ހޮރްމޫޒް ކަނޑު އޮޅީގެ ޒިންމާ އޮތް އީރާންގެ ނޭވީ ކޮމާންޑަރު އަވަހާރަ ކޮށްލާފައިވާ ކަމަށް އިޒްރޭލް އިން ބުނެފި

އިޒްރޭލް އިން ދިން ހަމަލާ ތަކެއްގައި އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ)ގެ ނޭވީ ކޮމާންޑަރު އަލީރެޒާ ތަންގްސިރީ އަވަހާރަ ކޮށްލާފައިވާ ކަމަށް، އިޒްރޭލްގެ މީޑިއާ ތަކުގައި ބުނެެފި އެވެ. 

އިޒްރޭލްގެ ރަސްމީ ބޭފުޅަކު ވިދާޅުވެފައިވާ ގޮތުގައި ތަންގްސިރީ އަވަހާރަ ކޮށްލާފައި ވަނީ، ބަނދަރު އައްބާސްގައި ދިން ހަމަލާއެއްގައި ކަމަށެވެ. އަދި އޭނާ އަކީ ހޮރްމޫޒް ކަނޑު އޮޅި ބަންދު ކުރުމުގެ ޒިންމާ އުފުލާފައިވާ ބޭފުޅެއް ކަމަށް ވެސް، ޓައިމްސް އޮފް އިޒްރޭލްގައި ރިޕޯޓު ކޮށްފައިވެ އެވެ. 

މި ހަމަލާއާ ގުޅޭ ގޮތުން އީރާން އިން ރަސްމީ ބަހެއް ބުނެފައި ނުވާއިރު، އިޒްރޭލްގެ އަސްކަރިއްޔާ އިން ރަސްމީ ބަޔާނެއް ނެރެފައި ނުވެ އެވެ. ތަންގްސިރީ އަވަހާރަވެފައިވާކަން ޔަޤީން ވެއްޖެ ނަމަ، މިއީ އެމެރިކާ އާއި އިޒްރޭލް އިން އީރާންއާ ދެކޮޅަށް ކުރާ ހަނގުރާމައިގައި، އިޒްރޭލް އިން އެންމެ ފަހުން އަވަހާރަ ކޮށްލި އީރާންގެ އިސް އޮފިޝަލަށް ވާނެ އެވެ. 

އެމެރިކާ އާއި އިޒްރޭލް އިން އީރާންއާ ދެކޮޅަށް ހަމަލާ ދޭން ފަށާފައި ވަނީ، ފެބްރުވަރީ މަހުގެ 28 ވަނަ ދުވަހު އެވެ. އެ ހަމަލާ ތަކުގައި އީރާންގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީ ވަނީ އަވަހާރަ ކޮށްލައިފަ އެވެ. އެކަމުގެ ބަދަލު ހިފުމުގެ ގޮތުން އީރާން އިން ވަނީ އެމެރިކާ އާއި އިޒްރޭލްއާ ދެކޮޅަށް ވަރުގަދަ ހަމަލާ ތަކެއް ދޭން ފަށައިފަ އެވެ. 

އެމެރިކާ އާއި އިޒްރޭލްގެ ހަަމަލާ ތަކުގެ ސަބަބުން އީރާން އިން ވަނީ ހޮރްމޫޒް ކަނޑު އޮޅި ބަންދު ކޮށްފަ އެވެ. އެ ކަނޑު އޮޅިން ދަތުރު ކުރުން އީރާން އިން ބަންދު ކޮށްފައިވާއިރު، އެކަމުގެ ސަބަބުން ދުނިޔޭގެ އިޤްތިޞާދަށް ބޮޑެތި ލޮޅުން ތަކެއް އަންނަނީ ކުރަމުންނެވެ. ޚާއްސަކޮށް ތެލުގެ އަގު ބޮޑުވެ، ދުނިޔޭގެ ބާޒާރުގައި ދަތިކަން ވަނީ ބޮޑުވެފަ އެވެ. އެމެރިކާ އިން ގެންދަނީ ހޮރްމޫޒް ކަނޑު އޮޅި ހުޅުވާލުމަށް އީރާން އަށް ބާރު އަޅަމުންނެވެ.