އިންތިޚާބުގެ ނާކާމިޔާބީއާ ގުޅިގެން ޑެންމާކުގެ ބޮޑު ވަޒީރު އިސްތިއުފާ ދެއްވައިފި

ޑެންމާކުގެ އާންމު އިންތިޚާބުގައި އެކަށީގެންވާ އަޣުލަބިއްޔަތެއް ހޯއްދެވުމުގައި ނާކާމިޔާބުވެ ވަޑައިގަތުމާ ގުޅިގެން، އެ ޤައުމުގެ ބޮޑު ވަޒީރު މެޓޭ ފްރެޑްރިކްސަން އިސްތިއުފާ ދެއްވައިފި އެވެ. 

ޑެންމާކުގެ ޝާހީ ގަނޑުވަރުން ނެރެފައިވާ ބަޔާނެއްގައި ބުނެފައި ވަނީ، ތިން ޕާޓި ހިމެނޭ ކޯލިޝަން ސަރުކާރަށް އިންތިޚާބުގައި ބޮޑު ނާކާމިޔާބީ އަކާ ކުރިމަތިލާން ޖެހުމުން ބޮޑު ވަޒީރު ވަނީ އިސްތިއުފާ ހުށަހަޅުއްވާފައި ކަމަށެވެ. 

މި ނިންމުމާ އެކު، ޑެންމާކުގެ ދެން އަންނަ ސަރުކާރެއް އެކުލަވާލުމުގެ މަޝްވަރާތައް ވަނީ ފަށައިފަ އެވެ. މި މަޝްވަރާ ތަކަކީ ދިގު ލައިގެންދާނެ އަދި އުނދަގޫ މަޝްވަރާ ތަކަކަށް ވާނެ ކަމަށް ބެލެވޭއިރު، އައު ސަރުކާރު އެކުލަވާލާނީ ފްރެޑްރިކްސަން ކަމެއް ނުވަތަ އެހެން ޕާޓީއެއްގެ ލީޑަަރެއް ކަމެއް އަދި ކަށަވަރުވެފައި ނުވެ އެވެ. 

މިދިޔަ އަންގާރަ ދުވަހު ބޭއްވި އިންތިޚާބުގައި ފްރެެޑްރިކްސަންގެ ސޯޝަލް ޑިމޮކްރެޓިކް ޕާޓީ އަށް ލިބިފައި ވަނީ، 1903 ވަނަ އަހަރަށް ފަހު އެ ޕާޓީ އިން ކުރިމަތިލާން ޖެހުނު އެންމެ ދަށް ނަތީޖާ އެވެ. އެގޮތުން 179 ގޮނޑި ހިމެނޭ ޤާނޫނު ހަދާ މަޖިލީހުން، އެ ޕާޓީ އަށް ކާމިޔާބު ކުރެވުނީ އެންމެ 38 ގޮނޑި އެވެ. މިއީ މީގެ ހަތަރު އަހަރު ކުރިން އެ ޕާޓީ އިން ކާމިޔާބު ކުރި 50 ގޮނޑިއާ އަޅާ ބަލާއިރު، ބޮޑު ދަށްވުމެކެވެ. 

އިންތިޚާބުގައި މި ނަތީޖާ ނިކުތުމުގެ މައިގަނޑު ސަބަބު ތަކުގެ ތެރޭގައި އިމިގްރޭޝަންގެ މައްސަލަ ތަކާއި، ދިރިއުޅުމުގެ ޚަރަދުތައް ބޮޑު ވުމާއި، އިޖުތިމާއީ ރައްކާތެރިކަމާ މެދު ރައްޔިތުންގެ މެދުގައި އޮތް ކަންބޮޑުވުންތައް ހިމެނެ އެވެ. 

އިންތިޚާބުގެ ނަތީޖާ ދައްކާ ގޮތުން ފްރެޑްރިކްސަންގެ ވާއަތު ފިޔައިގެ އިއްތިހާދަށް 84 ގޮނޑި ލިބިފައިވާއިރު، ކަނާއަތު ފިޔައިގެ ޕާޓީ ތަކަށް ލިބިފައި ވަނީ 77 ގޮނޑި އެވެ. ސަރުކާރެއް އެކުލަވާލުމަށް ބޭނުންވާ 90 ގޮނޑީގެ އަޣުލަބިއްޔަތު އެއްވެސް ފަރާތަކަށް ލިބިފައި ނުވެ އެވެ. އެހެންކަމުން ސަރުކާރު އެކުލަވާލުމުގައި އެންމެ މުހިންމު ދައުރެއް އަދާ ކުރާނީ ކުރީގެ ފޮރިން މިނިސްޓަރު ލާސް ލޮކޭ ރަސްމުސެންގެ މޮޑަރޭޓޭސް ޕާޓީ އިން ކާމިޔާބު ކުރި 14 ގޮނޑި އެވެ. 

މެދު މިނުގެ ސިޔާސަތު ތަކަށް ތާއީދު ކުރާ މި ޕާޓީ އިން ކޯލިޝަން ހަދާނެ ފަރާތެއްގެ މައްޗަށް ސަރުކާާރުގެ ބާރުވެރިކަން ބިނާ ވެގެން ދާނެ އެވެ. 

ނަތީޖާ މިހެން އޮތް ނަމަވެސް، 21.9 އިންސައްތަ ވޯޓާ އެކު ސޯޝަލް ޑިމޮކްރެޓްސް އަކީ އަދިވެސް ޑެންމާކުގެ އެންމެ ބޮޑު ޕާޓި އެވެ. އެހެންކަމުން ކުރިއަށްދާ ކޯލިޝަން މަޝްވަރާ ތަކަށް ފަހު، ތިން ވަނަ ދައުރަކަށް ބޮޑު ވަޒީރު ކަމަށް ފްރެޑްރިކްސަން އެނބުރި ވަޑައިގެންނެވުމުގެ ފުރުސަތު އެބަ އޮތެވެ.