އިޒްރޭލާއި އެމެރިކާއިން އީރާނާ ދެކޮޅަށް މިހާރު ކުރަމުންދާ ހަނގުރާމަ މަޝްވަރާގެ ތެރެއިން ނިމުމަކަށް ގެންނަންޖެހޭ ކަމަށް ގަތަރުން ބުނެފި
24 މާރިޗު 2026 | އަންގާރަ 17:10އިޒްރޭލާއި އެމެރިކާއިން އީރާނާ ދެކޮޅަށް ކުރަމުންދާ ހަނގުރާމަ މަޝްވަރާތަކުގެ ތެރެއިން ހުއްޓާލަންޖެހޭ ކަމަށް ގަތަރުން ބުނެފި. ގަތަރުގެ ފޮރިން މިނިސްޓްރީގެ ތަރުޖަމާނު މާޖިދު އަލް އަންސާރީ ވިދާޅުވީ، އީރާން ނައްތާލުމަކީ ހައްލެއް ނޫން ކަމަށާއި ދެ ގައުމުން އެކުގައި އުޅެވޭނެ މަގެއް ހޯދަންޖެހޭ ކަމަށް.
ގަތަރުގެ ވެރިރަށް ދޯހާގައި ހުންނަ އެ ގައުމުގެ ފޮރިން މިނިސްޓްރީގައި 2023 ވަނަ އަހަރުގެ ނޮވެމްބަރު މަހުގެ 28 ވީ އަންގާރަ ދުވަހު ބޭއްވި ހަފުތާގެ ނޫސްވެރިންގެ ބައްދަލުވުމުގައި، ގަތަރުގެ ފޮރިން މިނިސްޓްރީގެ ތަރުޖަމާނު މާޖިދު އަލް އަންސާރީ ވާހަކަދައްކަވަނީ. | ރޮއިޓާސް
އިޒްރޭލާއި އެމެރިކާއިން އީރާނާ ދެކޮޅަށް މިހާރު ކުރަމުންދާ ހަނގުރާމަ މަޝްވަރާގެ ތެރެއިން ނިމުމަކަށް ގެންނަންޖެހޭ ކަމަށް ގަތަރުން އަންގާރަ ދުވަހު ބުނެފިއެވެ.
ގަތަރުގެ ފޮރިން މިނިސްޓްރީގެ ތަރުޖަމާނު މާޖިދު އަލް އަންސާރީ މީޑިއާތަކަށް މައުލޫމާތު ދެއްވަމުން ވިދާޅުވީ، މި ހަނގުރާމަ މަޝްވަރާތަކުގެ ތެރެއިން ހުއްޓާލަންޖެހޭ ކަމަކީ ގަތަރުގެ ސާފު ނިންމުމެއް ކަމަށެވެ. އަދި މިކަމަށްޓަކައި ކުރެވޭ ރަސްމީ އަދި ނުރަސްމީ ހުރިހާ މަސައްކަތްތަކަކަށް ގަލްފުގެ މި ގައުމުން އެއްބާރުލުން ދޭނެ ކަމަށް އޭނާ ފާހަގަކުރެއްވިއެވެ.
އީރާނާއި ގަތަރަކީ އަވަށްޓެރި ދެ ގައުމުކަން ފާހަގަކުރައްވައި އަންސާރީ އިތުރަށް ވިދާޅުވީ، ދެ ގައުމުން އެކުގައި އުޅެވޭނެ މަގެއް ހޯދަންޖެހޭ ކަމަށާއި، އީރާން މުޅިން ނައްތާލުމަކީ އޮތް ހައްލެއް ނޫން ކަމަށެވެ.
މީގެ އިތުރުން، އެމެރިކާއާއި އީރާނާ ދެމެދު ގަތަރުން ސީދާ ގޮތެއްގައި މެދުވެރިއެއްގެ ދައުރު އަދާކުރަމުން ނުދާ ކަމަށްވެސް އަލް އަންސާރީ ވިދާޅުވިއެވެ.
މި މޭރުމުން ވާހަކަދައްކަވަމުން، ގަތަރުގެ އުމްރާނީ ވަސީލަތްތަކަށް ދީފާނެ ކޮންމެ ހަމަލާއަކަށް ރައްދު ދިނުމުގެ ހައްގު އެ ގައުމަށް ލިބިގެންވާކަން ތަރުޖަމާނު އަލުން ކަށަވަރުކޮށްދެއްވިއެވެ.
ފެބްރުއަރީ މަހުގެ 28 ވަނަ ދުވަހުން ފެށިގެން އިޒްރޭލާއި އެމެރިކާއިން ދަނީ އީރާނަށް ހަމަލާތައް އަމާޒުކުރަމުންނެވެ. މީގެ ރައްދުގައި އީރާނުން ވަނީ އިޒްރޭލަށާއި އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާދީފައެވެ.
އެމެރިކާގެ އަލް-އުދައިދު އެއާ ފޯސް ބޭސް ހުންނަ ގަތަރަށް، އީރާނުން ތަކުރާރުކޮށް މިސައިލާއި ޑްރޯން ހަމަލާތައް ވަނީ އަމާޒުކޮށްފައެވެ.
