ދުނިޔޭގެ އެންމެ ބޮޑު ގޭސް ދަނޑުގައި އަލިފާނުގެ ހާދިސާއެއް، އީރާނުން ބުނީ ކޮންޓުރޯލު ކުރެވިއްޖެ ކަމަށް!

ދުނިޔޭގެ އެންމެ ބޮޑު 'އޮފްޝޯ' ގުދުރަތީ ގޭސް ދަނޑު ކަމަށްވާ 'ދެކުނު ޕާރްސް' ގެ ޕްލެޓްފޯމެއްގައި ރޯވި އަލިފާންގަނޑު ކޮންޓުރޯލުކޮށްފައިވާ ކަމަށް އީރާނުގެ ކަމާބެހޭ އިދާރާތަކުން ބުނެފި އެވެ.

މި އަލިފާނުގެ ހާދިސާ ހިނގާފައި ވަނީ އަންގާރަ ދުވަހު، ދެކުނު ޕާރްސް ގޭސް ދަނޑުގެ 14 ވަނަ ފިޔަވަހީގެ ގޭސް ޕްލެޓްފޯމެއްގައި ކަމަށާއި، ވަގުތުން އަލިފާންގަނޑު ނިއްވާލާފައިވާ ކަމަށް ޕާރްސް އޮއިލް އެންޑް ގޭސް ކުންފުނިން ބުންޏެވެ.

Advertisement

މި ހާދިސާ ހިނގި ވަގުތު އެ ތަނުގައި މަސައްކަތް ކުރަމުންދިޔަ މީހުން ފުރާނަ ސަލާމަތް ކުރުމަށް ޓަކައި ކަނޑަށް ފުންމައިލަން މަޖުބޫރުވި އެވެ. "މި ހާދިސާ ހިނގި ވަގުތު ފުރާނަ ސަލާމަތް ކުރުމަށްޓަކައި 17 މަސައްކަތްތެރިން ވަނީ ކަނޑަށް ފުންމައިލާފައި. އަދި، އެ މީހުން ސަލާމަތް ކުރުމުގެ އޮޕަރޭޝަން މިހާރު ދަނީ ކުރިއަށް،" ބޫޝެހްރު ޕްރޮވިންސްގެ ކްރައިސިސް މެނޭޖްމަންޓް ޑިރެކްޓަރ ޖެނެރަލް ކޫރޯޝް ދެހްޤާން ވިދާޅުވި އެވެ. "ހާދިސާ ހިނގައިދިޔަ މިންވަރާއި، މަސައްކަތްތެރިންގެ ހާލަތާ ގުޅޭ އިތުރު ތަފުސީލުތައް ފަހުން އިޢުލާނު ކުރެވޭނެ."

މި ހާދިސާއާ ގުޅިގެން ކަނޑަށް ފުންމައިލި ހުރިހާ 17 މަސައްކަތްތެރިން ވެސް ލައިފްބޯޓުތަކަށާއި ސަލާމަތީ އުޅަނދުތަކަށް އެރުމަށްފަހު، އެ އެންމެންގެ ހާލުވެސް ރަނގަޅު ކަމަށް ބޫޝެހްރުގެ ކްރައިސިސް މެނޭޖްމަންޓް އޮފީހުން ފަހުން ބުންޏެވެ. ހަމަމިއާއެކު، އެ މަސައްކަތްތެރިން އަނބުރާ ޕްލެޓްފޯމަށް ގެނައުމަށް ޓަކައި  ސަލާމަތީ ތިން އުޅަނދެއް އެ ސަރަހައްދަށް ފޮނުވާފައިވާ ކަމަށް ވެސް އެ އޮފީހުން ބުންޏެވެ.

އަލިފާން ރޯވާން މެދުވެރިވި ސަބަބުތަކުގެ ތެރޭގައި ގޭސް ލީކުވުމެއް ނުވަތަ މަސައްކަތުގެ ތެރޭގައި ދިމާވި އޮޕަރޭޝަނަލް މައްސަލައެއް ހިމެނިދާނެ ކަމަށް އޮފިޝަލުން ބަލަމުންދާ ކަމަށް ކަމާބެހޭ ފަރާތްތަކުން ބުންޏެވެ. އަލިފާން ރޯވި މި ޕްލެޓްފޯމަކީ، ދެކުނު ޕާރްސްއިން ދުވާލަކު އުފައްދާ 700 މިލިޔަން ކިއުބިކް މީޓަރަށް ވުރެ ގިނަ ގޭހުގެ ތެރެއިން 14.5 މިލިޔަން ކިއުބިކް މީޓަރު ހިއްސާކުރާ ޕްލެޓްފޯމެއް ކަމަށް ވެސް އޮފިޝަލުން ހާމަކުރެ އެވެ.

މި ބޮޑު ގުދުރަތީ ގޭސް ރިޒާވް އީރާނުން ހިއްސާ ކުރަނީ ގޭސް އެކްސްޕޯޓް ކުރުމުގައި ދުނިޔޭގެ ކުރީގައި އުޅޭ ޤަޠަރާ އެކުގަ އެވެ. މި ގޮތުން، ޤަޠަރުން މި ރިޒާވްގެ އެ ޤައުމުގެ ބަޔަށް ކިޔަނީ 'އުތުރު ޑޯމް' އެވެ. މި ރިޒާވްގައި ބޭނުންކުރެވޭ ފަދަ 1،800 ޓްރިލިއަން ކިއުބިކް ފޫޓުގެ ގޭސް އެކުލެވިގެންވާ ކަމަށް ލަފާކުރެވޭއިރު، މިއީ މުޅި ދުނިޔޭގެ 13 އަހަރު ދުވަހުގެ ބޭނުންތައް ފުއްދައިދެވޭނެ މިންވަރެކެވެ.