އަލުން އެނބުރި ބާސެލޯނާ އަށް ނުދާނެ ކަމަށް ޒަވީ ބުނެފި

އަލުން އެނބުރި ބާސެލޯނާ އަށް ނުދާނެ ކަމަށް، އެ ކުލަބުގެ ކުރީ ކޯޗު ޒަވީ ހެނާންޑޭޒް ބުނެފި އެވެ.

ބާސެލޯނާގެ ކުޅުންތެރިޔެއްގެ ގޮތުގައި ކުޅެފައިވާ، އަދި އެ ކުލަބުގެ ކެޕްޓަންކަން ވެސް ކޮށްފައިވާ ޒަވީ، އެ ކުލަބުގެ ކޯޗުކަމާ ހަވާލުވީ 2021 ވަނަ އަހަރު އެވެ. ބާސެލޯނާ އާއެކު ޒަވީ ސޮއި ކޮށްފައި އޮތް އެއްބަސްވުމުގެ މުއްދަތު 2024 ވަނަ އަހަރަށް ހަމަވާން އޮތްއިރު، އެއްބަސްވުން ހަމަވުމުގެ ކުރިން ޒަވީ ވަނީ އެ ކުލަބުގެ ކޯޗުކަން ދޫކޮށްލައިފަ އެވެ.

ބާސެލޯނާގެ ކޯޗުކަން ދޫކޮށްލުމަށް ފަހު މިހާތަނަށް ޒަވީ އެއްވެސް ޓީމަކާ ހަވާލުވެފައި ނުވެ އެވެ. ނަަމަވެސް، ޒަވީ އަށް ބައެއް ކުލަބު ތަކުން ހުށަހެޅުން ލިބެމުން އަންނަ ކަމަށާއި، އޭގެ ތެރޭގައި ސައުދީ ޕްރޯ ލީގުގެ ކުލަބުތައް ހިމެނޭ ކަމަށް ރިޕޯޓު ތަކުގައި ބުނެފަ އެވެ. ދާދި ފަހުން ޒަވީ ދިން އިންޓަވިޔުއެއްގައި އޭނާ ބުނީ، ބާސެލޯނާގެ ކޯޗުކަމާ ދެން ހަވާލު ނުވާނެ ކަމަށާއި، އެ ކުލަބަށް އެނބުރި ނުދާނެ ކަމަށެވެ. އެއާ އެކު، ކުޅުންތެރިޔެއްގެ ހައިސިއްޔަތުންނާއި، ކޯޗެއްގެ ހައިސިއްޔަތުން ބާސެލޯނާގައި ބާސެލޯނާގައި އޭނާގެ ވަގުތުތައް ނިމިފައިވާ ކަމަށް ޒަވީ ބުންޏެވެ.

މީގެ އިތުރުން ޒަވީ ބުނީ ބާސެލޯނާގައި އޭނާ އަށް ކާމިޔާބު ދުވަސް ތަކެއް ހޭދަ ކުރެވުނު ކަމަށް ޤަބޫލު ކުރާ ކަމަށެެވެ. އެގޮތުން ބާސެލޯނާ އިން ސްޕެނިޝް ލީގު ކާމިޔާބު ކޮށްފައިވާ ކަމަށް ފާހަގަކޮށް ޒަވީ ބުނީ، ވާދަވެރި ރެއާލް މެޑްރިޑުގެ ކުޅުންތެރިންނާ އެ ޓީމުން ވާދަކޮށްފައިވާ ކަަމަށެވެ. އެގޮތުން ރެއާލްގައި ތިބި ޔުއެފާ ޗެމްޕިއަންސް ލީގު ކާމިޔާބު ކުރި ކުޅުންތެރިން ކަމަށްވާ ޓޯނީ ކްރޫސް އާއި، ލޫކާ މޮޑްރިޗް ފަދަ ކުޅުންތެރިންނާ ދެކޮޅަށް ބާސެލޯނާ އިން މޮޅަށް ކުޅުނު ކަމަށް ޒަވީ ފާހަގަ ކުރި އެވެ. 

ޒަވީގެ އިރުޝާދުގެ ދަށުން ބާސެލޯނާ އިން ވަނީ 142 މެޗު ކުޅެފަ އެވެ. އޭގެ ތެރެއިން އެ ކުލަބު މޮޅުވެފައި ވަނީ 89 މެޗުންނެވެ. 24 މެޗުން އެއްވަރުވެފައިވާއިރު، 29 މެޗުން ވަނީ ބަލިވެފަ އެވެ. އޭނާގެ އިރުޝާދުގެ ދަށުން ބާސެލޯނާ އިން ވަނީ ސްޕެނިޝް ލީގުގެ އިތުރުން، ސްޕެނިޝް ސުޕަ ކަޕް ކާމިޔާބު ކޮށްފަ އެވެ.