ކަމުން ކަމުން ގޮސް ކަދުރުކޮޅު ވެސް ކާލައިފި

މި ސަރުކާރަކީ ރައްޔިތުންނަށް ހެޔޮ އެދޭ، ރައްޔިތުން ދެކެ ލޯބިވާ ސަރުކާރެވެ. ރައްޔިތުންނަށް އަޅާލައި، އެންމެ ހަމަހަމަ ސަރުކާރެވެ. ވަކި ބަޔަކަށް ވަކި ގޮތެއް ނުހަދާ، ރައްޔިތުންގެ ސަރުކާރެވެ. މިއީ ދިވެހީންގެ ސަރުކާރެވެ. މިހާރުގެ ރައީސް ޑރ. މުހައްމަދު މުއިއްޒު ހުންނަވާނީ އަބަދުވެސް ރައްޔިތުންގެ ފަޅީގައި ކަމަށް ވިދާޅުވަނީ ޚުދު އެމަނިކުފާނެވެ. ނަމަވެސް މިއަދު މި ފެންނަނީ އެމަނިކުފާނު ރައްޔިތުންގެ ފަޅީގައި ހުންނަވައިގެން ރައްޔިތުންގެ އަތުން އެތައް އެއްޗެއް ގެއްލެމުންދާ މަންޒަރެވެ. ފަހަރަކު އެއްޗެއް ފަހަރަކު އެއްޗެއް ރައްޔިތުންގެ އަތުން ގެއްލެމުން ގޮސް ސައުދީ ސަރުކާރުން ދޭ ކަދުރުކޮޅު ވެސް މިއަދު ރައްޔިތުންގެ އަތުން ގެއްލިއްޖެ އެވެ. 

ކޮންމެ އަހަރެއްގެ ރަމަޟާން މަހުގެ ކުރިން ސައުދީ ސަރުކާރުން ދޭ ކަދުރު ރާއްޖެ އަށް ލިބެ އެވެ. މި އަހަރު ވެސް ސައުދީ އަރަބިއްޔާގެ މިނިސްޓްރީ އޮފް އިސްލާމިކް އެފެއާރޒް، ''ދައުވާ އެންޑް ގައިޑެންސް''އިން އިސްލާމިކް މިނިސްޓްރީ އަށް 15 ޓަނުގެ ކަދުރު ހަދިޔާ ކުރި އެވެ. މި ކަދުރުތައް އެ ގައުމުން ރާއްޖެ އާ ހަވާލު ކުރީ މިދިއަ ފެބްރުއަރީ 23 ގަ އެވެ. 

އޭގެ ފަހުން މި މަހުގެ 15 ވަނަ ދުވަހު ސައުދީން ހަދިޔާކުރި ކަދުރު އެކި މުއައްސަސާތަކަށް ބަހާފައިވާ ކަމަށް އިސްލާމިކް މިނިސްޓްރީން މިވަނީ އިއުލާނު ކޮށްފަ އެވެ. މިނިސްޓްރީ އިން ބުނީ މި ކަދުރު ބަހާފައި ވަނީ އެކި މުއައްސަސާތަކަށާއި، ކޮލެޖުތަކަށް ކަމަށެވެ. އޭގެ އިތުރުން ވެސް އެހެން ފަރާތްތަކަށް ބަހާފައިވާ ކަމަށް މިނިސްޓްރީ އިން ބުނި ނަމަވެސް އިތުރު ތަފްސީލެއް ހާމަކޮށްފައިނުވެ އެވެ. އެހެންކަމުން ކަދުރު ދީފައި ވަނީ ކޮން ތަންތަނަކަށް ކަމެއް ނޭނގެ އެވެ.

ކޮންމެ ކަމެއްގެ މައުލޫމާތު ވެސް ރައްޔިތުންނަށް ފޮރުވާ ބީދައިން ކަދުރު ބެހި ތަންތަނާއި މީހުން ފޮރުވީ އެވެ.

ސައުދީ އިން ރާއްޖެ އަށް ހަދިޔާ ކުރާ ކަދުރު އެހެން ހުރިހާ ސަރުކާރުތަކުން ވެސް އަބަދުވެސް ދެނީ އާންމު ރައްޔިތުންނަށެވެ. ކުރީގެ ސަރުކާރުތަކުގައި ކޮންމެ ގޭބިސީއަކަށް ކަދުރު ލިބޭނެ އިންތިޒާމު ހަމަޖައްސާފައި އޮވެ އެވެ. ނަމަވެސް މިފަހަރު މި ފެންނަނީ ކުންފުނިތަކަަށް މި ކަދުރުތައް ބަހާލި އިރު އާންމު ރައްޔިތުންނަށް ކަދުރު ނުލިބޭނެ ފަދަ ގޮތަކަށް އިންތިޒާމުތައް ހަމަޖައްސާފައިވާ މަންޒަރެވެ. 

މި ސަރުކާރަކީ ކޮންމެ ކަމެއް ވެސް ވާހަކަތަކުން ހަމަޖައްސާލަން މޮޅު ސަރުކާރެކެވެ. ރައްޔިތުންނަށް ނުލިބޭ ގޮތަށް ކަދުރު ބަހާލި މައްސަލައިގައި ރައްޔިތުން ކަންބޮޑުވުން ފާޅު ކުރުމުން ސަރުކާރުން ބުނީ 15 ޓަނުގެ ކަދުރު މުއައްސަސާތަކަށް ދިން ނަމަވެސް އިތުރު 50 ޓަނުގެ ކަދުރު ރާއްޖެއަށް ލިބޭނެ ކަމަށެވެ. އެ ކަދުރު އާންމު ރައްޔިތުންނަށް ހަދިޔާ ކުރާނެ ކަމަށާ އެ ޝިޕްމެންޓް ލިބުމުން މާލެސިޓީގެ އިތުރުން އަތޮޅުތެރޭގެ ރަށްތަކަށް ވެސް ކަދުރު ދޭނެ ކަމަށެވެ. 

ނަމަވެސް މިއަދު މި ސަރުކާރުން ދައްކާ މިފަދަ ވާހަކަތައް ރައްޔިތުން ގަބޫލެއް ނުކުރެ އެވެ. ކުރިއަސް ކުރާނީ އެކަން ކުރުމުންނެވެ. ރައްޔިތުން މި ސަރުކާރަށް އިތުބާރު ނުކުރަނީ ސަބަބެއް ނެތި އެއްވެސް ނޫނެވެ. މި ސަރުކާރަކީ ކުރަން ބުނާ އެއްވެސް ކަމެއް ނުކުރާ ސަރުކާރެކެވެ. 

ކޮންމެ އަކަސް މި ސަރުކާރަކީ ކުންފުނިތަކަށް އެއްޗެހި ބަހަން މޮޅު ސަރުކާރެކެވެ. މިދިޔަ އަހަރުގެ ފަހުކޮޅު ރައީސް މުއިއްޒު ހާޒިރުވެ އިންނަވައި، މި ސަރުކާރުން ވަނީ 53 ކުންފުންޏަކަށް ބިޑަކާ ނުލައި 2.7 ބިލިއަން ރުފިޔާގެ 206 މަޝްރޫއު ބަހާލާފަ އެވެ. އޭގެ ފަހުން ފެންމަތިވީ ސަރުކާރު ކުންފުނިތަކަށް ބިންތަކެއް ހެޔޮ އަގުގައި ދިން މައްސަލައެކެވެ. ރައްޔިތުން ބުނާ ގޮތުގައި އެ ބިންތައް ވެސް ބަހާލީ އެވެ. ބަހަމުން ބަހަމުން ގޮސް މިފަހަރު އެ ބަހާލީ ރައްޔިތުންގެ ކަދުރުކޮޅެވެ. 

ރައްޔިތުންގެ "ޓީމު" ގައި ތިބެގެން ރައްޔިތުންގެ ފައިސާކޮޅު ކައި ހުސްކޮށްފި އެވެ. ރައްޔިތުންގެ ބިންތައް ފެންފޮދަކާ ނުލާ ދިރުވާލައިފި އެވެ. ދައުލަތުގެ މިލްކިއްޔާތު ވެސް އެކީ އެކައްޗަކަށް ކާލައިފި އެވެ. ބަލަބަލައި ތިއްބާ ރައްޔިތުންގެ ކުންފުނިތަކާ، ރައްޔިތުންގެ ހައްގުތަކާއި، މިނިވަންކަމާއި، މި ގައުމުގެ އިގްތިސާދާއި، ފައިސާ ލިބެންޏާ ލިބޭހާ ސިނާއަތެއް ވެސް ކާލައިފި އެވެ. އެންމެ ފަހުން ސައުދީ އިން ހިލޭ ދިން ކަދުރު ކޮޅު ވެސް ކާލީ އެވެ. ދެން މިވަރު ވީމާ ބުނާނެ އެއްޗެއް ނެތެވެ.