓްސް ކޮންޓްރޯލް (އޯފެކް)ގެ ވެބްސައިޓުގައި އާންމު ކޮށްފައިވާ ގޮތުން، އެމެރިކާގެ ޚާއްޞަ ދަތި ކުރުމުގެ ފިޔަވަޅުތައް އަޅާފައިވާ މީހުންގެ ލިސްޓުން ޑެލްސީގެ ނަން މިހާރު ވަނީ އުނި ކޮށްފަ އެވެ. 

އެމެރިކާގެ މި ނިންމުމަށް މަރުޙަބާ ވިދާޅުވަމުން ޑެލްސީ އެކްސްގައި ކުރެއްވި ޕޯސްޓެއްގައި ވިދާޅުވީ، މިއީ ދެ ޤައުމުގެ ދެ މެދުގައި އޮތް ގުޅުން އާންމު ޙާލަތަކަށް ގެނައުމަށާއި، ގުޅުން ބަދަހި ކުރުމަށް އެޅުނު މުހިންމު ފިޔަވަޅެއް ކަމަށެވެ. އަދި މި ކުރިއެރުމާ އެކު، ވެނެޒުއެލާއާ ދެކޮޅަށް މިހާރު ވެސް އަމަލު ކުރަމުންދާ އެހެނިހެން ދަތި ކުރުމުގެ ފިޔަވަޅުތައް އުވާލުމަށް މަގު ފަހި ވާނެ ކަމަށް އުންމީދު ކުރައްވާ ކަމަށް ވެސް އޭނާ ވިދާޅުވި އެވެ. އަދި މިކަމުގެ ސަބަބުން ދެ ޤައުމުގެ ރައްޔިތުންގެ ލާބަޔަށްޓަކައި މަސައްކަތް ކުރެވޭނެ އެޖެންޑާއެއް އެކުލަވާލެވޭނެ ކަމަށް ވެސް ޑެލްސީ ވިދާޅުވި އެވެ. 

އެމެރިކާ އިން މަދޫރޯ ހައްޔަރު ކުރި ފަހުން، އެމެރިކާ އާއި ވެނެޒުއެލާއާ ދެމެދު އޮތް ގުޅުން ވަނީ ވަރަށް ބޮޑަށް ރަނގަޅު ވާން ފަށައިފަ އެވެ. ވެނެޒުއެލާގެ ވަގުތީ ރައީސް ޑެލްސީ ވަނީ، އެމެރިކާގެ ރައީސް ޓްރަމްޕްގެ އެދިވަޑައިގެންނެވުމުގެ މަތިން ވެނެޒުއެލާގެ ހަކަތައިގެ ސިނާއަތަށް އެމެރިކަގެ ކުންފުނި ތަކަށް ހުޅުވާލުމަށް އެއްބަސްވެ ވަޑައިގެންފަ އެވެ. މީގެ ކުރިން މަދޫރޯގެ ނައިބު ރައީސްގެ ގޮތުގައި ޑެލްސީއާ ދެކޮޅަށް އެންމެ ފުރަތަމަ އެމެރިކާ އިން ފިޔަވަޅު އެޅީ، އޭނާ އަކީ މަދޫރޯގެ ސަރުކާރުގެ ނުފޫޒު ގަދަ އިސްވެރިޔަކަށް ވާތީ އެވެ. 

ޑެލްސީގެ އިތުރުން ޑިފެންސް މިނިސްޓަރު ލަޑީމިއާ ޕަޑްރީނޯ ލޮޕޭޒް އާއި، އިންޓީރިއާ މިނިސްޓަރު ދިއޮސްޑާޑޯ ކަބެއްޔޯއާ ދެކޮޅަށް ވެސް އެމެރިކާ އިން އޭރު ވަނީ ފިޔަވަޅު އަޅައިފަ އެވެ. ނަމަވެސް، އެމެރިކާ އާއެކު މަޝްވަރާތައް ކުރަން ފެށި ފަހުން ޑެލްސީ ވަނީ، ލޮޕޭޒް މަގާމުން ވަކި ކޮށްފަ އެވެ. 

ވެނެޒުއެލާގެ މަސްރަހަށް އަންނަމުންދާ ބަދަލުތަކާ ގުޅިގެން، އެ ޤައުމުގައި ހުންނަ އެމެރިކާގެ އެމްބަސީ ހަތް އަހަރަށް ފަހު އަލުން ހުޅުވައި، މިދިޔަ ހޯމަ ދުވަހުން ފެށިގެން ޚިދުމަތް ދޭން ފަށާފައިވާ ކަމަށް އެމެރިކާގެ ސްޓޭޓް ޑިޕާޓްމަންޓް އިން ވަނީ ބުނެފަ އެވެ.