19 ވަނަ މަޖިލީހުގައި އޮތީ އެމްޑީޕީގެ ސުޕަ މެޖޯރިޓީ، އެކަމަކު ރައީސާއި ޕާޓީ އަށް ފަސޭހަކުރަން ގާނޫނު އަސާސީ ބަދަލެއް ނުކުރޭ: ކުރީގެ ނައިބު ރައީސް ފައިސަލް

ނިމުނު އެމްޑީޕީގެ ވެރިކަމުގައި ހިނގި 19 ވަނަ ރައްޔިތުންގެ މަޖިލީހުގައި އެމްޑީޕީގެ ސުޕަ މެޖޯރިޓީ އެއް އޮތް ކަމަށާއި ނަމަވެސް އެ މަޖިލީހުން ރައީސުލްޖުމްހޫރިއްޔާ އަށް ފަސޭހަ ކޮށްދީ، ޕާޓީ ގެ ފައިދާ އަށް ކަންތައްތަކެއް ނުކޮށްދޭ ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެ އެވެ. 

ހުކުރު ދުވަހުގެ ރޭ އެމްޑީޕީ އިން ފުވައްމުލަކު ސިޓީގައި ބޭއްވި ޖަލްސާގައި ވާހަކަ ދައްކަވަމުން ފައިސަލް ވިދާޅުވީ ކުރީގެ ރައީސް އިބްރާހިމް މުހައްމަދު ސޯލިހަކީ  4 އަހަރު ވަންދެން ގާނޫނު އަސާސީ އިސްލާހު ކުރުމުގެ މަސައްކަތުގައި ރައްޔިތުންގެ މަޖިލީހުގެ އެމްޑީޕީ ގެ މެންބަރުންނާއި ދެންވެސް ތިއްބެވި މެންބަރުންނާއެކު މަސައްކަތް ކުރެއްވި ބޭފުޅެއް ކަމަށެވެ. ނަމަވެސް މިއަދު މި ސަރުކާރުން ކަންތައްތައް ކުރާހެން ހިތަށް އެރުމުން ގާނޫނު އަސާސީ ބަދަލު ކުރަން އެމަނިކުފާނު ނޫޅުއްވާ ކަމަށް ފައިސަލް ވިދާޅުވި އެވެ. 

ގާނޫނު އަސާސީ އިސްލާހު ކުރުމުގެ މަސައްކަތުގައި އެންމެ ބޮޑު ގުރުބާނީ އެއްވީ ރައްޔިތުން ކަމަށެވެ. ރައްޔިތުން ގެލެރީގައި ތިބެގެންނާއި ބޭރުގައި ތިބެގެންނާއި ރަށްރަށުގައި ތިބެގެންނާއި މާލޭ އައިސްގެން އެވީ ގުރުބާނީގެ އަގަކީ މިއަދު ކޮބައިތޯ ފައިސަލް ސުވާލު އުފެއްދެވި އެވެ.

ގާނޫނު އަސާސީ ވުޖޫދަށް ގެނައުމުގައި އެ ބައިވެރިވި ބައިވެރިވުމުގެ އަގަކީ ކޮބައިތޯ. އަޅުގަނޑުމެން ރެޔާ ދުވާލު، ހެނދުނާ މެންދުރު، ހަވީރު ރޭގަނޑު ކުރި މަސައްކަތުގެ އަގު ކޮބައިތޯ. ބޭނުންވީމަ ބައިގަޑިއިރުން އެ ބަދަލު ކޮށްލަނީ ގާނޫނު އަސާސީ. އެއީ ދެވަނަ ބާބުގަ ރައްޔިތުންނަށް ލިބިދީފައި އޮތް އެތައް އަސާސީ ހައްގުތަކެއް. އެ ދެވަނަ ބާބު އައުމުންނޭ ވާދަވެރި ކަމާއެކު އިންތިޚާބުގަ ބައިވެރިވުމާ އަސާސީ ހައްގުތަކާއި ޚީޔާލުފާޅު ކުރުމާއި ނޫސްވެރިކަމުގެ މިނިވަންކަމާއި ދަތުރުފަތުރު ކުރުމާއި ފެނާއި ނަރުދަމާ އާއި މިހިރަ ހުރިހާ ކަމަކީ އެ ދެވަނަ ބާބުގަ ހިމެނޭ ކަންތައްތައް. 

ކުރީގެ ނައިބު ރައީސް ފައިސަލް ނަސީމް

ފައިސަލް ވިދާޅުވީ ގާނޫނު އަސާސީ އިން ރައްޔިތުންނަށް ލިބިފައިވާ ހައްގުތައް ނިގުޅައިގަތުމަށްޓަކައި މި ސަރުކާރުން ދެ އިންތިޚާބު އެއްކުރަން އުޅޭ އިރު، މިއަދުގެ ރައްޔިތުންގެ މަޖިލީހުން ވެސް ހުރިހާ ކަމެއް ކުރަނީ ރައީސް ޑރ. މުހައްމަދު މުއިއްޒާއި ޕީއެންސީ އަށް ފައިދާ ހޯދައިދީ ރައްޔިތުންނަށް ގެއްލުން ލިބޭ ގޮތަށް ކަމަށެވެ. 

20 ވަނަ މަޖިލީހުގައި ޕީއެންސީގެ މެޖޯރިޓީ އެއް އޮތަތީ، މަޖިލީހުން ހިތުހުރިހާ ގޮތެއް ހަދަމުންދަނީ ޕީއެންސީ އަށް އެކަނި ފައިދާ ވާ ގޮތަށް ކަމަށާއި ނަމަވެސް 19 ވަނަ މަޖިލީހުގައި އެމްޑީޕީގެ ސުޕަ މެޖޯރިޓީ އެއް އޮތް ނަމަވެސް ޕާޓީ އަށް ފައިދާ ވާހެން އެއްވެސް ކަމެއް ކޮށްފައި ނުވާ ކަމަށް ފައިސަލް ވިދާޅުވި އެވެ. އެ މަޖިލީހުން ހުރިހާ ކަމެއް ވެސް ކުރީ ގައުމަށްޓަކައި، ރައްޔިތުންނަށް ހިމާޔަތާއި ރައްކާތެރިކަން ލިބޭނެ ގޮތަށް، ގައުމުގެ ފުދުންތެރިކަން އިތުރުވާނެ ގޮތަށް ކަމަށް ވެސް ފައިސަލް ވިދާޅުވި އެވެ.  

ރިޔާސީ އިންތިޚާބެއް ބޯވަތިވަމުން އަންނައިރު ތާކުންތާކުން ނުޖެހޭ ދޮގުތައް ހަދައި، ބުހުތާނު ދޮގުތައް ހަދައި ނުބައި މައުލޫމާތު ފަތުރައި، ކަނޑުވިއްކާލި ކަމަށާއި އިންޑިއާގެ އެތައް ހާސް ސިފައިންނެއް، މިލިޓަރީ ސިފައިންގެ މީހުން ތިބިކަމަށާއި މައުލޫމާތު ހާމަ ނުކުރާ ކަމަށާއި އެތައް ބަޔަކަށް ވަޒީފާ ދޭ ވާހަަކައާއި ބޭނުން ބަޔަކަށް ޕްރޮޖެކްޓް ދޭ ވާހަކައާއި ޚަރަދު އިންތިހާއަށް ކުރާ ވާހަކަ ދައްކައިގެން އޭގެ އަޑު އެ ދުވަހު އެހިގެން ރަނގަޅު ގޮތެއް ވެދާނެ ކަމުގެ އުއްމީދުގައި ރައްޔިތުން ގެނައި ސަރުކާރުގެ ވާހަކަ އަޅުގަނޑު ދައްކާކަށް ނެތިން.

ކުރީގެ ނައިބު ރައީސް ފައިސަލް ނަސީމް

ފައިސަލް ވިދާޅުވީ ދެ އިންތިޚާބު އެއްކޮށްލުމުން ސަރުކާރުން ކުރާ އެއްވެސް ކަމެއް ބެލޭނެ ގޮތެއް ނޯންނާނެ ކަމަށެވެ. 

ފައިސަލް ވިދާޅުވީ ބަޔަކު ނުހަނު ބުރަ މަސައްކަތުން ކުރި މަސައްކަތެއް ޖަހައިގަނެގެން މި ސަރުކާރުން މި ގައުމު ފަހަތަށް ޖައްސާލަން ކުރާ މަސައްކަތަށް ރައްޔިތުން ޖާގަ ނުދޭނެ ކަމަށެވެ.