މިދަނީ ރަސްކަމަކާ ދިމާލަށް، އެކަން ބޭނުންވާނަމަ ފެންނަ ނުފެންނަ ވޯޓުގައި އާނއޭކޭ ބުނަންވީ: އަސްލަމް
ރިޔާސީ އިންތިޚާބާއި މަޖިލިސް އިންތިޚާބު އެއްކޮށް ބޭއްވުމަކީ މަޖިލިސް މެންބަރުން ރައީސުލްޖުމްހޫރިއްޔާގެ ނުފޫޒުގެ ދަށަށް ގޮސް، ރައްޔިތުން ތަމްސީލުކުރުން ގެއްލިގެންދާނެ ކަމެއް ކަމަށް ކުރީގެ މިނިސްޓަރު މުހައްމަދު އަސްލަމް ވިދާޅުވެއްޖެ. މިކަމުގައި ސަރުކާރުގެ ނުބައި ނިޔަތެއް އޮތްކަން ފާހަގަކުރައްވައި، މިއީ ގައުމުގެ މުސްތަގުބަލަށްޓަކައި "ނޫނެކޭ" ބުނަންޖެހޭ ކަމެއް ކަމަށާއި، މި ބަދަލާއެކު އިންތިޚާބީ ނިޒާމު އޮޅުވާލައި ގައުމު އަޅުވެތިކަމަކާ ދިމާއަށް ދަތުރުކޮށްފާނެ ކަމުގެ ބިރު އެބައޮތް ކަމަށްވެސް އޭނާ ވިދާޅުވި.
ކުރީގެ ހައުސިންގ މިނިސްޓަރ މުހައްމަދު އަސްލަމް. | ރާއްޖެ އެމްވީ
މިހާރު ސަރުކާރުން ކުރަމުން އަންނަ ކަންކަން ރަސްކަމަކާ ދިމާލަށް ދާ ކަމަށާއި، އެކަން ބޭނުންނަމަ ފެންނަ ނުފެންނަ ވޯޓުގައި އާނއެކޭ ބުނަންވީ ކަމަށް ކުރީގެ ހައުސިންގ މިނިސްޓަރ މުހައްމަދު އަސްލަމް ވިދާޅުވެއްޖެ އެވެ.
ރާއްޖެޓީވީގެ ނޫނެކޭ ކެމްޕޭން ޕްރޮގްރާމުގައި ވާހަކަ ދައްކަވަމުން އަސްލަމް ވިދާޅުވީ ދެ އިންތިހާބު އެއްކުރަން ބުނެވޭނީ ކަނޑައެޅިގެން ނޫނެކޭ ކަމަށެވެ. އޭނާ ވިދާޅުވީ ރައްޔިތުން ތަމްސީލުކުރަން މަޖިލީހަށް ފޮނުވާ މެންބަރުންނަކީ، ރައީސުލްޖުމްހޫރިއްޔާ އޭނަގެ އިންތިޚާބުގެ ތެރޭގައި އޭނަގެ ބާރާ އެކީގައި އިންތިޚާބުކޮށްދޭ ބައެއްގެ ގޮތަށް ނުހެދުމަށްޓަކައި ކަމަށެވެ.
އަސްލަމް ވިދާޅުވީ ދެ އިންތިހާބު އެއްކޮށްފިނަމަ މަޖިލީހުގެ މެންބަރުން ތިބޭނީ ރައީސުލްޖުމްހޫރިއްޔާގެ ދަށުގައި ކަމަށާއި، ރައީސުލްޖުމްހޫރިއްޔާ އެ މީހުން ގޮވައިގެން ގޮސް އިންތިޚާބު ކޮށްދޭން ޖެހޭނެ ކަމަށެވެ. އެހެންވީމާ ރައްޔިތުން ތަމްސީލުކުރާނެ ބަޔަކު ނުތިބޭނެ ކަމަށާއި، ރައީސުލްޖުމްހޫރިއްޔާ ތަމްސީލުކުރާނެ ބަޔަކު ތިބޭނީ ކަމަށް އޭނާ ވިދާޅުވި އެވެ.
އެ ރައީސުލްޖުމްހޫރިއްޔާގެ އިންތިޚާބުގައި ރައީސުލްޖުމްހޫރިއްޔާ އެ މީހުން ގޮވައިގެން ގޮސް މި އިންތިޚާބު ކޮށްދެނީ އަސްލު އެހެންވީމާ، ރައްޔިތުން ތަމްސީލުކުރާނެ ބަޔަކު ނުތިބޭނެ އޭރަކުންނެއް އިނގޭތޯ. ރައީސުލްޖުމްހޫރިއްޔާ ތަމްސީލުކުރާނެ ބަޔަކު އެރު ތިބެނީ. ދެން ތިބޭފުޅުން ކައިރިއަށް ނުވެސް އަންނާނެ މީހަކު. ފަސް އަހަރު ވަންދެން ނުވެސް އަންނާނީ އަސްލު. ވަރަށް ސާފުކޮށް އެނގޭނެ ދިވެހިރާއްޖޭގެ ރައްޔިތުންނަށް މިހާރު، މިކަން މި ވާ ގޮތް އަސްލު.ކުރީގެ ހައުސިންގ މިނިސްޓަރ މުހައްމަދު އަސްލަމް
އޭނާ ވިދާޅުވީ މިއީ ޕާޓީ ވިސްނުމެއްގައި ކުރާ ޒާތުގެ ކަމެއް ނޫން ކަމަށް ފާހަގަކުރެވޭ ކަމަށެވެ. ޤައުމުގެ މުސްތަޤުބަލަށްޓަކައި އަންނަން އޮތް ޖީލުތަކަށް ޓަކައި ލާންޖެހޭ ވޯޓެއް ކަމަށް އޭނާ ވިދާޅުވި އެވެ. ޕާޓީތަކުގެ ތެރޭގައި ތަފާތު ޚިޔާލުގެ މީހުން ތިބޭނެ ކަމަށާއި، އޭނާ ނިސްބަތްވާ ޕާޓީތެރޭގައި ވެސް ތަފާތު ބައެއް ބޭފުޅުން މަދުން ނަމަވެސް ތިބި ކަމަށް އަސްލަމް ވިދާޅުވިއެވެ. އެ ބޭފުޅުން މިއީ ޤައުމީ ކަމެއްގެ ގޮތުގައި ވިސްނަވައިގެން މިކަން ކުރައްވަން ޖެހޭ ކަމަށް އޭނާ ވިދާޅުވި އެވެ.
އަސްލަމް ވިދާޅުވީ މިކަމުގައި އޮތީ ސަރުކާރުގެ ނިޔަތް ވަރަށް ގޯސް ހަމަ ނުބައި ނިޔަތެއް ކަމަށެވެ. މިކަން ކޮށްފައި ދެން ކުރައްވާނެ ކަމަކީ އިންތިޚާބުގައި ނަތީޖާ ނެރޭގޮތް ބަދަލުކޮށްލައްވާނެ ކަމަށް އޭނާ ވިދާޅުވިއެވެ. ފަހަރެއްގައި ފަސްޓް ޕާސްޓް ދަ ޕޯސްޓް ވޯޓިން ސިސްޓަމަށް އަތުވެދާނެ ކަމަށާއި، ނޫނީ ޕްރެފަރެންޝަލް ވޯޓިންނަކަށް ރައްޔިތުންނަށް ނޭނގޭނޭއިރު ވޯޓު ގުނާއިރު ނަތީޖާ ނުކުންނަ ގޮތެއްވެސް ނޭނގޭނެ ކަމަށް އޭނާ ވިދާޅުވިއެވެ.
އަސްލަމް ވިދާޅުވީ ދެން ކުރައްވާނެ ކަމަކީ އިލެކްޓްރޯނިކް ވޯޓިންނަށް ދާނެ ކަމަށެވެ. މުސްތަޤުބަލުގައި ފެންނަ ނުފެންނަ ވޯޓަށް އާނއެކޭ ބުނެގެން ސަރުކާރަށް ކާމިޔާބުވެއްޖެ ކަމަށް ވާ ހަމަ ސީދާ އަޅުވެތިކަމާ ދިމާއަށް ދާނެ ކަމަށް އޭނާ ވިދާޅުވި އެވެ. މިދަނީ ރަސްކަމަކާ ދިމާއަށް ކަމަށާއި، ރަސްކަމަކަށް ބަދަލުކުރަން ވޯޓު ދޭން ބޭނުން ނަމަ މިއަށް އާނއެކޭ ބުނަންވީ ކަމަށް އަސްލަމް ވިދާޅުވި އެވެ.
