ގާނޫނަށް ގެންނަ އިސްލާހުގެ ސަބަބުން ދެން ވާނެ ގޮތެއް ނޭނގޭ، ނޫނެކޭ ބުނަން ޖެހެނީ މި އިސްލާހުން އޮޅުންބޮޅުން އަރާތީ: ގާނޫނީ ވަކީލު މަހުފޫޒު
31 މާރިޗު 2026 | އަންގާރަ 08:28ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށް ބޭއްވުމަށް ގާނޫނުއަސާސީއަށް ހުށަހަޅާފައިވާ އިސްލާހަކީ އަވަސްއަރުވާލައިގެން ތައްޔާރުކޮށްފައިވާ އުނި ބިލެއް ކަމަށް ގާނޫނީ ވަކީލު މަހުފޫޒު ސައީދު ވިދާޅުވެއްޖެ. މި ބަދަލުގެ ސަބަބުން ގާނޫނީ ގޮތުން އޮޅުންބޮޅުންތަކެއް އަރާނެތީ އާއި، އިސްތިސްނާ ހާލަތްތަކުގައި އަމަލުކުރާނެ ގޮތުގެ ތަފްސީލު ނެތުމުން މިކަމަށް ރައްޔިތުން "ނޫނެކޭ" ބުނަންޖެހޭ ކަމަށް އޭނާ ފާހަގަކުރެއްވި. އަދި ރެފަރެންޑަމްގައި ކުރާ ސުވާލު އޮތް ގޮތުން ރައްޔިތުންނަށް ކަންކަން އޮޅުމުގެ ފުރުސަތު އޮތްކަމަށްވެސް މަހުފޫޒު ވިދާޅުވި.
ގާނޫނީ ވަކީލު މަހުފޫޒް ސައީދު | ރާއްޖެ އެމްވީ
ދެ އިންތިޚާބު އެއްކުރުމުގެ ބިލު ރައީސް ޑރ. މުހައްމަދު މުއިއްޒު ތަސްދީގު ކުރައްވައިފި ނަމަ ދެން ވާނެ ގޮތް ސާފު ނުވާ ކަމަށާ އިސްލާހެއް ހުށަހަޅަނީ ކަމެއް ރަނގަޅު ކުރަން ކަމަށް ވާއިރު އޭގެ ސަބަބުން އޮޅުންބޮޅުން އަރާނަމަ އެއީ އެކަމަށް ފުރުސަތު ދީގެންވާނެ ކަމަށް ނޫން ކަމަށާ އެހެން ކަމުން ރެފަރެންޑަމްގައި ނޫނެކޭ ބުނަން ޖެހޭ ކަމަށް ގާނޫނީ ވަކީލު މަހުފޫޒު ސައީދު ވިދާޅުވެއްޖެ އެވެ.
ރާއްޖެޓީވީ ގެ ނޫނެކޭ ޕްރޮގްރާމްގައި ވާހަކަދައްކަވަމުން މަހުފޫޒް ވިދާޅުވީ ދެ އިންތިޚާބު އެއްކުރުމަށް ރައްޔިތުންގެ މަޖިލީހުން ފާސް ކޮށްފައިވާ ބިލަކީ އުނި ބިލެއް ކަމަށެވެ. އެއީ އަވަސް އަރުވާލައިގެން މަސައްކަތް ކޮށްފައިވާ ބިލެއް ކަމަށާ އެ ބިލު ތަސްދީގު ވުމަށްފަހު ކަން ހިނގައިދާނެ ގޮތް އެއްވެސް މީހަކަށް ނޭނގޭ ކަމަށެވެ.
މި ބިލު ގެންނަން ޖެހޭ ސަބަބު ކަމަށް މި ބަދަލު ގެންނަން ޖެހޭ ސަބަބު ކަމަށް އެ ވިދާޅުވާ ސަބަބުތަކުގެ މައްޗަށް ހުއްޖަތެއް ނުދެއްކެވޭ. އެ ދައްކަވާ ހުއްޖަތްތަކާ މެދުގައި ސުވާލު އުފެދޭ އެތައް ސުވާލުތަކެއް އެބަހުރި. ގާނޫނު އަސާސީގައި ސީދާ ތާރީޚެއް މި ބަޔާން ކުރަނީ. 1 ޑިސެމްބަރުގައި މިކަން ވާޏް ޖެހޭނެ އޭ. ނުވެއްޖެޔާ ކިހިނެއްތޯ ވަނީ. ދެ އިންތިޚާބު އެއްކޮށް ނުބޭއްވިއްޖެޔާ ކިހިނެއްތޯ ވަނީ. އެ އިސްތިސްނާ ހާލަތްތަކަށް ކޮން ހައްލެއްތޯ، ކޮން ފަރުވާ އެއް ތޯ އޮތީ. މިއިން އެއްވެސް ތަފްސީލެއް ނުލިބޭ.ގާނޫނީ ވަކީލު މަހުފޫޒް ސައީދު
މަހުފޫޒް ވިދާޅުވީ ގާނޫނަކަށް ހުށަހެޅޭ އިސްލާހަކުން ނުވަތަ ގާނޫނު އަސާސީ އަށް ހުށެހެޅޭ އިސްލާހެއްގެ ސަބަބުން ވާން ޖެހޭނެ ކަމަކީ ހިނގަމުން އައި ކަމެއް ރަނގަޅު ވުން ކަމަށެވެ. ނުވަތަ ކަމަކަށް ކުރިއެރުމެއް އައުން ކަމަށެވެ. ނަމަވެސް އިސްލާހެއްގެ ސަބަބުން އޮޅުންބޮޅުން އަންނަ ކަމުގައި ވާނަމަ އެއީ އެކަމަށް ފުރުސަތު ދީގެންވާނެ ކަމެއް ނޫން ކަމަށް އޭނާ ވިދާޅުވި އެވެ.
މަހުފޫޒު ވިދާޅުވީ ވޯޓު ލާ ދުވަހު ރައްޔިތުންނާ ކުރެވޭ ސުވާލަކީ އެ ބިލު ތަސްދީގު ކުރަން ފެނޭތޯ ރައްޔިތުންނާ ކުރެވޭ ސުވާލު ކަމަށެވެ. ނަމަވެސް ސުވާލުގެ އިބާރާތަށް ބަލާއިރު އެ ސުވާލު އެ ކުރެއްވެނީ މާދުރުން ކަމަށާ ސުވާލު އިބާރާތް ކުރެވޭ ގޮތުން ސީދާ އިބާރާތުގެ ތެރެއިން ފެންނަން ގާނޫނު އަސާސީ އަށް އަންނަން މިއުޅޭ ބަދަލުތަކަކީ ކޮބައިކަން ފެންނަން ވާނެ ކަމަށެވެ.
އެހެންކަމުން މި ހުރިހާ ކަމަކުން ސިފަވަނީ ރައްޔިތުންނަށް އޮޅުވާލަން އުޅޭ ކަން ކަމަށާ ރެފަރެންޑަމްގައި ނޫނެކޭ ބުނަން ޖެހެނީ އެހެންވެ ކަމަށް ވެސް މަހުފޫޒު ވިދާޅުވި އެވެ.
