އިންތިހާބުތައް ބޯމަތިވެފަ ވަނިކޮށް، ފިނިޝިން ޑިސްކައުންޓުގެ ގޮތުގަ ގަވާއިދުުން ކުލި ދައްކަމުންދާ ހިޔާ ފްލެޓުތަކުގެ ދެ އަހަރުގެ ކުލި ކަނޑާލައިފި
ހިޔާ ފްލެޓުތަކުގެ ފިނިޝިންއަށް ހޭދަވި ދެ ލައްކަ ރުފިޔާގެ ބާކީބައި ކުލިން އުނިކޮށްދިނުމަށް ސަރުކާރުން ނިންމުމާ ގުޅިގެން، ގަވާއިދުން ކުލި ދައްކާ ފަރާތްތަކުން ކުރިއަށް އޮތް ދެ އަހަރާއި އެއް މަސްދުވަހު ކުލި ދައްކާކަށް ނުޖެހޭނެ. މި ބަދަލާއެކު ފްލެޓުގެ ވެރިން ދައްކަން ޖެހޭނީ ހަމައެކަނި މެއިންޓެނަންސް ފީގެ ގޮތުގައި ކަނޑައަޅާފައިވާ 1،000 ރުފިޔާ ކަމަށް އެޗްޑީސީން ވަނީ އަންގާފަ. އިންތިހާބުތައް އެއްކޮށްލުމާ ގުޅޭ ރިފަރެންޑަމް ވޯޓާ ދިމާކޮށް މި ލުއި ދިނުމަކީ ސިޔާސީ މަގުސަދެއްގައި ކުރި ކަމެއް ކަމަށް ބުނެ ގިނަ ބަޔަކު ދަނީ ފާޑުކިޔަމުން.
ހިޔާ ފްލެޓްތައް ހުންނަ ސަރަހައްދު | ޕީއެސްއެމް
ލޯކަލް ކައުންސިލް އިންތިހާބާއި ރިޔާސީ އަދި ރައްޔިތުންގެ މަޖިލީހުގެ އިންތިހާބު އެއްކޮށްލުމާ ގުޅޭ ގޮތުން ނަގާ ރިފަރެންޑަމް ވޯޓަށް ހަތަރު ދުވަހަށް ވެފައި ވަނިކޮށް، ހިޔާ ފްލެޓުތަކަށް ގަވާއިދުން ކުލި ދައްކަމުންދާ ފަރާތްތައް ކުރިއަށް އޮތް ދެ އަހަރު ހިޔާ ފްލެޓުތަކަށް ކުލި ދައްކަން ނުޖެހޭ ގޮތަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހަދައިފި އެވެ.
އެޗްޑީސީ އިން މިކަން ކޮށްފައި ވަނީ ރައީސުލްޖުމްހޫރިއްޔާ ޑޮކްޓަރ މުހައްމަދު މުއިއްޒުގެ ރިޔާސީ ވައުދެއް ކަމުގައިވާ، ހިޔާ ފްލެޓުތަކުގެ ފިނިޝިން އަށް ހަރަދު ކުރި ފައިސާގެ ބަދަލުގެ ގޮތުގައި ދޭން ބުނި ދެ ލައްކަ ރުފިޔާގެ ބާކީ ދައްކަން ނުޖެހޭ ގޮތަށް ހަދައިގެންނެވެ. އެ ކުންފުނިން ވަނީ މި ބަދަލު ގެންނާނެ ކަން ފްލެޓުތަކުގެ ވެރިންނަށް ސިޓީގެ ޒަރިއްޔާ އިން އަންގާފަ އެވެ.
އެ ސިޓީގައި ވާގޮތުން، ފިނިޝިން ޑިސްކައުންޓުގެ ގޮތުގައި ނުލިބިވާ އަދަދު ކުލިން މާފުކޮށްދޭއިރު، ކުލީގެ ގޮތުގައި ދައްކަން ޖެހި ނުދައްކައިވާ ފައިސާ އެއް ހުރި ނަމަ، އެ އަދަދު ޑިސްކައުންޓުން އުނިކުރެ އެވެ. ސިޓީގައި ބުނެފައިވަނީ އެއްވެސް ފައިސާ އެއް ދައްކަން ނުޖެހޭ ނަމަ، ޑިސްކައުންޓަށްވާ ބައި އުނިކުރަނީ މަހަކު 5300(ފަސް ހާސް ތިން ސަތޭކަ) ރުފިޔާގެ ރޭޓުންނެވެ.
އެޗްޑީސީ އިން ބުނާގޮތުން ފިނިޝިން ޑިސްކައުންޓުގެ ގޮތުގައި ނުދެވިވާ އަދަދަކީ 135،714.35 (އެއް ލައްކަ ތިރީސް ފަސް ހާސް ހަތް ސަތޭކަ ސާދަ ރުފިޔާ ތިރީސް ފަސް ލާރި) އެވެ. މިހެން ކަމުން ގަވާއިދުން ކުލި ދައްކަމުން އަންނަ މީހުން ކުރިއަށް އޮތް 25 މަސް، އެއީ ދެ އަހަރާއި އެއް މަސް ވަންދެން ކުލި ދައްކާކަށް ނުޖެހެ އެވެ. ނަމަވެސް މެއިންޓެނަންސް ފީގެ ގޮތުގައި ކޮންމެ މަހަކު އެއް ހާސް ރުފިޔާ ދައްކަން ޖެހޭނެ އެވެ.
އެޗްޑީސީ އިން ފްލެޓުތަކުގެ ވެރިންނަށް ފޮނުވި ސިޓީތަކުގައި ބުނެފައި ވަނީ މި ބަދަލު ގެންނަނީ ފިނިޝިން އަށް ކުރި ހަރަދު އަނބުރާ ދިނުމާ ގުޅޭ ވައުދު އެންމެ ފުރިހަމަ އަށް ހާސިލުކުރުމުގެ ގޮތުން ކަމަށެވެ.
ރިފަރެންޑަމް ވޯޓަށް ހަތަރު ދުވަހަށް ވެފައި ވަނިކޮށް އަވަސް އަރުވާލައިގެން އެންމެ ފަހު ވަގުތު މިކަން ކުރަން ނިންމީ ހުޅުމާލޭގެ ބައެއް ދާއިރާތައް ޕީއެންސީ އަށް އުނދަގޫ ވުމާއި، ރިފަރެންޑަމް ވޯޓު ކާމިޔާބުކުރަން ދަތި ވާނެ ކަން ސަރުކާރަށް ޔަގީންވާތީ ކަމަށް ގިނަ ފަރާތްތަކަކުން ދަނީ ބުނަމުންނެވެ.
