އީޔޫ އިން އޮތީ ގަލްފުގެ ޤައުމުތަކާ އެކު ކަމަށް ހާމަ ކޮށްފި

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރަމުން އަންނަ ހަނގުރާމައިގެ ސަބަބުން، ރައްދުގައި އީރާން އިން ހަމަލާ ތަކެއް ދެމުން އަންނައިރު، ޔޫރަޕިއަން ޔޫނިއަން (އީޔޫ) އޮތީ ގަލްފު ކޯޕަރޭޝަން ކައުންސިލް (ޖީސީސީ)ގެ ޤައުމުތަކާ އެކު، ސާބިތުކަން މަތީ ކަމަށް އެ އިއްތިހާދުން ހާމަ ކޮށްފި އެވެ. 

އީޔޫ ކައުންސިލްގެ ރައީސް އެންޓޯނިއޯ ކޮސްޓާ އާދީއްތަ ދުވަހު ވިދާޅުވީ، އީރާން އިން ދެމުން އަންނަ ހަމަލާ ތަކަކީ ވަގުތުން ހުއްޓާލަން ޖެހޭ ހަމަލާ ތަކެއް ކަމަށެވެ.

އެކްސްގައި ކުރެއްވި ޕޯސްޓެއްގައި ކޮސްޓާ ވިދާޅުވީ، އާދީއްތަ ދުވަހު ޔުނައިޓެޑު އަރަބް އެމިރޭޓްސް (ޔޫއޭއީ)ގެ ރައީސް ޝެއިޚް މުޙައްމަދު ބިން ޒައިދު އަލް ނަޙްޔާން އަށް ފޯނުން ގުޅުއްވައި މަޝްވަރާ ކުރައްވާފައިވާ ކަމަށެވެ. އެ ފޯނު ކޯލުގައި، އީރާންގެ ހަމަލާ ތަކުގެ އަސަރު އެންމެ ބޮޑަށް ކުރި އެއް ޤައުމު ކަމަަށްވާ، ޔޫއޭއީ އާއެކު އީޔޫ އޮތްކަން ކޮސްޓާ ވަނީ ތަކުރާރުކޮށް ވިދާޅުވެފަ އެވެ. 

ސައުދީ އަރަބިއްޔާ، ބަހްރެއިން، ކުވެއިތު، ޤަތަރު، އޮމާން އަދި ޔޫއޭއީ ހިމެނޭހެން ގަލްފު ކޯޕަރޭޝަން ކައުންސިލްގެ ޤައުމު ތަކަށް އީރާން އިން ހަމަލާ ދޭ ކަމަށް ބުނެ، އީޔޫ އިން ކަންބޮޑުން ފާޅު ކޮށްފައިވާއިރު، މިއީ އެމެރިކާ އާއި އިޒްރޭލް އިން އީރާންއާ ދެކޮޅަށް ފެށި ހަނގުރާމަ އެކެވެ. މިދިޔަ ފެބްރުވަރީ މަހުގެ 28 ވަނަ ދުވަހު އެމެރިކާ އާއި އިޒްރޭލް އިން އީރާން އަށް ހަމަލާ ދޭން ފެށުމާ ގުޅިގެން، އީރާން އިން އަންނަނީ މެދު އިރުމަތީގައި ހުރި އެމެރިކާގެ އަމާޒު ތަކަށް ހަމަލާ ދެމުންނެވެ. 

މެދު އިރުމަތީގެ މަސްރަހު ނުތަނަވަސްވެފައިވާ މި ދަނޑިވަޅުގައި، އީޔޫ އިން ވަނީ ސަރަހައްދީ ހަމަޖެހުން ޤާއިމު ކުރުމަށް ގަލްފުގެ ޤައުމު ތަކުން ކުރަމުންދާ މަސައްކަތް ތަަކަށް ފުރިހަމަ އަށް އެއްބާރުލުން ދޭނެ ކަމުގެ ޔަޤީންކަން ދީފަ އެވެ. އަދި އީރާންގެ ހަމަލާ ތަކުގެ ސަބަބުން، ސަރަހައްދީ ސަލާމަތަށް ނުރައްކާވަމުންދާ ކަަމަށް ވެސް، އީޔޫގެ އިސްވެރިޔާ ވަނީ ފާހަގަ ކުރައްވައިފަ އެވެ.