މި ސަރުކާރުން ދޮޅު އަހަރުތެރޭގައި ނިންމަން ބުނި ކުޅުދުއްފުށީ ދަމަނަވެށި ވެސް އެންމެފަހުން ވީ "އިބިލީހު ކައިވެންޏަށް"

ކުޅުދުއްފުށި ސިޓީގެ ރައްޔިތުންނަށް ސިއްޙީ ފަރުވާގެ އައު އުއްމީދުތަކެއް ގެނެސްދިން "ދަމަނަވެށި" މަޝްރޫޢަކީ މިއަދު އެ ސިޓީގެ ރައްޔިތުންގެ މަލާމާތާއި ފާޑުކިޔުން އަމާޒުވެފައިވާ، ހަމައެކަނި ކަރުދާހުގައި އޮތް "ވަހުމަކަށް" ވެއްޖެއެވެ.

ސަރުކާރުން ބޮޑު އިސްތިހާރަކާއެކު، ދޮޅު އަހަރު ދުވަހުގެ ތެރޭގައި ނިންމާނެ ކަމަށް ބުނެ އަލުން ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާ ހަވާލުކުރި މި މަޝްރޫޢުއަށް 12 މާރިޗު 2026 އަށް އެއް އަހަރު ފުރޭއިރު، މި މަޝްރޫޢުއަށް ސަރުކާރުން އަމަލީ އެއްވެސް މަސައްކަތެއް ނުފެށިތާނގައި، މުޅި މަޝްރޫޢު އޮތީ ހުއްޓި، ދިގުލައިގެން ގޮސްފައެވެ.

މިއީ މާލެއިން ބޭރުގައި ރާއްޖޭގެ އެއްވެސް ސަރަޙައްދެއްގައި ބިނާކުރާ ފުރަތަމަ ދަމަނަވެށްޓެވެ. މާލޭގެ ދަމަނަވެށިން ލިބޭ ހުރިހާ ޚިދުމަތެއް ލިބޭ ގޮތަށް، ދެ ފަންގިފިލާއަށް އިމާރާތް ކުރަން ހަމަޖެހިފައިވާ މި މަޝްރޫޢުއަށް 23,113,061.08 (ތޭވީސް މިލިއަން އެއްލައްކަ ތޭރަހާސް ފަސްދޮޅަސް އެއް ރުފިޔާ އަށް ލާރި) ޚަރަދުކުރުމަށް ވަނީ ނިންމާފައެވެ.

ނަމަވެސް، މަސައްކަތުގެ ބިން އާރުޑީސީއާ ހަވާލުކުރި ފަހުން، އެ ބިމުގައި ކުރެވުނު ކަމެއް، ފެނުނު މީހަކު ނެތެވެ. ބިން ހަވާލުކުރި ދުވަހު ޖެހި ބޯޑު ފިޔަވައި، އެތަނުން ފެންނަން އޮތީ ކުރީ ސަރުކާރުން ނޯތް ކޯސްޓު ޕްރައިވެޓް ލިމިޓެޑް ކިޔާ ކުންފުންޏަކާއި ހަވާލުކޮށްގެން އެޅި ފައުންޑޭޝަން އެވެ.

މި މަޝްރޫޢު ހުއްޓިފައި އޮތް ސަބަބެއް އޮޅުންފިލުވުމަށް، ކުޅުދުއްފުށީ ރީޖަނަލް ހޮސްޕިޓަލް (ކޭއާރުއެޗް) އަށާއި އާރުޑީސީއަށް ގުޅުމަށް "ރާއްޖެ އެމްވީ" އިން ކުރި މަސައްކަތް އަދި ވަނީ ނާކާމިޔާބުވެފައެވެ. އަދި ސަރުކާރުގެ ކަމާބެހޭ އެއްވެސް އިދާރާއަކުން މިކަމާ ގުޅޭގޮތުން ޖަވާބެއް ދޭން ބޭނުމެއް ނުވެއެވެ. މިއީ މި ސަރުކާރުގެ ހާމަކަން ބޮޑު, ދެ ފުށް ފެންނަ ސިޔާސަތުގެ ދަށުން ރައްޔިތުންނަށް ކަންކަން ހާމަކުރާ މިންވަރު ބާވައެވެ؟ ނުވަތަ މަސައްކަތް ނުކުރެވި އޮތް އޮތުން ފޮރުވުމަށް ޖަހާ ސަކަރާތެއް ބާވައެވެ؟

ކުޅުދުއްފުށީގެ ތަރައްޤީގެ މަޝްރޫޢުތައް މިހާލަތަށް ގޮސްފައިވާއިރު، ކުރިއަށް އޮތް ލޯކަލް ކައުންސިލް އިންތިޚާބާ ދިމާކޮށް ސަރުކާރުން މިހާރު ދަނީ އަނެއްކާވެސް އައު "ކުލަ ހުވަފެންތަކެއް" ދައްކަމުންނެވެ. އެގޮތުން، ކޭއާރުއެޗް ޓާޝަރީ ފެންވަރަށް ބަދަލުކުރުމަށް ބޭނުންވާ އައު އިމާރާތުގެ މަސައްކަތްވެސް މިއަދު ވަނީ ސަރުކާރު ކުންފުންޏަކާ ހަވާލުކޮށްފައެވެ. ނަމަވެސް، ކުރިން ފެށި ދަމަނަވެށީގެ މަސައްކަތް ނުނިމި، އާރުޑީސީ ފަދަ ކުންފުނިތަކަށް ހަވާލުކުރާ މަސައްކަތްތައް "ފުނިޖެހެމުން" ދާއިރު، މިއީ ހަމައެކަނި އިންތިޚާބަށް އަމާޒުކޮށްގެން ޖަހާ ސިޔާސީ މަޅިއެއް ބާއެވެ؟

ކުޅުދުއްފުށީގެ ރައްޔިތުން މިއަދު ތިބީ ސުވާލު މާކެއްގެ ތެރޭގައެވެ. ދޮޅު އަހަރުން ނިންމަން ބުނި ދަމަނަވެށި އެއް އަހަރު ވީއިރުވެސް މަސައްކަތް ފެށިގެން ނުދާއިރު، މިއަދު އިޢުލާންކުރި ޓާޝަރީ ހޮސްޕިޓަލުގެ އައު އިމާރާތުގެ މަސައްކަތް ނިމޭނީ ކޮން ޒަމާނަކުން ބާވައެވެ؟ މި ސަރުކާރުގެ ތަރައްޤީގެ ދުވެއްޔަކީ ހަމައެކަނި "އިޢުލާން ކުރުމާއި ސޮއިކުރުން" ހެއްޔެވެ؟ ސަރުކާރުން ހަވާލުކުރާ މިފަދަ މަޝްރޫޢުގެ  މަސައްކަތްތައް މިހާރު ވެފައިވަނީ، ސަރުކާރުން ރައްޔިތުންނަށް ދެއްކި "އިބިލީހު ކައިވެންޏަކަށެވެ".