ފެންނަ ނުފެންނަ ވޯޓު ކާމިޔާބުކޮށް ރައްޔިތުން ސަލާން ޖަހަން މުލިއާގެއަށް ދާންޖެހޭ ހިސާބަށް ކަންކަން ދާނެ: އާޒިމް
31 މާރިޗު 2026 | އަންގާރަ 02:56ސަރުކާރުން ދޭ ވަގުތީ އިނާޔަތްތަކަށް ހެއްލި، ރައްޔިތުންގެ މުސްތަޤުބަލާއި ވޯޓުލުމުގެ ބާރު ވިއްކާނުލުމަށް މާލެ ސިޓީގެ މޭޔަރު އާދަމް އާޒިމް އިލްތިމާސްކުރައްވައިފި. އާޒިމް ވިދާޅުވީ އިންތިޚާބުތައް އެކީގައި ބާއްވަން އުޅެނީ ރައްޔިތުންގެ ބާރުތައް އަތުލައި، ކަންކަމުގައި ސަލާންޖަހަންޖެހޭ ހާލަތަށް ރައްޔިތުން ގެންދިއުމަށް ކަމަށް. އެހެންކަމުން، ކުރިއަށް އޮތް ފެންނަ ނުފެންނަ ވޯޓުގައި "ނޫނެކޭ" ބުނެ، ޚުދުމުޚުތާރު ވެރިކަމަކަށް ފުރުސަތު ނުދިނުމަށް އޭނާ ގޮވާލެއްވި.
މާލެ ސިޓީގެ މޭޔަރު އާދަމް އާޒިމް. | ރާއްޖެ އެމްވީ
ފެންނަ ނުފެންނަ ވޯޓު ކާމިޔާބުކޮށް، ރައްޔިތުން ކަންކަމުގައި ސަލާން ޖަހަން މުލިއާގެއަށް ދާންޖެހޭ ހިސާބަށް މި ސަރުކާރުން ކަންކަން ގެންދާނެ ކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެ އެވެ.
އާޒިމް މިހެން ވިދާޅުވީ ހެންވޭރު ދެކުނު ދާއިރާގެ "ހޭވައްލާ ތައްޔާރު" ކެންޕެއިން ޖަގަހަ ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުންނެވެ.
މި ރަސްމިއްޔާތުގައި ވާހަކަދައްކަވަމުން އާޒިމް ވިދާޅުވީ، މާލޭގެ ގިނަ އަދަދެއްގެ ގެތަކަށް ޒިޔާރަތްކޮށް ރައްޔިތުންނާ ބައްދަލުކުރެވިފައިވާ އިރު، މިހާތަނަށް ކުރިއަށް އޮތް ފެންނަ ނުފެންނަ ވޯޓުގައި "އާއެކޭ" ބުނާނެ އެކަކާވެސް ދިމާނުވާ ކަމަށެވެ. ނަމަވެސް ވޯޓުލާ ދުވަހާ ހަމައަށް އޮތް ތިން ދުވަހުގެ ތެރޭގައި ސަރުކާރުން ނުފޫޒު ފޯރުވުމުގެ ގިނަ ކަންތައްތަކެއް ކުރަމުންދާނެ ކަމަށް އޭނާ ފާހަގަކުރެއްވި އެވެ. އެގޮތުން އެކި ތަންތަނުން ޑިސްކައުންޓު ދިނުމާއި، ދައްކަންޖެހޭ ފައިސާ މާފުކޮށްދިނުން ފަދަ ވަގުތީ ކަންކަން ކުރަމުންދާ ކަމަށާއި، އެފަދަ ވަގުތީ ކަމަކަށްޓަކައި ރައްޔިތުންގެ މުސްތަޤުބަލު ވިއްކާނުލުމަށް އާޒިމް އިލްތިމާސްކުރެއްވި އެވެ.
އާޒިމް ވިދާޅުވީ މިއަދު ދެ މަސްދުވަހުގެ ނުވަތަ ދެ އަހަރުގެ ކުލި މާފުކޮށްދީ، ބޭސްކުރަން އިންޑިއާއަށް ދާން ޓިކެޓެއް ދިނުމަކީ އެއީ ރަނގަޅު ސަރުކާރެއް ނުވަތަ ރަނގަޅު ވެރިއަކު ކަމުގެ ހެއްކެއް ނޫން ކަމަށެވެ. ރަނގަޅު ސަރުކާރަކީ ރައްޔިތުން، މީހުންގެ ކައިރީގައި ސަލާން ނުޖަހައި، އަމިއްލަ ފައިމައްޗަށް ތެދުވެ ތާހިރު ދިރިއުޅުމެއް އުޅެވޭނެ ގޮތަށް ކަންކަން ބައްޓަންކޮށްދޭ ބައެއް ކަމަށް އޭނާ ވިދާޅުވި އެވެ. އެމްޑީޕީން މިހާތަނަށް ކޮށްފައިވާ މަސައްކަތްތަކަކީ ބޭސްފަރުވާއަށާއި މަތީ ތައުލީމަށް ސަލާންޖަހަން ނުޖެހޭނެ ފަދަ ސިޔާސަތުތަކެއް ގާއިމުކުރުން ކަމަށްވެސް އާޒިމް ފާހަގަކުރެއްވިއެވެ.
ދެން އެ މީހުން ހުޅުވާނީ އޮފީހެއް މުލިއާގޭގައި. ހުޅުވާފައި ބުނާނީ، މި ގެއަށް އައީމަ ޓިކެޓަކަށް 250 ޑޮލަރު ދޭނަމޭ. އެއީ ކުރަން އުޅޭ ކަމަކީ. ދެން އެ މީހުންގެ ކައިރިން ރައްޔިތުން ދާންޖެހޭނީ. އޭތި ގެންނަން އެ އުޅެނީ މިހާރު. އެހެންވީމާ، ރައްޔިތުންގެ ކައިރިއަށް ނުގޮސް ރައްޔިތުން އެ މީހުން ކައިރިއަށް ގެންދިއުމަށްޓަކައި ކުރަން އުޅޭ މަސައްކަތެއް އެއީ. އެހެންވީމާ، އަޅުގަނޑު މި ބުނަނީ، ރައްޔިތުންނަށް ލިބިފައިވާ ބާރެކޭ މިއީ، ސަރުކާރުތަކުން ގޯސްކޮށް ކަންތައް ކުރަންޏާ ވޯޓުލައިގެން ބަލިކޮށްލާ އެމީހުން ގޯސްއޭ ބުނަން. އެއީ، ލިބިފައިވާ ވަރަށް ބޮޑު ބާރެކޭ. ތިބޭފުޅުންނަށް ލިބިފައިވާ މިއޮތް ވަރުގަދަ ބާރު ތިބޭފުޅުންގެ އަތުން ވޯޓަށް ލައިގެން ގެއްލުވާ ނުލައްޗޭ. އެކަން ނުކުރައްވައްޗޭ ކޮންމެހެންވެސް.މާލެ ސިޓީގެ މޭޔަރު އާދަމް އާޒިމް
މީގެ އިތުރުން، ވޯޓުލުމުގެ ބާރަކީ ރައްޔިތުން ވަރަށް ބޮޑު މަސައްކަތުން ހޯދާފައިވާ ބާރެއް ކަމަށާއި، އެމްޑީޕީން އެ ބާރު ގާނޫނުއަސާސީގެ ތެރެއިން ރައްޔިތުންނަށް ހޯދައިދިނީ ވަރަށް ބުރަ މަސައްކަތުން ކަމަށް އާޒިމް ވިދާޅުވި އެވެ. ޚުދުމުޚުތާރު ވެރިން އަބަދުވެސް މަސައްކަތް ކުރާނީ ރައްޔިތުންގެ އަތުން އެ ބާރު އަތުލައި، ރައްޔިތުން ބިކަކޮށް ސަލާންޖަހާ ހާލަތަށް ގެންދަން ކަމަށް އޭނާ ފާހަގަކުރެއްވި އެވެ.
އެހެންކަމުން، އޭޕްރީލް މަހުގެ 4 ވަނަ ދުވަހު ބާއްވާ ފެންނަ ނުފެންނަ ވޯޓުގައި ހުރިހާ ރައްޔިތުން ނުކުމެ "ނޫނެކޭ" ބުނުމަށް އާޒިމް ގޮވާލެއްވިއެވެ. އަދި މި އިންތިޚާބު ބޮޑުތަނުން ކާމިޔާބުކޮށް، ރައްޔިތުންނަށް ދިމާވެފައިވާ ނިކަމެތިކަމުން ސަލާމަތްކޮށްދޭނެ ކަމުގެ ޔަގީންކަން މާލެ ސިޓީގެ މޭޔަރު ވަނީ ދެއްވާފަ އެވެ.
