މައި ސަރުކާރުން މިދިޔަ ޑިސެންބަރު މަހު ކުޅުދުއްފުށީގައި އަޅައިދޭން ބުނި ސިންތަޓިކް ޓްރެކް ތޮޅިއަށް!
ކުޅުދުއްފުށީ ސިޓީގައި ސިންތެޓިކް ޓްރެކެއް އެޅުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންނެވި ވައުދާ އެއްގޮތަށް، 2025 ޑިސެމްބަރުގެ ކުރިން އެ މަޝްރޫޢުގެ އަމަލީ މަސައްކަތް ފެށިފައެއް ނުވެއެވެ.
ރައީސް މުޢިއްޒު މިދިޔަ ޑިސެންބަރު މަހުގެ ކުރިން ކުޅުދުއްފުށީގައި އަޅައިދޭން ވައުދުވެވަޑައިގެންނެވި ސިންތަޓިކް ޓްރެކް ގެ އަމަލީ މަސައްކަތް އަދިވެސް ނުފެށޭ. | ރާއްޖެ އެމްވީ
މައި ސަރުކާރުން ކުޅުދުއްފުށި ސިޓީއަށް ވީ ވައުދާއި އެއްގޮތަށް, ކުޅުދުއްފުށީގެ ކުޅިވަރު އާއިލާއާއި ޒުވާނުންގެ އެންމެ ބޮޑު އެއް އުންމީދު ކަމުގައިވާ ސިންތެޓިކް ޓްރެކްގެ މަޝްރޫޢުގެ އަމަލީ މަސައްކަތް 2025 ވަނަ އަހަރުގެ ޑިސެންބަރު މަހުގެ ކުރިން ފަށައިދޭނެ ކަމަށް ބުނި ނަމަވެސް, އެ ވައުދަށް އަމަލީ ސިފައެއް އަދިވެސް ނުލިބެއެވެ.
މިދިޔަ އަހަރުގެ އޮގަސްޓް މަހު ކުޅުދުއްފުށީ ސިޓީއަށް ކުރެއްވި ރަސްމީ ދަތުރުފުޅުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މި މަޝްރޫޢުއާއި ގުޅޭގޮތުން ވަރަށް ފޮނި އުންމީދުތަކެއް ދެއްވާފައެވެ. އެ ދަތުރުފުޅުގައި ރައްޔިތުންނާ މުހާތަބުކުރައްވައި ރައީސް ވިދާޅުވީ، ކުޅުދުއްފުށީގައި ޤާއިމުކުރާ ސިންތެޓިކް ޓްރެކްގެ މަސައްކަތް ލަސްވެގެން 2025 ވަނަ އަހަރުގެ ޑިސެމްބަރު މަހުގެ ތެރޭގައި ފެށޭނެ ކަމަށެވެ.
"ކުޅިވަރުގެ ދާއިރާގައި ވަރަށް މުހިންމު ވަރަށް ލަސްވެފަ އޮތް ކަމަކީ ސިންތެޓިކް ޓުރެކްގެ މަޝްރޫޢު. މި މަޝްރޫޢަކީ އެކި ކަލަހަ ފަންޑުތަކާއި ގުޅުވައިގެން އެކި ފަހަރު މަސައްކަތް ކުރެވިފައި އޮތްކަމެއް. އަޅުގަނޑުމެން މިހާރު ނިންމައިފިން ސަރުކާރުން އެގޮތަށް މި ދިގުލައިގެން ދިޔަ ނުދޭން" ރައީސް ވިދާޅުވިއެވެ.
މި މަޝްރޫޢު ލަސްވަނީ ފަންޑުތަކަށް ބަރޯސާވާން ޖެހުމުން ކަމަށް ފާހަގަކުރައްވައި، ރައީސް ވިދާޅުވީ ފިނޭންސް މިނިސްޓްރީ މެދުވެރިކޮށް އެކަމަށް މަގުތަކެއް ފަހިކުރަމުންދާ ކަމަށެވެ. އަދި އުންމީދަކީ 2025 ގެ ޑިސެމްބަރުގެ ކުރިން އަމަލީ މަސައްކަތް ފެށުން ކަމަށްވެސް އެމަނިކުފާނު ވިދާޅުވިއެވެ.
ނަމަވެސް، މިއަދަކީ 2026 ވަނަ އަހަރުގެ މާރިޗު މަހުގެ 6 ވަނަ ދުވަހެވެ. ރައީސް ދެއްވި ތާރީޚު ފަހަނައަޅައި ދިޔައިރުވެސް، ސިންތެޓިކް ޓްރެކްގެ އަމަލީ މަސައްކަތް އަދިވެސް ފެންނާކަށް ނެތެވެ.
މި އަހަރުގެ އޭޕްރީލް މަހު ބާއްވާ ލޯކަލް ކައުންސިލް އިންތިޚާބާ ދިމާކޮށް، ރައްޔިތުންގެ ލޮލުގައި އަނދުން އެޅުވުމުގެ ގޮތުން މިދިޔަ ޖެނުއަރީ މަހު ސަރވޭ ޓީމެއް އެ ސިޓީއަށް ޒިޔާރަތް ކުރި ނަމަވެސް، އޭގެ ފަހުން އަދި އެއްވެސް ކުރިއެރުމެއް މި މަޝްރޫޢުއަށް ލިބިފައެއް ނުވެއެވެ.
މައި ސަރުކާރުން ރައްޔިތުންނަށް ވެފައިވާ ވައުދުތައް ފުނިޖެހެމުންދާއިރު، މިކަމުގެ ނަތީޖާއަކަށް ވަނީ, ސިންތަޓިކް ޓްރެކް ފަދަ ޒަމާނީ ކުޅިވަރުގެ ވަސީލަތްތަކަށް ނުހަނު ފޮނި އުންމީދުތަކެއް ކުރަމުންދާ ކުޅުދުއްފުށީގެ ޒުވާނުން, މާޔޫސްކަމެއްގެ ތެރެއަށް ވައްޓައިލުމެވެ.
