ރިފެރެންޑަމް ސަރުކާރަށް ކާމިޔާބުވެއްޖެނަމަ މަޖިލިސް މެދުވެރިކޮށް ސަރުކާރުން ކުރާ ކަންކަން އިތުރަށް ގޯސްވާނެ، މި ވޯޓަށް ނޫނެކޭ ބުނަން ޖެހޭ: އަމްރު

ރިފެރެންޑަމް ވޯޓު ސަރުކާރަށް ކާމިޔާބުވެއްޖެނަމަ، ރައްޔިތުން މަޖިލިސް މެދުވެރިކޮށް ސަރުކާރުން ކުރާ ކަންކަން އިތުރަށް ގޯސްވާނެ ކަމަށާއި، މި ވޯޓަށް ރައްޔިތުން ނޫނެކޭ ބުނަންޖެހޭ ކަމަށް އެސްޓީއޯގެ ކުރީގެ މެނޭޖިންގ ޑިރެކްޓަރު ހުސައިން އަމްރު ވިދާޅުވެއްޖެ އެވެ.

ބުރާސްފަތި ދުވަހުގެ ރޭ ގެނެސްދިން ނޫނެކޭ ޕްރޮގްރާމްގައި އަމްރު ވިދާޅުވީ ރިފެރެންޑަމްގައި ބޮޑެތި އޮޅުވާލުން ތަކެއް އެބަހުރި ކަމަށާއި، ސަރުކާރުން މިކަން ކުރަން އުޅޭ ހަގީގީ ސަބަބުތައް ހާމަ ނުކުރާ ކަމަށެވެ. އަދި ރައްޔިތުންނަށް މިކަމުން ދިމާވާނެ ފަސޭހައެއް ވެސް ބުނެ ނުދެވޭ ކަމަށް އޭނާ ވިދާޅުވި އެވެ. 

ރިފެރެންޑަމްއަކީ މިސަރުކާރުން ވަކި ސިޔާސީ މަގުސަދެއް ހާސިލް ކުރުމަށް ކުރާ ކަމެއްކަން ފާހަގަކުރައްވައި އަމްރު ވިދާޅުވީ ރިޔާސީ އިންތިޚާބާއި މަޖިލިސް އިންތިޚާބު ވޯޓު އެއް ދުވަހެއްގައި ކުރިއަށް ގެންދާއިރު، ރައްޔިތުންގެ ހުރިހާ ސަމާލު ކަމެއް ދާނީ ރިޔާސީ އިންތިޚާބަށް ކަމަށެވެ. އަދި މި އިންތިޚާބު ކާމިޔާވެއްޖެނަމަ ކުރިއަށް އޮތްތަނުގައި ރައީސް މުއިއްޒު ދައުލަތުގެ ހުރިހާ ވަސީލަތްތައް ބޭނުން ކުރައްވައިގެން ކެންޕޭން ކުރައްވާނީ ވެސް އެމަނިކުފާނަށް ދެވޭ ވޯޓަކީ މެންބަރުންނަށް ވެސް ދެވޭ ވޯޓެއް ގޮތަށް ކަމަށް އަމްރު ވިދާޅުވި އެވެ.

އެހެންކަމުން މަޖިލީހުގެ ބޭނުން އެ ހިސާބުން ގެއްލުނީ ކަމަށާއި، މިހާރު ވެސް މަޖިލީހުގެ ސުޕަ މެޖޯރިޓީ ސަރުކާރަށް އޮތުމުން ރައްޔިތުންގެ ހައްގުގައި ސަރުކާރު ޖަވާބުދާރީ ނުކުރެވޭ ކަމަށް އޭނާ ވިދާޅުވި އެވެ. 

އެގޮތަށް އެކަން ކުރީމަ މަސްއުނިވެގެން ވަރަށް ބޮޑަށް މިދަނީ މީތި. ދިޔައިމާ އެބަ ގެއްލޭ ރާއްޖޭގައި މި އޮންނަ ވަކި ވަކި ވެފައި އޮންނަ ބާރުތައް. އެ ބާރުތައް ގެއްލުނީމަ ދެން ދިމާވާ މައްސަލަ މާ ބޮޑު. އެއީ މިހާރުވެސް އަޅުގަނޑުމެންނަށް މި ދިމާވާ މައްސަލައެއް، އެއީ މަޖިލިސް ސުޕަރ މެޖޯރިޓީ އެ ސަރުކާރަކަށް ލިބުނީމަ ދެން އެ ސަރުކާރު ބޭނުންވާ ގޮތަކަށް އެކަންކަން ކުރައްވަނީ. މިސާލަކަށް ބައްލަވާ! ރޭގައި ހަ އަހަރު ކުއްޖަކު އެ ދުނިޔެ ދޫކުރި އެ ކުއްޖާއަަށް ބޭނުންވާ ހޮޅިކޮޅެއް ނުގެނެސްދެވިގެން. އެސްޓީއޯއިން އެންސްޕާ ބޮލުގައި، އެންސްޕާއިން އެސްޓީއޯ ބޮލުގައި. އަނެއްކާ އިރުކޮޅަކުން ހެލްތު މިނިސްޓަރު. އެއީ އެހެންވީމާ، މި ވާހަކައަކީ ކޮންމެ ބަޔަކު ވިޔަސް، މި ޒިންމާ ނަގަންޖެހޭ ބަޔަކު ވެސް ތިބޭނެތާ. އެކަމަކު އެކަން ބަލާނީ ކޮންތާކުހެއްތޯ؟ މަޖިލީހަކީ ހަގީގަތުގައި އެކަންކަން ބަލަން އޮންނަ ބޮޑީއެއް. މަޖިލީހުން މި އޮންނަނީ މިނިވަން މުއައްސަސާތައް ވެސް ކަނޑައަޅާފަ. ނަގާފަ. އެހެންވެއްޖެއްޔާ އެ ތަންތަނުން ވެސް ވަގުތުން އެކަންކަން ބަލަން އެބަޖެހޭތާ. 

އަމްރު ވިދާޅުވީ ރައްޔިތުންނާ ގުޅުންހުރި ކަންކަމުގައި ރައްޔިތުންގެ މަޖިލީހުގެ ދައުރު ވަރަށް ބޮޑު ކަމަށާއި، ދިމާވާ މައްސަލަތަކާ ގުޅިގެން މިނިވަން މުއައްސަސާތައް ޖަވާބުދާރީ ކުރުވަން ޖެހޭ ކަމަށެވެ.  އަދި ރައްޔިތުންނާ ގުޅުންހުރި ކަންކަމުގައި ސަރުކާރުން ނިންމާ ހުރިހާ ނިންމުންތަކާ ގުޅޭގޮތުން ވެސް ސުވާލު ކުރަންޖެހޭ ކަމަށާއި، ނަމަވެސް މިއަދު އެ ބާރު ވެސް ނެތް ކަމަށް އޭނާ ވިދާޅުވި އެވެ. އެއީ މަޖިލީހުގެ ސުޕަ މެޖޯރިޓީ ސަރުކާރަށް ލިބުމުން ދިމާވާ މައްސަލައެއް ކަމަށާއި، ރިފެރެންޑަމް ވޯޓު ސަރުކާރަށް ކާމިޔާބު ވެއްޖެނަމަ އިތުރަށް މައްސަލަތައް ބޮޑުވާނެ ކަމަށް އަމްރު ވިދާޅުވި އެވެ.

އެހެންކަމުން ރިފެރެންޑަމް ވޯޓަށް ނޫނެކޭ ބުނުމަށް އަމްރު ގޮވާލެއްވި އެވެ.