އީރާނަށް ހަމާލާ ދިނުމުގައި މުހިންމު ދައުރެއް އަދާކުރި އެމެރިކާގެ އެންމެ ބޮޑު މަނަވަރު ޖެރަލްޑް އާރް ފޯޑް އަށް ލިބުނު ގެއްލުން ތަކުގެ ސަބަބުން ސަރަހައްދު ދޫކޮށް ހިނގައްޖެ

އީރާނަށް ދެމުންދާ ހަމަލާތަކުގައި ބައިވެރިވި ދުނިޔޭގެ އެންމެ ބޮޑު މަތިންދާބޯޓު އުފުލާ މަނަވަރު، ޔޫއެސްއެސް ޖެރަލްޑް އާރް ފޯޑް، ކްރީޓްގައި ހުންނަ ކަނޑުގެ ސިފައިންގެ މަރުކަޒަކަށް ހޯމަ ދުވަހު އެނބުރި އައިސްފައިވާ ކަމަށް އޭއެފްޕީގެ ފޮޓޯގްރާފަރަކު ރިޕޯޓްކޮށްފިއެވެ.

މިދިޔަ ފެބްރުއަރީ މަހު ސޫދާ ބޭ އިން ކާބޯތަކެއްޗާއި، ތެލާއި އަދި ހަތިޔާރު ބަރުކުރި މި މަނަވަރުގެ ލޯންޑްރީގައި މާރިޗު މަހުގެ 12 ވަނަ ދުވަހު ހިނގި އަލިފާނުގެ ހާދިސާއެއްގައި ފަޅުވެރިންގެ ދެ މީހަކަށް ވަނީ އަނިޔާވެފައެވެ.

އެމެރިކާއިން މެދުއިރުމަތީގައި އަސްކަރީ ބާރުގަދަކޮށް، ޖެރަލްޑް އާރް ފޯޑާއި އަދި އަބްރަހަމް ލިންކަން ނަމަކަށް ކިޔާ އިތުރު މަތިންދާބޯޓު އުފުލާ މަނަވަރެއް އެ ސަރަހައްދަށް ފޮނުވުމަށްފަހު، ފެބްރުއަރީ މަހުގެ ފަހުކޮޅު އެމެރިކާއާއި އިޒްރޭލުން ވަނީ އީރާނާ ދެކޮޅަށް ވަރުގަދަ ވައިގެ ހަމަލާތަކެއް ދޭން ފަށާފައެވެ.

ދިހަވަރަކަށް މަތިންދާބޯޓު ހިމެނޭ އެއާ ވިންގްތަކެއް އެކުލެވިގެންވާ މި ދެ މަނަވަރުން ވެސް އީރާނުގެ އޮޕަރޭޝަންތަކުގައި މުހިންމު ދައުރެއް އަދާކޮށްފައިވާއިރު، ޖެރަލްޑް އާރް ފޯޑް އެ ސަރަހައްދުން ދިއުމަކީ އެ ސަރަހައްދުގައި ތިބި އެމެރިކާގެ ސިފައިންނަށް ކުރިމަތިވާނެ ނިކަމެތި ކަމެއް ކަމަށް ރިޕޯޓުތައް ބުނެއެވެ.

ޕެން ވޮޝިންގްޓަންގެ ޑައިރެކްޓަރ އޮފް ގްލޯބަލް ޕޮލިސީ ޕްރޮގްރާމްސް، ޑެނިއަލް ޝްނައިޑަމަން ވިދާޅުވި ގޮތުގައި، ފާހަގަކޮށްލެވޭ ފަދަ ދިގު މުއްދަތަކަށް ޖެރަލްޑް އާރް ފޯޑް ހަނގުރާމައިގެ މައިދާނުން ދުރުވުމަކީ، ހަނގުރާމައިގެ މަސައްކަތްތަކަށް އެމެރިކާއިން ދޭ އެހީތެރިކަން ކުޑަވެގެންދާނެ ކަމެކެވެ.

އިޒްރޭލުގެ ދިފާއުގައި ޖެރަލްޑް އާރް ފޯޑް އަދާކުރާ ދައުރު ބޮޑުކަން ފާހަގަކުރައްވަމުން އޭނާ އިތުރަށް ވިދާޅުވީ، ވައިގެ ދިފާއީ ނިޒާމުތައް ހުރި އެ މަނަވަރާއެކު ދަތުރުކުރާ ބައެއް އެހެން އުޅަނދުތައް އިޒްރޭލުގެ ކައިރީގައި މަޑުކޮށްފިނަމަ، މަނަވަރު ދިއުމުގެ ސަބަބުން ކުރިމަތިވާނެ އަސަރު ކޮންމެވެސް މިންވަރަކަށް ކުޑަވާނެ ކަމަށެވެ.

ޖެރަލްޑް އާރް ފޯޑް ކަނޑުމަތީގައި އުޅޭތާ މިހާރު ގާތްގަނޑަކަށް ނުވަ މަސް ދުވަސް ވެފައިވާއިރު، މި މުއްދަތުގެ ތެރޭގައި އެމެރިކާއިން ކެރީބިއަން ސަރަހައްދުގައި ހިންގި އޮޕަރޭޝަންތަކުގައި ވެސް އެ މަނަވަރު ވަނީ ބައިވެރިވެފައެވެ. އެ އޮޕަރޭޝަންތަކުގައި މަސްތުވާތަކެތި ސްމަގްލް ކުރާ ކަމަށް ތުހުމަތު ކުރެވޭ ބޯޓުތަކަށް ހަމަލާދިނުމާއި، ދަތިކުރުމުގެ ފިޔަވަޅު އަޅާފައިވާ ޓޭންކަރުތައް ހުއްޓުވުމުގެ އިތުރުން ވެނެޒުއޭލާގެ ލީޑަރު ނިކޮލަސް މަދޫރޯ ވެސް ވަނީ އެމެރިކާ ސިފައިންގެ ބެލުމުގެ ދަށަށް ގެންގޮސްފައެވެ.

އެމެރިކާގެ އަސްކަރިއްޔާއިން ބުނި ގޮތުގައި، މާރިޗު މަހުގެ 12 ވަނަ ދުވަހު އެ މަނަވަރުގެ ލޯންޑްރީ ރޫމެއްގައި ހިނގި އަލިފާނުގެ ހާދިސާގައި ދެ ފަޅުވެރިއަކަށް އަނިޔާވެ، ގާތްގަނޑަކަށް 100 އެނދަށް ބޮޑެތި ގެއްލުންތަކެއް ވަނީ ލިބިފައެވެ.

މީގެ އިތުރުން، ކަނޑުމަތީގައި އުޅުނުއިރު އެ މަނަވަރުގެ ފާޚާނާ ނިޒާމަށް ވެސް ބޮޑެތި މައްސަލަތަކެއް ކުރިމަތިވި ކަމަށް ރިޕޯޓްތައް ބުނެއެވެ. އެގޮތުން ފާޚާނާތައް ބެދުމާއި، ފާޚާނާ ބޭނުންކުރުމަށް ދިގު ކިއޫތަކެއްގައި މަޑުކުރަން ޖެހުނު ކަމަށް އެމެރިކާގެ މީޑިއާތަކުން ވަނީ ރިޕޯޓްކޮށްފައެވެ.

ސެނެޓް އިންޓެލިޖެންސް ކޮމިޓީގެ ވައިސް ޗެއާ، ސެނެޓަރ މާކް ވޯނާ ވަނީ މި މަނަވަރުގެ ޚިދުމަތުގެ މުއްދަތު އިތުރުކުރުމާ ގުޅިގެން ވަރަށް ބޮޑަށް ފާޑުވިދާޅުވެފައެވެ.

އޭނާ ވިދާޅުވި ގޮތުގައި، ގާތްގަނޑަކަށް އަހަރެއްހާ ދުވަސް ކަނޑުމަތީގައި ހޭދަކުރުމުގެ ސަބަބުން ޖެރަލްޑް އާރް ފޯޑާއި އޭގެ ފަޅުވެރިން ތިބީ ވަރަށް ބޮޑަށް ވަރުބަލިވެފައެވެ. އަދި މިއީ ރައީސް ޑޮނަލްޑް ޓްރަމްޕް ނިންމެވި ނުރައްކާތެރި އަސްކަރީ ނިންމެވުންތަކުގެ ސަބަބުން އެ ފަރާތްތަކުން އުފުލަން ޖެހުނު ތަކުލީފެއް ކަމަށް ވެސް އޭނާ ވިދާޅުވިއެވެ.