ޝައިހް ސަމީރަށް ރައީސް މައުމޫނުގެ ރައްދު: ސުންނީ، ޝީޢާ، ސަލަފީ، ވިދާޅުނުވޭ، އެއީ ބައިބައިކުރަން އަދުއްވުން ކިޔާހާ އެއްޗެހި
އީރާނުގެ ލީޑަރުންނަކީ މުސްލިމުން ނޫން ކަމަށް ދޭހަވާ ގޮތަށް ޝައިޚް އަޙްމަދު ސަމީރު ދެއްކެވި ވާހަކަތަކާ ގުޅިގެން، މުސްލިމުންގެ މެދުގައި ބައިބައިވުން އުފެދޭ ފަދަ ލޭބަލްތައް ބޭނުންނުކުރުމަށް ކުރީގެ ރައީސް މައުމޫން ޢަބްދުލްޤައްޔޫމް ވަނީ ވިދާޅުވެފައި. ސުންނީ، ޝީޢާ ނުވަތަ ސަލަފީއޭ ކިޔައިގެން މުސްލިމުން ބައިބައިކުރުމަކީ ދީނުގެ ދުޝްމަނުން ކުރާ ކަމެއް ކަމަށާއި، އެންމެންނަކީ ވެސް މުސްލިމުން ކަމަށް މައުމޫން ވިދާޅުވި.
އީރާނުގެ ކުރީގެ ރޫހީ ލީޑަރު ހާމަނާއީ (ފ) ކުރީގެ ރައީސް މައުމޫން (ކ) އަދި ޝައިހް ސަމީރު (ވ) | ރާއްޖެ އެމްވީ
އިރާނުގެ ކުރީގެ ރޫހާނީ ލީޑަރު އާޔަތުﷲ އަލީ ހާމަނާއީ އަކީ މުސްލިމެއް ނޫން ކަމަށް ދޭހަވާ ގޮތަށް ޝައިހް އަހުމަދު ސަމީރު ދެއްކެވި ވާހަކައަށް ކުރީގެ ރައީސް މައުމޫން އަބްދުލްގައްޔޫމް ރައްދު ދެއްވައިފި އެވެ.
ކުރީގެ ރައީސް މައުމޫން މިފަދަ ރައްދެއް ދެއްވާފައިވަނީ ހާމަނާއީއާއި ގުޅުވައިގެން ދެކެވެމުންދާ ވާހަކަތައް ސޯޝަލް މީޑިއާގައި ވައިގައި ހިފާލާފައިވަނިކޮށެވެ. ސަލަފު ޖަމިއްޔާގައި ހިމެނޭ ސަމީރު ވިދާޅުވެފައިވަނީ އީރާނުގެ ދީނީ މުރުޝިދު ޚުމައިނީއާއި ޚާމަނައީގެ ފޮތްތަކުގައި ޞަރީޙަކޮށް ލިޔެ ފާޅުކޮށް ބަޔާންކޮށްފައިވާ ވާހަކަތަކުން އަޅުގަނޑަށް އެނގި ކަށަވަރުވީ އެ ދެމީހުންނަކީ ވެސް މާތް الله ރުއްސުންލެއްވި އުންމުލް މުއުމިނީނަ ޢާއިޝަތުގެފާނާއި ޙަފްޞަތުގެފާނާއި، އަބޫބަކުރުގެ ފާނާއި ޢުމަރުގެފާނާއި ޢުޘްމާނުގެފާނާއި އެނޫންވެސް ޞަޙާބީންނަށް މަކަރާއި ޙީލަތާއި، ޚިޔާނާތް ނިސްބަތް ކުރުމާއި، އެބޭކަލުންނަކީ ފުރަތަމަ އިސްލާމްކަން އިޢުލާނުކުރި ދުވަހުން ފެށިގެންވެސް ވެރިކަމުގެ ދަހިވެތިކަމުގައި އިސްލާމް ދީން އިޢުލާނުކޮށްގެން ތިބި ޙީލަތްތެެރި ބައެއްކަމަށެވެ.
އަދި ކީރިތި ޤުރްއާނުގެ އާޔަތްތަކުގެ މުރާދު ވެސް އެމީހުންގެ ހަވާނަފުސުގެ އެދުންތަކަށް ބަދަލު ކުރި ބައެއް ކަމާއި، އަދި ޤުރްއާން ބަދަލުކުރަން ވެސް ފަސްނުޖެހޭވަރުގެ އަމިއްލަ އެދުން ބޮޑު ބައެއް ކަމަށް ޤަބޫކުރުން ފަދަ، ޞަޙާބީންނަށް ބަދުބަސް ބުނާ ޝީޢީ މަޒުހަބުގެ ބާޠިލު ޢަޤީދާގައި ދެމިތިބި ދެމީހުން ކަމެވެ. މިދެމީހުންގެ ފޮތްތަކުގައި މި ވާހަކަތައް ހުރީ އެހެން މާނައެއް ދޭހަކުރެވޭ ވަރަށް ވުރެ މާ ޞަރީޙަކަން ބޮޑުކޮށް ކަމަށެވެ. އެހެންކަމުން އީރާނުގެ ޙަމަލާތަކުންް ޔަހޫދީ ދައުލަތް ސުނާފަތިވާން އެދުނަސް އިސްލާމްދީނާއި އިސްލާމީ އުންމަތަށް ނަޞްރުދިނުމުގެ ނަމުގައި މި މީސްމީހުން މަތިވެރި ކުރުމުގެ އެއްވެސް މާނައެއް ނެތް ކަމެވެ.
މި ވާހަކަތަކާއި ގުޅިގެ ސޯޝަލް މީޑިއާގައި ދެބަސްވުންތައް އުފެދިފައިވަނިކޮށް ކުރީގެ ރައީސް މައުމޫން އެކްސްގައި ކުރެއްވި ޕޯސްޓެއްގައި ވިދާޅުވީ މިއީ ސުންނީ މުސްލިމެކޭ ޝީޢާ މުސްލިމެކޭ ސަލަފީ މުސްލިމެކޭ ވިދާޅުނުވާށެވެ. އަޅުގަނޑުމެންނަކީ ހައްތާވެސް މުސްލިމުންނެވެ. އެއީ އަޅުގަނޑުމެން ބައިބައިކުރަން ޢަދުއްވުން ކިޔާހާ އެއްޗިއްސެވެ.
ރައީސް މައުމޫނުގެ މި ޕޯސްޓާއި ގުޅިގެން ގިނަ ބަޔަކު ވަނީ ސަމީރުގެ ވާހަކަތަކަށް ފާޑު ވިދާޅުވެފަ އެވެ.
