ދެ އިންތިހާބު އެއްކޮށްލުމަށް ގާނޫނުއަސާސީ އަށް ގެނެވުނު ބަދަލުގެ ބިލަކީ އުނި ކަންކަން ގިނަ ބިލެއް: ރާއްޖޭގެ ފުރަތަމަ ޕްރޮސެކިއުޓަރ ޖެނެރަލް މުއިއްޒު
31 މާރިޗު 2026 | އަންގާރަ 04:46މި ބިލުގެ ސަބަބުން މަޖިލިސް މެމްބަރުންގެ ދައުރާއި އެ މެމްބަރުން ވަކިކުރުމުގެ އުސޫލުތަކާ މެދު ސުވާލު އުފެދޭތީ، މިކަންކަމަށް ސާފު ޖަވާބެއް ލިބިގެން ނޫނީ ފެންނަ ނުފެންނަ ވޯޓުގައި ގޮތެއް ނިންމަން ދަތިވާނެކަމަށް އޭނާ ފާހަގަކުރެއްވި. އެހެންކަމުން، ގާނޫނުއަސާސީއަށް ބަދަލު ގެނައުމުގައި ބަލަންޖެހޭ މުހިންމު ކަންކަމަށް މި ބިލުގައި ފުރިހަމައަށް ސަމާލުކަން ދީފައި ނުވާކަމަށް މުއިއްޒު ވިދާޅުވި.
ރާއްޖެޓީވީ އިން ގެނެސްދޭ ނޫނެކޭ ކެމްޕެއިން ޕްރޮގްރާމްގައި ދިވެހިރާއްޖޭގެ ފުރަތަމަ ޕްރޮސެކިއުޓަރ ޖެނެރަލް އަހުމަދު މުއިއްޒު ވާހަކަދައްކަވަނީ | ރާއްޖެ އެމްވީ
ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލުމަށް ގާނޫނުއަސާސީއަށް ގެނެވުނު 8 ވަނަ އިސްލާހުގެ ބިލަކީ އުނިކަންތައް ގިނަ ބިލެއް ކަމަށް ދިވެހިރާއްޖޭގެ ފުރަތަމަ ޕްރޮސެކިއުޓަރ ޖެނެރަލް އަހުމަދު މުއިއްޒު ވިދާޅުވެއްޖެ އެވެ.
ރާއްޖެޓީވީ އިން ގެނެސްދޭ ނޫނެކޭ ކެމްޕެއިން ޕްރޮގްރާމްގައި ވާހަކަދައްކަވަމުން މިހާރު މިއޮތް ގާނޫނުއަސާސީ އެކުލަވާލުމަށް އުފެއްދެވި ހާއްސަ މަޖިލީހުގެ މެމްބަރުކަން ވެސް ކުރެއްވި މުއިއްޒު ވިދާޅުވީ އަންނަ ހޮނިހިރު ދުވަހު ނަގާ ފެންނަ ނުފެންނަ ވޯޓުގައި ދެ އިންތިހާބު އެއްކޮށްލުމަށް ވޯޓު ދޭން ކޭރޭނީ މި ބިލާ ގުޅިގެން އުފެދިފައިވާ ގިނަ ސުވާލުތަކަކަށް ޖަވާބު ލިބިގެންކަމަށެވެ.
މުއިއްޒު ފާހަގަކުރެއްވި ގޮތުގައި ރައްޔިތުންގެ މަޖިލީހުގެ މެމްބަރުން ވަކިކުރުމުގެ އުސޫލު ގާނޫނުއަސާސީ އިން ހަމަޖެހޭނެ ގޮތްފަދަ އަސާސީ ކަންކަން ސާފުވާން ޖެހޭނެ އެވެ. އަދި ރައީސުލްޖުމްހޫރިއްޔާ އަދި މަޖިލިސް މެމްބަރުން ހޮވުމާ ގުޅޭގޮތުން ގިނަ ވާހަކަތަކެއް ދެކެވެމުންދާ މި ދަނޑިވަޅެއްގައި ގިނަ ވާހަކަތަކެއް ދައްކާފައި ވަކި ތަންކޮޅަކަށް ވޯޓު ދޭން އުނދަގޫކަމަށް މުއިއްޒު ވިދާޅުވި އެވެ.
މީގެ އިތުރުން މުއިއްޒު ވިދާޅުވީ ގާނޫނުއަސާސީއަށް ގެނެވުނު މި އިސްލާހު ޑްރާފްޓް ކުރެވިފައިވާ ގޮތުން މީގައި އުނިކަންތައްތަކެއް އެބަހުރި ކަމަށެވެ. އެގޮތުން މި ބިލުގައި ގާނޫނުއަސާސީގެ ނައްސަށް ބަދަލު ނުގެނެސް މަޖިލީހުގެ ދައުރަކީ 5 އަހަރުކަމަށް ބުނާކަމުގައި މުއިއްޒު ވިދާޅުވި އެވެ. އެހެން ނަމަވެސް ދެ އިންތިހާބު އެއްކޮށްލާ ގޮތަށް ފެންނަ ނުފެންނަ ވޯޓުގެ ނަތީޖާ ނިކުމެއްޖެނަމަ މިހާރު މަޖިލީހުގައި ތިއްބެވި މެމްބަރުންގެ ދައުރު ކުރުވާކަމަށް މުއިއްޒު ވިދާޅުވި އެވެ.
ގިނަ އިސްލާހުތަކެއް އަންނަ ވާހަކަ ދައްކާފަ ހަމެކަނި މި ތަންކޮޅަށް ވޯޓު ދޭން އަޅުގަނޑަށް އުނދަގޫ. އެެހެން ނޫނަސް މި އިސްލާހު ޑްރާފްޓް ކުރެވިފަވާގޮތުން ނަވަތަ ލިޔެވިފަވާގޮތުން، މީގަ އުނި ކަންތައްތަކެއް ވެސް އެބަ ހުރި. ގާނޫނުއަސާސީގެ ނައްސަށް ބަދަލު ނުގެނެސް އެބަބުނޭ، މިހާރު ދައުރު ވަކި ދިގެއް ނުވެޔޭ ހަމަ ފަސް އަހަރު، ކުރީގަ އޮންނަނީ ހަމަ ހުވާ ކުރާ ދުވަހުން ފެށިގެން ފަސް އަހަރު. މިހާރު މި ހަމަޖެހުނީ ޑިސެމްބަރުން ފެށިގެން ފަސް އަހަރު. އެހެން ނަމަވެސް މިހާރު އިންތިހާބުވެފަ ތިބި މީހުންގެ ދައުރު އެބަ ކުރުވޭ. އެކަން ނެތް މި އިސްލާހުގަ އަޅުގަނޑު ބަލާލި އިރަކު ގާނޫނުއަސާސީގެ ނައްސަށް އިސްލާހު ގެންނަ ގޮތަކަށް އެ ވާހަކަ އެއް ގެނެވިފަ އެއް. ބިލުގެ 4 ވަނަ މާއްދާގަ އެބަ އޮވޭ އެގޮތަކަށް.ދިވެހިރާއްޖޭގެ ފުރަތަމަ ޕްރޮސެކިއުޓަރ ޖެނެރަލް އަހުމަދު މުއިއްޒު
2020 ވަނަ އަހަރު ލޯކަލް ކައުންސިލްގެ މައްސަލައިގައި ރައްޔިތުންގެ މަޖިލީހުން ދެއްވި އިސްތިޝާރީ ލަފައެއްގައި ގާނޫނުއަސާސީ އަށް ބަދަލެއް ގެނަން ހުށަހަޅާއިރު އެ ހުށަހަޅާ ފަރާތަކުން އެ ބިލު ޑްރާފްޓް ކުރާއިރު ވަރަށް ބައިވަރު ކަންކަމަށް ބަލަންޖެހޭނެ ކަމަށް ބުނެފައިވާކަމަށް މުއިއްޒު ވިދާޅުވި އެވެ. ނަމަވެސް ގާނޫނުއަސާސީ އަށް 8 ވަނަ އިސްލާހު ގެނެވުނު ބިލުގައި އެކަހަލަ ކަންކަމަށް ސަމާލުކަން ދީފައި ނުވާކަމަށް މުއިއްޒު ފާހަގަކުރެއްވި އެވެ.
އެހެންކަމުން މި ބިލުގައި ވަރަށް ގިނަ އުނިކަންކަން އެބަހުރިކަމަށާއި މި ސުވާލުތަކަށް ޖަވާބު ލިބިގެން ނޫނީ ދެ އިްނތިހާބު އެއްކޮށްލުމަށް ވޯޓު ދޭން ނުކޭރޭނެ ކަމަށް މުއިއްޒު ވަނީ ވިދާޅުވެފަ އެވެ.
