ދެ އިންތިޚާބު އެއްކޮށްލުމަކީ ރިޔާސީ އިންތިޚާބުގެ ތެރެއަށް ބަރުލަމާނީ އިންތިޚާބެއް ލައިގެން، ނިޒާމް ގަޑުބަޑުކޮށްލުން: އަލީ ހުސެއިން

މަޖިލިސް އިންތިޚާބާއި ރިޔާސީ އިންތިޚާބު އެއްކޮށްލުމަކީ ރިޔާސީ އިންތިޚާބުގެ ތެރެއަށް ބަރުލަމާނީ އިންތިޚާބެއް ލައިގެން، ވެރިކަމުގެ ނިޒާމް ގަޑުބަޑުކޮށްލުން ކަމަށް ޤާނޫނީ ވަކީލް އަދި ރައްޔިތުންގެ މަޖިލީހުގެ ކުރީގެ މެމްބަރު އަލީ ހުސެއިން ވިދާޅުވެއްޖެ އެވެ.

 ރާއްޖެޓީވީގެ ނޫނެކޭ ކެމްޕެއިން ޕްރޮގްރާމްގައި ވާހަކަދައްކަވަމުން  އަލީ ހުސައިން ވިދާޅުވީ 2008 ވަނަ އަަހަރު ލީ ނިޒާމީ ވޯޓުން ރާއްޖޭގައި އޮންނާނީ ރިޔާސީ ނިޒާމެއް ކަމަށް ނިންމާފައިވާ ކަމަށެވެ. ރިޔާސީ ނިޒާމެއްގެ އެންމެ މުހިންމު  ވޯޓަކީ ރިޔާސީ އިންތިޚާބު ކަމަށް ވާއިރު، އެ އިންތިޚާބުން ކަނޑައަޅަނީ ގައުމުގެ ހުރިހާ ކަމަކާއި ޒިންމާދާރުކުރުވާނެ މީހާ ކަމަށް އަލީ ހުސެއިން ވަނީ ވިދާޅުވެފަ އެވެ. ގާނޫނުއަސާސީގައި ރިޔާސީ އިންތިޚާބު ވަކިން ބާއްވަން ކަނޑައަޅާފައި އޮތީ ވެސް އެ އިންތިޚާބުގެ މުހިންމުކަމުގެ ސަބަބުން ކަމަށް އަލީހުސެއިން ވަނީ ވިދާޅުވެފަ އެވެ. އެހެންކަމުން ރިޔާސީ އިންތިޚާބުގެ ތެރެ އަށް ބަރުލަމާނީ އިންތިޚާބު އެއްކޮށްލުމަކީ ރަނގަޅު ގޮތެއް ނޫން ކަމަށް އޭނާ ވަނީ ވިދާޅުވެފަ އެވެ.

" ރިޔާސީ ނިޒާމެއްގައި ރިޔާސީ އިންތިޚާބާއި ބަރުލަމާނީ އިންތިޚާބެއް އެއްކޮށްލުން އެއީ ރަނގަޅު ކަމެއް ނޫން. ބަރުލަމާނުންނަކީ މަޖިލީސް. މިކަން މިހެން ވީމަ މުޅި ނިޒާމް ގަޑުބަޑުވަނީ. ދެ އިންތިޚާބު އެއްކޮށް އެ އަގަޑަބަގަޑަ ކޮށްލައިގެން ކުރަން އޮންނަ ކަމެއް ނޫން މިއީކީ." އަލީ ހުސެއިން ވިދާޅުވި އެވެ.

އިތުރަށް ވާހަކަދައްކަވަމުން އޭނާ ވިދާޅުވީ ރިޔާސީ އިންތިޚާބުގައި ރައްޔިތުން ނިންމަނީ ގައުމަށްޓަކާ ނިންމާ ނިންމުމެއް ކަމަށާއި، ގައުމު ހިންގުމުގެ ޒިންމު ހަވާލުކުރާނީ ކާކާތޯ ރައްޔިތުން ނިންމަނީ ވަރަށް ބޮޑަށް ވިސްނާފައި ކަމަށެވެ. އެހެންކަމުން އެ ދެ އިންތިޚާބު އެއްކޮށްލުމަކީ ވެރިކަމުގެ ދެވަނަ ދައުރެއް ރައީސް ޑރ. މުހައްމަދު މުއިއްޒު އަށް ހޯދައިދިނުމަށް ރާވައިގެން ކުރާ ކަމެއް ކަމަށް އޭނާ ވަނީ ސިފަކުރައްވާފަ އެވެ.