ވެސްޓް ހޭމް ކައިރިން ޔުނައިޓެޑު ސަލާމަތްވީ ފަހު ވަގުތު

އިނގިރޭސި ޕްރިމިއާ ލީގުގައި ވެސްޓް ހޭމް ޔުނައިޓެޑާ ދެކޮޅަށް ކުޅުނު މެޗުން ފަހު ވަގުތު މެންޗެސްޓަރ ޔުނައިޓެޑު ސަލާމަތް ވެއްޖެ އެވެ.

އަންގާރަ ދުވަހުގެ ރޭ ދަންވަރު ވެސްޓް ހޭމްގެ އަމިއްލަ ދަނޑުގައި ކުޅުނު މެޗު ނިމުނީ ދެ ޓީމު 1-1 އިން އެއްވަރު ވެގެންނެވެ. މެޗުގައި ވެސްޓް ހޭމް އިން ލަނޑު ޖަހައި ކުރި ހޯދާފައި ވަނިކޮށް، މެޗުން ޔުނައިޓެޑު ސަލާމަތްވީ ފަހު ވަގުތު ޖެހި ލަނޑުންނެވެ.

މެޗުގެ ފުރަތަމަ ހާފުގައި ދެ ޓީމަށް ވެސް ލަނޑު ޖަހަން ފުރުސަތު ލިބުނު ނަމަވެސް، ފުރުސަތު ބޭނުން ނުކުރެވި ހާފު ނިމުނީ އެއްވެސް ޓީމަކަށް ލަނޑެއް ނުޖެހި އެވެ. ނަމަވެސް، މެޗުގެ ދެ ވަނަ ހާފު ފަށައިގެން ފަސް ވަނަ މިނެޓުގައި ވެސްޓް ހޭމް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ތޯމަސް ސޫޝެކް އެވެ.

އޭގެ ފަހުން މެޗުގެ 63 ވަނަ މިނެޓުގައި ޔުނައިޓެޑުގެ ކަސެމީރޯ ލަނޑެއް ޖެހި ނަަމަވެސް، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ އެ ލަނޑު ބަަލައި ނުގަންނަން ނިންމައިފަ އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ލަނޑު ޖަހައި، މެޗުން ޔުނައިޓެޑު ސަލާމަތް ކޮށްދިނީ ބެންޖެމިން ސެސްކޯ އެވެ.

މެޗު އެއްވަރުވެ، ޔުނައިޓެޑު އޮތީ ލީގު ތާވަލްގެ ހަތަރު ވަނަ މަގާމުގަ އެވެ. އެއީ މިހާތަނަށް ލީގުގައި ކުޅެފައިވާ 26 މެޗުން 45 ޕޮއިންޓާ އެކު އެވެ. ވެސްޓް ހޭމް އަތުން މޮޅުވެ، ޖެހި ޖެހިގެން ފަސް މެޗުން މޮޅުވުމުގެ ފުރުސަތު ޔުނައިޓެޑަށް އޮތް ނަމަވެސް، މެޗު އެއްވަރުވެ އެ ފުރުސަތު ވަނީ ގެއްލިފަ އެވެ.