އޭޕްރީލް ހަތަރުވަނަ ދުވަހު ނަގާ ފެންނަ ނުފެންނަ ވޯޓަކީ ރައްޔިތުންނަށް ޗޮއިސް އެއް ނުދީ މަޖުބޫރުން ލައްވާ ވޯޓެއް: ސައިފް

އަންނަ އޭޕްރީލް މަހުގެ ހަތަރުވަނަ ދުވަހު ބޭއްވުމަށް ނިންމާފައިވާ ފެންނަ ނުފެންނަ ވޯޓަކީ ދިވެހި ރައްޔިތުންނަށް އެއްވެސް އިޚުތިޔާރެއް ނުވަތަ ޗޮއިސް އެއް ނުދީ، މަޖުބޫރުން ލައްވާ ވޯޓެއް ކަމަށް މާލެ ސިޓީ ކައުންސިލްގެ ގަލޮޅު އުތުރު ދާއިރާގެ މެމްބަރު މުހައްމަދު ސައިފް ފާތިހު ވިދާޅުވެއްޖެ އެވެ.

ސައިފް މިހެން ވިދާޅުވީ ރާއްޖެޓީވީން ގެނެސްދޭ "ނޫނެކޭ" ކެމްޕެއިން ޕްރޮގްރާމްގައި ވާހަކަ ދައްކަވަމުންނެވެ.

ސައިފް ވިދާޅުވީ ގާނޫނުއަސާސީ އަށް ބަދަލު ގެނައުމަކީ ރައީސުލްޖުމްހޫރިއްޔާ ފޫހިފިލުވަން ކުރައްވާ ކަމަކަށް ވެގެން ނުވާނެ ކަމަށެވެ. ގާނޫނުއަސާސީ އަށް ބަދަލު ގެންނަންވާނީ ވަކި ތަސައްވަރެއް އޮވެގެން، އެ ބަދަލެއްގެ ސަބަބުން ނުކުންނާނެ ނަތީޖާތައް ރައްޔިތުންނަށް ސާފުކޮށްދީ، ފުޅާ ދާއިރާއެއްގައި މަޝްވަރާކުރެވިގެން ކަމަށް އޭނާ ފާހަގަކުރެއްވި އެވެ. ރާއްޖޭގެ މިހާރުގެ ގާނޫނުއަސާސީ އަކީ ހާއްސަ މަޖިލީހެއް އެކުލަވާލައިގެން އެތަކެއް ބަހުސްތަކަކަށްފަހު އެކުލަވާލާފައިވާ، ދައުލަތް ހިންގުމުގެ އަސާސީ "ޓެކްސްޓް" ކަމަށްވާއިރު، ރައީސް މުއިއްޒު ހިތްޕުޅަށް އެރިހާ ގޮތަކަށް އޭގެއަށް ބަދަލު ގެނައުމަކީ ނުރައްކާތެރި ކަމެއްގެ ގޮތުގައި ސައިފް ސިފަކުރެއްވި އެވެ.

އޭޕްރީލް ހަތަރުވަނަ ދުވަހު ނަގާ ވޯޓާ ގުޅޭގޮތުން ސައިފް ވިދާޅުވީ، އެއީ ވާނުވާ ސާފުކޮށްނުދީ، ރައްޔިތުން އޮޅުވާލުމެއްގެ ތެރެއަށް ވައްދައިގެން ސަރުކާރުން ބޭނުންވާ ފާހައެއް ޖެއްސުމަށް ކުރާ ކަމެއް ކަމަށެވެ.

ގާނޫނުއަސާސީ އަށް ބަދަކު ގެނައުމަކީ ފޫހިވީމަ ނޫނީ ހަމަ ހިތައްއެރީމަ ކުރާ ކަމެއް ނޫން. އެއީ ޕްލޭން އެއް އޮވެގެން ، ތަސައްވަރެއް އޮވެގެން، އެ ކުރަންއުޅޭ ކަންތައް އިނގިގެން އޭގެ ބްރޯޑަރ ޕާސްޕެކްޓިވް އެއް އޮވެގެން ކުރާ ކަމެއް. ގާނޫނުއަސާސީ އިސްލާހު ކުރީކީ ހަމަ އެއްދުވަހު ތިބެފަ ބައިވަަރު ހައްގުތަކެއް އެޔަށްލީކީ އެއް ނޫނޭ. އެތައް ބައިވަރު މަސައްކަތެއް ކޮށް މިނިވަން ބަހުސްތަކެއް ކޮށް، ހާއްސަ މަޖިލީހެއް އެއްކޮށް... ހާއްސަ މަޖިލީހުގެ ތެރޭ ތަޅާފޮޅާ، ޒުވާބުކޮށް އެތައްގޮތަކުން ހަދާފައޮތް ގާނޫނީ އަސާސީ އެއް އެއީ...  އެއީ އަޅުގަނޑުމެންގެ އަސާސީ ޓެކްސްޓް މި ދައުލަތް ހިންގަން އޮތް... ހަމަ ހިތްޕުޅަށް އަރާވަޑައިގަތީމާ ގާނޫނުއަސާސީ އަށް ބަދަލުގެންނަމުން މިސަރުކާރުން މި ގެންދަނީ. އެއީ ވަރަށް ނުރައްކާތެރިކަމެއް. ހަގީގަތުގަ ޗޮއިސް އެއް ނެތްގޮތަށް މަޖުބޫރުން ލެއްވޭ ވޯޓެއް މި ވޯޓަކީ. އެއީ ވާންއުޅޭ އެއްޗެއް ނޭނގޭ. އާނއެކޭ ނުވަތަ ނޫނެކޭ ބުނީމަ އޭގެ ނަތީޖާ އެއް ނޭނގެ. ދެން ވާވައްދާލައިގެން ގެންގޮސް ސަރުކާރުން ބޭނުން ފާހަގައެއް ޖައްސުވަން ކުރާ ކަމެއްގެ ގޮތުގަ މިކަން ފެންނަނީ. 

މާލެ ސިޓީ ކައުންސިލްގެ ގަލޮޅު އުތުރު ދާއިރާގެ މެމްބަރު މުހައްމަދު ސައިފް ފާތިހު

 މި ވޯޓަކީ ހަރަދު ކުޑަކުރުމުގެ ބޭނުމުގައި ކުރާ ކަމެއް ކަމަށް ސަރުކާރުން ބުނާ ބުނުމަށް ސައިފް ވަނީ ވަރަށް ބޮޑަށް ފާޑުވިދާޅުވެފަ އެވެ. އޭނާ ވިދާޅުވީ އިންތިހާބަކަށް ގާތްގަނޑަކަށް 50 މިލިއަން ރުފިޔާ ހަރަދުވާއިރު، ސަރުކާރުގެ ސިޔާސީ މުވައްޒަފުންގެ މުސާރަ އަށް އެކަނިވެސް މަހަކު 40 މިލިއަން ރުފިޔާ ހަރަދުވާ ކަމަށެވެ.

މީގެ އިތުރުން، ސަރުކާރުގެ ވެރިންނަށް ކާރު ބައްލަވައިގަތުމަށް 180 މިލިއަން ރުފިޔާ ހަރަދުކުރާއިރު، ހަރަދު ކުޑަކުރަން ކުރާ ކަމެއް ކަމަށް ބުނެ ދައްކާ ވާހަކަ ގަބޫލުކުރާނެ އެއްވެސް މީހަކު ނުހުންނާނެ ކަމަށް ސައިފް ވިދާޅުވި އެވެ. އޭނާ ވިދާޅުވީ އެއީ ކުޑަކުއްޖަކު ވެސް ގަބޫލުކުރާނެ ފަދަ ހަމަޖެހޭ ވާހަކައެއް ނޫން ކަމަށެވެ.

ސައިފް އިތުރަށް ވިދާޅުވީ މިހާރު މިއޮތް ޑިމޮކްރަޓިކް ނިޒާމަކީ ގާނޫނުއަސާސީގައި ހުރި ހަރުދަނާ އުސޫލުތަކުގެ ތެރެއިން ލިބިފައިވާ ހައްގުތަކެއްގެ މައްޗަށް ބިނާވެފައިވާ ނިޒާމެއް ކަމަށެވެ. ނަމަވެސް ސަރުކާރުން މިއަދު މަސައްކަތް ކުރަމުންދަނީ އެ ހައްގުތައް މަޑުމަޑުން ކޮށާލައި، ގާނޫނުއަސާސީގެ އެކި ބައިތައް އުނިކުރަމުން ދިއުމަށް ކަމަށް އޭނާ ތުހުމަތު ކުރެއްވި އެވެ. މިގޮތަށް ކަންތައް ކުރަމުންދާނަމަ، ގާނޫނުއަސާސީގެ ދަށުން ލިބިފައިވާ ހައްގުތައް އަންނަން އޮތް ޖީލުތަކަށް ވާރުތަ ނުކޮށްދެވޭނެ ކަމަށް ސައިފް ވިދާޅުވި އެވެ.