ޔަމާލްގެ ލަނޑުން މޮޅުވެ، ބާާސެލޯނާ އިން ލީޑު ފުޅާ ކޮށްފި

ސްޕެނިޝް ލީގުގައި އެތުލެޓިކް ބިލްބާއޯއާ ދެކޮޅަށް ކުޅުނު މެެޗުން މޮޅުވެ، އެންމެ ފަހުގެ ޗެމްޕިއަން ބާސެލޯނާ އިން އެއްވަނައިގެ ލީޑު ފުޅާ ކޮށްފި އެވެ. 

ހޮނިހިރު ދުވަހުގެ ރޭ ބިލްބާއޯގެ ދަނޑުގައި ކުޅުނު މެޗު ބާސެލޯނާ އިން ކާމިޔާބު ކުރީ 1-0 އިންނެވެ. މެޗުގައި ބާސެލޯނާ އިން ޖެހި ހަމައެކަނި ލަނޑު ޖެހީ ވެސް މެޗުގެ ދެ ވަނަ ހާފުގަ އެވެ.

މެޗު ފަށައިގެން ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނުނުއިރު، ދެ ޓީމަށް ވެސް ލަނޑު ޖަހަން ފުރުސަތު ލިބުނެވެ. ބާސެލޯނާގެ ފެރާން ޓޮރޭސް އާއި، ޔާއޯ ކަންސޭލޯ އަދި މާކް ބެނާލް އަށް ލިބުނު ފުރުސަތުގެ ބޭނުމެއް ނުކުރެވުނެވެ. 

މެޗުގެ ދެ ވަނަ ހާފުގައި ވެސް ބާސެލޯނާ އިން ލަނޑު ޖަހަން ފުރުސަތު ހޯދިއިރު، އެ ޓީމުން ލީޑު ނެގީ މެޗުގެ 68 ވަނަ މިނެޓުގަ އެވެ. ޕެޑްރީ ތަނަވަަސްކޮށްދިން ފުރުސަތެއްގައި ބާސެލޯނާ އަށް އެ ލަނޑު ޖަހައިދިނީ ސްޕެއިންގެ ޒުވާން ކުޅުންތެރިޔާ ލަމީން ޔަމާލް އެވެ. 

މޮޅާ އެކު ބާސެލޯނާ އިން ވަނީ އެއް ވަނައިގައި ހަތަރު ޕޮއިންޓުގެ ލީޑެއް ނަގައިފަ އެވެ. މިހާތަނަށް ކުޅެފައިވާ 27 މެޗުން އެ ޓީމަށް 67 ޕޮއިންޓު ލިބޭއިރު، ހަމަ އެ އަދަދަށް މެޗު ކުޅެގެން ދެ ވަނައިގައި ވާދަވެރި ރެއާލް މެޑްރިޑަށް ލިބެނީ 63 ޕޮއިންޓެވެ.