އެމްޑީޕީ ކެނޑިޑޭޓުން ތުންފަތަށް ހީރާސް ޖަހައި, ދެ އަތާއި ދެފައި ބަނދެވިފައިވާ ދޫންޏެއްހެން ނުތިބޭނެ: މޭޔަރ ޢާޠިފް
10 މާރިޗު 2026 | އަންގާރަ 14:49އެމްޑީޕީ ކުޅުދުއްފުށި ސިޓީގެ ކެނޑިޑޭޓުން ލޯކަލް ކައުންސިލް އިންތިޚާބުގައި ވާދަކުރަނީ, މި ސަރުކާރުން ކުޅުދުއްފުއްޓަށް ވަމުންދާ އިހުމާލާއި ދެކޮޅަށް ބަސްބުނެ, ކުޅުދުއްފުށީގެ ރައްޔިތުންގެ ހައްޤުގައި މަސައްކަތް ކުރުމަށް. އެމްޑީޕީގެ ކެނޑިޑޭޓުން ދެ އަތް ބަނދެ, ދެފައި ބަނދެފައި އޮންނަ ދޫންޏެއްހެން ނުތިބޭނެ ކަމަށް މޭޔަރ ޢާޠިފް ވިދާޅުވި.
މޭޔަރ މުޙައްމަދު ޢާޠިފް | އެމްޑީޕީ ކުޅުދުއްފުށި ސިޓީ
ދިވެހި ރައްޔިތުންގެ ޑިމޮކްރެޓިކް ޕާޓީ, (އެމްޑީޕީ) ގެ ކެނޑިޑޭޓުން ކުރިއަށް އޮތް ލޯކަލް ކައުންސިލް އިންތިޚާބުގައި ވާދަކުރަނީ ސަރުކާރުން ކުޅުދުއްފުއްޓަށް ވެފައިވާ އިހުމާލާއި ދެކޮޅަށް ބަސް ބުނެ މަސައްކަތް ކުރުމަށް ކަމަށާއި, އެމްޑީޕީ ކެނޑިޑޭޓުން ތުންފަތަށް ހީރާސް ޖަހައި, ދެ އަތާއި ދެފައި ބަނދެވިފައިވާ ދޫންޏެއް ހެން ނުތިބޭނެކަށް ކުޅުދުއްފުށި ސިޓީގެ މޭޔަރ މުޙައްމަދު ޢާޠިފް ވިދާޅުވެއްޖެއެވެ.
މޭޔަރ ޢާޠިފް މިފަދައިން ވިދާޅުވީ އެމްޑީޕީ ކުޅުދުއްފުށި ސިޓީގެ "ހޭވައްލާ ތައްޔާރު" ކެމްޕެއިން ޖަގަހަ ހުޅުވުމުގެ ހަފްލާގައި ވާހަކަފުޅުދައްކަވަމުންނެވެ.
މިގޮތުން ސަރުކާރުން ކުޅުދުއްފުށީގެ ތަރައްޤީއަށް އަޅާފައިވާ ހުރަސްތައް ފާހަގަކުރައްވަމުން މޭޔަރ ޢާޠިފް ވިދާޅުވީ, އެމްޑީޕީގެ ކެނޑިޑޭޓުން މި އިންތިޚާބުގައި ވާދަކުރައްވަނީ ލާމަރުކަޒީ ޤާނޫނުން ރައްޔިތުންނަށް ލިބިދޭ ބާރުތައް ކުޅުދުއްފުށި ސިޓީގެ ރައްޔިތުންގެ އަތުގައި ބާއްވަން ކަމަށާއި, އެ ސިޓީގެ ރައްޔިތުނެގް ހިޔާލާއި މަޝްވަރާ އާއި އެކު ކުޅުދުއްފުށީގެ ކަންކަން ނިންމައި ތަރުތީބުކޮށް ތަރައްޤީ ކުރުމަށް ކަމަށެވެ.
އަޅުގަނޑުމެންގެ ކެނޑިޑޭޓުން މި ވާދަކުރަނީ, މި ސަރުކާރުން ކުޅުދުއްފުއްޓަށް ވަމުންދާ އިހުމާލާއި ދެކޮޅަށް ބަސްބުނެ, ކުޅުދުއްފުށީގެ ރައްޔިތުންގެ ހައްޤުގައި މަސައްކަތް ކުރުމަށް. އަޅުގަނޑުމެންގެ ކެނޑިޑޭޓުން ތުންފަތަށް ހީރާސް ޖަހައިގެން ނުތިބޭނެ. އަޅުގަނޑުމެންގެ ކެނޑިޑޭޓުން ދެ އަތް ބަނދެ, ދެފައި ބަނދެފައި އޮންނަ ދޫންޏެއްހެން ނުތިބޭނެ.ކުޅުދުއްފުށި ސިޓީގެ މޭޔަރ މުޙައްމަދު ޢާޠިފް
މީގެ އިތުރުން ވޭތުވެ ދިޔަ ދެ އަހަރު 100 ބިލިއަން ރުފިޔާ ސަރުކާރުން ހަރަދުކޮށްފައިވާކަމަށް ފާހަގަކުރައްވަމުން މޭޔަރ ޢާޠިފް ވިދާޅުވީ, ސަރުކާރުން ފާއިތުވި ދެ އަހަރުގެ ތެރޭގައި ކުޅުދުއްފުއްޓަށް "ގާބުރިއެއް, ސިމެންތި ހަންޖެއް, މޮހޮރެއް" ހިސާބުވެސް ޖަހާފައެއްނުވާކަމަށެވެ. އަދި ސަރުކާރުން ކުޅުދުއްފުށީގެ ބޯހިޔާވަހިކަމަށާއި, އެ ސިޓީގެ ސަރުކާރު 3 ސްކޫލުގެ މަސައްކަތް ވެސް ހުއްޓުވާފައިވާކަމަށް މޭޔަރ ޢާޠިފް ވިދާޅުވެފައިވެއެވެ.
މަގުހެދުމުގެ ދެވަނަ ފޭސް އޮތީ ވަޅުޖަހާފަ. ތިންވަނަ ފޭސް އަށް އެޅި ބިންގާ ވީތަނެއް ނޭނގެ. ދޫނި ކާލީ. މި ސަރުކާރުގެ ހަމައެކަނި 14 ހަފްތާއަށް ކުޅުދުއްފުއްޓަށް ވީ ވައުދަކީ އެއަރޕޯޓުގައި އައު ޓަރމިނަލް އެއް އަޅަން. ބިންގާ އެބަހުރި, ހަމަ ޔަޤީނުންވެސް އޭގެން އަދި ނިރެއް ނުފަޅާ. ދަމަނަ ވެށި, ޓިވެޓް ސެންޓަރު އާރުޑީސީއާއި ހަވާލުކޮށްފަ. މިހެންގޮސް ސޮއިކޮށް ފޮޓޯ ނުނަގާ ޕްރޮޖެކްޓެއް ނެތް.ސަރުކާރުން ކުޅުދުއްފުއްޓަށް ވަމުންދާ އިހުމާލު ފާހަގަކުރައްވަމުން މޭޔަރ ޢާޠިފް ވިދާޅުވެފައިވެއެވެ.
މޭޔަރ ޢާޠިފް އިތުރަށް ވިދާޅުވީ ކުރިއަށް އޮތް ލޯކަލް ކައުންސިލް އިންތިޚާބަކީ ރައީސުލްޖުމްހޫރިއްޔާ އާއި ކުޅުދުއްފުށި ސިޓީގެ ރައްޔިތުންގެ ދެމެދު އޮތް އިންތިޚާބެއްކަމަށެވެ. މިގޮތުން ސަރުކާރު ހިންގާ މައި ޕާޓީގެ ކެމްޕޭނު ޓީމުގައި އުޅުއްވަނީ ދިވެހި ދައުލަތުން މުސާރަ ދީގެން ކޮންމެ ދުވަހަކު ޑޯ-ޓު-ޑޯ އަށް ހިނގާ ޓީމެއް ކަމަށް މޭޔަރ ފާހަގަކުރައްވާފައިވެއެވެ.
މިކަންކަން ފާހަގަކުރައްވަމުން މޭޔަރ ޢާޠިފް ވިދަޅުވީ, މި އިންތިޚާބުގެ ނަތީޖާ ބުނެދޭނީ ކުޅުދުއްފުށީގެ ރައްޔިތުން ކަމަށެވެ. މިގޮތުން އެ ނަތީޖާއިން ރައީސް މުޢިއްޒު އަށް ދެވޭނެ މެސެޖަކީ ކުޅުދުއްފުށީގެ ރައްޔިތުން ތިބީ މިދިޔަ ދެ އަހަރު ދުވަހު ސަރުކާރުން ކުރި މަސައްކަތައް ހިތްހަމަޖެހިގެންތޯ ނުވަތަ ނޫންތޯ ކަމަށާއި, ވޯޓު ލާ ދުވަހުން ރައްޔިތުން ބޮޑުކޮށް ރައީސް މުޢިއްޒުއަށް ޖަަވާބުދޭނެކަމަށް މޭޔަރ ޢާޠިފް ވިދާޅުވެފައިވެއެވެ.
