ވަގުތީ ރައީސް ޑެލްސީ އަށް ވަފާތެރިވުމަށް، ވެނެޒުއެލާގެ ސިފައިންނާއި ފުލުހުން ހުވާ ކޮށްްފި

ވެނެޒުއެލާގެ ވަގުތީ ރައީސް ޑެލްސީ ރޮޑްރިގޭޒް އަށް ވަފާތެރިވުމަށް، އެ ޤައުމުގެ ސިފައިންނާއި ފުލުހުން ހުވާ ކޮށްފި އެވެ. 

ވެނެޒުއެލާގެ ވަގުތީ ރައީސް ކަމުގެ މަގާމަށް ޑެލްސީ ވަޑައިގެންނެވީ، އެެމެރިކާ އިން ހިންގި އޮޕަރޭޝަނެއްގައި އެ ޤައުމުގެ ރައީސް ނިކޮލަސް މަދޫރޯ ހައްޔަރު ކުރުމާ އެކު އެވެ. އޭގެ ކުރިން ޑެލްސީ ހުންނެވީ މަދޫރޯގެ ނައިބު ރައީސްގެ މަގާމުގަ އެވެ. 

ވަގުތީ ރައީސް ކަަމަށް ވަޑައިގެންނެވުމަށް ފަހު، ޑެލްސީ ގެންދަވަނީ އޭނާގެ ސަރުކާރަށް އާންމުންގެ އިތުބާރާއި ތާއީދު ހޯއްދެވުމަށް މަސައްކަތް ކުރައްވަމުންނެވެ. ނަމަވެސް، މަދޫރޯ އަށް ތާއީދު ކުރާ ފަރާތްތަކުގެ ރުހުން ހޯދުމާ އެކު، އެމެރިކާގެ ރައީސް ޑޮނަލްޑް ޓްރަމްޕްގެ ރުހުން ހޯއްދެވުމަށް ވެސް އޭނާ ގެންދަވަނީ މަސައްކަތް ކުރައްވަމުންނެވެ. 

ވެނެޒުއެލާގެ ޑިފެންސް މިނިސްޓަރު ވްލަޑިމިރް ޕަޑްރީނޯ ވިދާޅުވީ، އަސްކަރިއްޔާ އިން ހުށަހަޅާފައި ވަނީ ފުރިހަމަ އަށް ވަފާތެރިވުމަށް ކަމަށެވެ. ފުލުހުންގެ ފަރާތުން ވަފާތެރިކަން ހުށަހަޅުއްވާފައި ވަނީ ވެނެޒުއެލާގެ އިންޓީރިއާ މިނިސްޓަރު ޑިއޮސްޑާޑޯ ކަބެލޯ އެވެ. އޭނާ އަކީ ސަރުކާރުގެ ނުފޫޒު ގަދަ ވަޒީރެކެވެ. 3000 އަށް ވުރެ ގިނަ ސިފައިންނާއި ފުލުހުން ވަނީ، ވެނެޒުއެލާގެ ފުރަތަމަ އަންހެން ލީޑަރުގެ ކުރިފުޅުމަތީގައި މާޗް ކޮށްފަ އެވެ. 

ޕަޑްރީނޯ ވިދާޅުވީ، މިއީ ވެނެޒުއެލާގެ ވެރިކަމުގައި މިހާތަނަށް ދެކިފައި ނުވާ ފަދަ ވަގުތެއް ކަމަށެވެ. މަދޫރޯގެ ސަރުކާރުގައި ވެސް ބާރު ގަދަ ވަޒީރެެއްގެ ގޮތުގައި ހުންނެވި ކަބެލޯ ވިދާޅުވީ، ޑެލްސީ އަށް ތާއީދު ކުރުމަކީ ކޮންމެހެން ވެސް މުހިންމު ކަމެއް ކަމަށެވެ. ވެނެޒުއެލާގެ ހަމަޖެހުމާއި، ސަރުކާރުގެ ދެމި އޮތުން ގުޅިފައި ވަނީ ޑެލްސީގެ ވެރިކަން ދިފާއު ކުރުމާ ކަމަށް ވެސް އޭނާ ވިދާޅުވި އެވެ. 

ޖަނަވަރީ މަހުގެ ކުރީ ކޮޅު އެމެރިކާގެ ސިފައިން ހިންގި ޚާއްސަ އޮޕަރޭޝަނެއްގައި ވަނީ މަދޫރޯ އާއި އޭނާގެ އަނބިކަނބަލުން ހައްޔަރު ކޮށްގެން ގެންގޮސްފަ އެވެ. ދުނިޔެ އަށް ބޮޑު ހައިރާން ކަމެއް ލިބުނު އެ ހާދިސާ އަށް ފަހު، ޓްރަމްޕް ވިދާޅުވެފައި ވަނީ ވެނެޒުއެލާގެ ކަންކަން ބަލަހައްޓާނީ އެމެރިކާ އިން ކަމަށެވެ. ވެނެޒުއެލާގެ ވަގުތީ ރައީސް އަކީ ޑެލްސީ ކަމަށް އެ ޤައުމުގެ ސުޕްރީމް ކޯޓުން ކަނޑައެޅުމާ އެކު، އެމެރިކާ އިން ބޭނުންވާ ގޮތަށް ކަންކަން ކުރިއަށް ގެންދާހާ ހިނދަކު އެ މަގާމުގައި އޭނާ ބަހައްޓަން ތާއީދު ކުރައްވާނެ ކަމަށް ޓްރަމްޕް ވިދާޅުވެފައިވެ އެވެ.

ޑެލްސީ އަންނަނީ އެމެރިކާގެ ސަރުކާރާއި، ޓްރަމްޕް އާ އެކު ވެސް ވާހަކަ ދައްކަވައި މަޝްވަރާ ކުރައްވަމުންނެވެ. އަވަސް މުސްތަޤުބަލެއްގައި ޑެލްސީ އެމެރިކާ އަށް ވަޑައިގަންނަވާނެ ކަމަށް ވަނީ ރިޕޯޓު ކޮށްފަ އެވެ.