އެވަޓަން ބަލިކޮށް، ޔުނައިޓެޑުން ރަނގަޅު ފޯމު ދަމަހައްޓައިފި

އިނގިރޭސި ޕްރިމިއާ ލީގުގައި އެވަޓަންއާ ދެކޮޅަށް ކުޅުނު މެޗުން މޮޅުވެ، މެންޗެސްޓަރ ޔުނައިޓެޑުން އެ ޓީމުގެ ރަނގަޅު ފޯމު ދަމަހައްޓައިފި އެވެ. 

އެވަޓަންގެ އަމިއްލަ ދަނޑުގައި ހޯމަ ދުވަހުގެ ރޭ ދަންވަރު ކުޅުނު މެޗު ޔުނައިޓެޑުން ކާމިޔާބު ކުރީ 1-0 އިންނެވެ. މެޗުގައި ޔުނައިޓެޑުން ލަނޑު ޖެހީ ވެސް ދެ ވަނަ ހާފުގަ އެވެ.

މެޗުގެ ފުރަތަމަ ހާފުގައި ވެސް ޔުނައިޓެޑުން ވަނީ ލަނޑު ޖަހަން މަސައްކަތް ކޮށްފަ އެވެ. އެގޮތުން އެވަޓަންގެ އޭރިޔާ ތެރެއިން ޔުނައިޓެޑުގެ މަތެއުސް ކުންހާ ފޮނުވާލި ހަމަލާ އެ ޓީމުގެ ގޯލު ކީޕަރު ވަނީ ހުއްޓުވައިފަ އެެވެ. އޭގެ ފަހުން ޔުނައިޓެޑުގެ ޑިއޭގޯ ޑަލޮޓް ފޮނުވާލި ހަމަލާ ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ.

މެޗުގެ ދެ ވަނަ ހާފުގެ 71 ވަނަ މިނެޓުގައި ޔުނައިޓެޑުން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ޔުނައިޓެޑަށް ޖަހައިދިނީ ބެންޖަމިން ސެސްކޯ އެވެ. އެއީ ޔުނައިޓެޑުގެ ބްރަޔަން އެމްބުއޭމޯ ތަނަވަސްކޮށްދިން ފުރުސަތެއްގައި ލިބުނު ބޯޅަ ތިރި ތިރިން ގޯލަށް ފޮނުވާލައިގެންނެވެ.

މި މޮޅާއެކު ޔުނައިޓެޑުން ވަނީ ލީގު ތާވަލްގެ ހަތަރު ވަނަ މަގާމަށް ޖެހިލައިފަ އެވެ. މިހާތަނަށް އެ ޓީމު ކުޅެފައިވާ 27 މެޗުން ލިބެނީ 48 ޕޮއިންޓެވެ. ޔުނައިޓެޑުގެ ކޯޗުކަމާ  މައިކަލް ކެރިކް ހަވާލުވި ފަހުން އެ ޓީމުން އަންނަނީ ރަނގަޅު ނަތީޖާތަކެއް ނެރެމުންނެވެ. އޭނާ ހަވާލުވި ފަހުން ޔުނައިޓެޑު ކުޅުނު ހަ މެޗުގެ ތެރެއިން ފަސް މެޗުން މޮޅުވެފައިވާއިރު، އަނެއް މެޗު ވަނީ އެއްވަރުވެފަ އެވެ.