މެޑަމް ސާޖިދާ ކޭއާރުއެޗްގެ އައު އީ.އާރު ހުޅުވުމަށް ވަޑައިގަތުމާ ގުޅިގެން މިއަދު އޯޕީޑީގެ ޚިދުމަތް މެދުކަނޑާލައިފި
ކުޅުދުއްފުށީ ރީޖަނަލް ހޮސްޕިޓަލުގެ އައު އީއާރު ހުޅުވުމަށް މިއަދު އޯޕީޑީގެ ޚިދުމަތްތައް މެދުކަނޑާލައިފި. މި ހަރަކާތަކީ ކުރިއަށް އޮތް އިންތިޚާބާ ދިމާކޮށް ސިޔާސީ މަންފާއެއް ހޯދުމަށް ހިންގާ ކަމެއްގެ ގޮތުގައި ފާހަގަކޮށްލެވޭ.
ކުޅުދުއްފުށި ރީޖަނަލް ހޮސްޕިޓަލް
ކުޅުދުއްފުށީ ރީޖަނަލް ހޮސްޕިޓަލް (ކޭއާރުއެޗް) ގެ އައު އިމަޖެންސީ ރޫމް (އީ.އާރު) ހުޅުވުމުގެ ރަސްމިއްޔާތަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަނބިކަނބަލުން ސާޖިދާ މުޙައްމަދު އެ ސިޓީއަށް ވަޑައިގަތުމާ ގުޅިގެން، އެ ހޮސްޕިޓަލުގެ އޯޕީޑީގެ ޚިދުމަތްތައް މިއަދު މުޅިން މެދުކަނޑާލައިފިއެވެ.
މިކަމާ ގުޅޭގޮތުން ފެތުރެމުންދާ މަޢުލޫމާތުގެ ޞައްޙަކަން ކަށަވަރު ކުރުމަށް "ރާއްޖެ އެމްވީ" އިން ކުޅުދުއްފުށީ ރީޖަނަލް ހޮސްޕިޓަލަށް ގުޅުމުން، އެ ހޮސްޕިޓަލުން ވަނީ މިއަދު އޯޕީޑީގެ ޚިދުމަތްތައް މެދުކަނޑާލާފައިވާކަން ކަށަވަރުކޮށްދީފައެވެ.
ހދ. އަތޮޅުގެ އިތުރުން މުޅި ތިލަދުންމަތީގެ ގިނަ ބަޔަކު ބަރޯސާވާ އަސާސީ ޞިއްޙީ ޚިދުމަތް މެދުކަނޑާލުމަށްފަހު، މި ރަސްމިއްޔާތު ބޭއްވުމަށް ހަމަޖައްސާފައިވަނީ ސީދާ ބަލިމީހުން ޚިދުމަތް ހޯދުމަށް ގޮސް އުޅޭ ހޮސްޕިޓަލުގެ ގޯތިތެރޭގައެވެ. ސަރުކާރުގެ މި ނާތަހުޒީބީ އަމަލު ވެގެން ގޮސްފައިވަނީ ބަލިމީހުންގެ ޙައްޤުތަކަށްވުރެ ސަރުކާރުގެ ސިޔާސީ ދެއްކުންތެރިކަން އިސްކުރުމުގެ ހަރަކާތްތެއްގެ ގޮތުގައެވެ.
މިގޮތުން މި ހަރަކާތަކީ ކުރިއަށް އޮތް ލޯކަލް ކައުންސިލް އިންތިޚާބާ ދިމާކޮށް ސަރުކާރުން ސިޔާސީ މަންފާއެއް ހޯދުމަށް ޖަހާ "ކަޑައެއް" ކަމަށް ގިނަ ބަޔަކު ސިފަކުރަމުންދާއިރު, އިންތިޚާބު ބޯމަތިވެފައި ވަނިކޮށް، ރައްޔިތުންނަށް ދޭންޖެހޭ އެންމެ އަސާސީ ޚިދުމަތް ކަމަށްވާ ޞިއްޙީ ޚިދުމަތް ހުއްޓާލުމަށްފަހު މިފަދަ ރަސްމިއްޔާތުތައް ބޭއްވުމަކީ، ސަރުކާރުގެ އިޚުލާޞްތެރިކަމެއް ނެތްކަން ހާމަވާ ކަމެއް ކަން ފާހަގަކޮށްލެވެއެވެ.
މިއީ ހަމަ އިންތިޚާބަށް އަމާޒުކޮށްގެން ދައްކާލާ ޝޯއެއް. ބަލިމީހުންނަށް ފަރުވާ ނުދީ، ހޮސްޕިޓަލުގެ ގޯތިތެރޭގައި ސިޔާސީ ޖަލްސާތައް ބޭއްވުމަކީ ބަލައިގަނެވޭނެ ކަމެއް ނޫން."ރާއްޖެ އެމްވީ" އާއި ވާހަކަދައްކަމުން އާންމު ރައްޔިތަކު ބުންޏެވެ.
އައު އީއާރު ހުޅުވުމުގެ މި ރަސްމިއްޔާތުގައި ފަސްޓް ލޭޑީ ސާޖިދާ މުޙައްމަދުގެ އިތުރުން ސަރުކާރުގެ ބައެއް އިސްވެރިން ބައިވެރިވެވަޑައިގަންނަވާނެ ކަމަށް މަޢުލޫމާތު ލިބެއެވެ. ނަމަވެސް، ރައްޔިތުންގެ މެދުގައި ބޮޑު ކަންބޮޑުވުމެއް އުފެދިފައިވަނީ، އިންތިޚާބާ ދިމާކޮށް މިފަދަ "ކަޑަޖެހުމުގެ" ސަގާފަތެއް ކުރިއަށް ގެންދާއިރު، ރައްޔިތުންގެ އެންމެ އަސާސީ ޙައްޤުތައް ޤުރުބާން ކުރަމުންދާތީއެވެ.
