ޓެކްސީ ލައިނުގެ ހިދުމަތް ފަށަން ދިން 4 ވަނަ ތާރީހު ވެސް ފަހަނަ އަޅައި ގޮސްފި

ޓެކްސީ ޑްރައިވަރުންނާއި ދެކޮޅަށް ސަރުކާރުން ހިދުމަތަށް ނެރެން އުޅުނު ޓެކްސީ ފްލީޓުގެ ފުރަތަމަ ބެޗު މި މަހުގެ 11 ވަނަ ދުވަހު ގެނެސް 18 ވަނަ ދުވަހު ހިދުމަތް ފަށާނެ ކަމަށް ބުނި ނަމަވެސް ހިދުމަތް ނުފެށި މުއްދަތު ފަހަނައަޅައި ގޮސްފި އެވެ. 

މި މަހުގެ 4 ވަނަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން، ޓްރާންސްޕޯޓް މިނިސްޓަރު މުޙައްމަދު އަމީން ވިދާޅުވެފައިވަނީ ޓެކްސީ އިލެކްޓްރޯނިކް ނިޒާމުތަކަށް ބަދަލުތަކެއް ގެންނަންޖެހޭ ކަމަށެވެ. އަދި ރާއްޖޭގެ ރަށްތައް މޫދާ ވަރަށް ކައިރީގައި އޮތުމުން، ލޮނުގެ އަސަރުކުރާތީ ގެންނަން ޖެހޭ ބަދަލުތައް ގެނެސް ނިމިގެން 2 ބެޗަކަށް ގެންނަން ނިންމާފައިވާ ކަމަށެވެ. އެގޮތުން ފުރަތަމަ އެމް.ޓީ.ސީ.ސީ އިން ޕްލޭން ކޮށްފައި އޮތީ 2 ޤައުމެއްގައި 2 ބެޗަކަށް ތައްޔާރުކޮށްގެން ގެންނަން ކަމަށެވެ.

އަދި ދެ ބެޗު ވެސް މިހާރު ނިމިގެން ރާއްޖެއަށް އައުމުގެ މަގުމަތީގައި އުޅޭ ކަމަށް މިނިސްޓަރ ވިދާޅުވި އެވެ. އަދި ބުދަ ދުވަހު އެއް ބެޗު ސްރީލަންކާގެ ޕޯޓަށް ވަންނާނެ ކަމަށާއި، އެހެންވީމާ، ލިބިފައި ހުރި މަޢުލޫމާތުތަކަށް ބަލާއިރު، އިރާދަކުރެއްވިއްޔާ މި މަހުގެ 11 ވަނަ ދުވަހު އެއް ބެޗު ރާއްޖެ އަންނާނެ ކަމަށެވެ. އަދި މި މަހުގެ 18 ވަނަ ދުވަހު، އީދަށް ހިދުމަތް ފެށޭތޯ މަސައްކަތް ކުރަމުން އަންނަ ކަމަށެވެ. 

މި އަނެއް ދެ މޮޑެލް މިހާރު އައުމުގެ މަގުމަތީގައި އަޅުގަނޑަށް ޔަޤީން އަޅުގަނޑު މިއަދު ދެން މި ތަނަށް އަންނަން މަޢުލޫމާތު ސާފުކޮށްލި އިރުގައި މާދަން ނޫން އަނެއް ދުވަހު އެއީ ހުކުރު ދުވަހު އެރައިވަލް ޑޭޓް ލިބޭނެ ދެ ވަނަ ބެޗުގަ. ފުރަތަމަ ބެޗުގެ އެރައިވަލް ޑޭޓަކީ ޓެކްސީތަކުގެ އެރައިވަލް ޑޭޓަކީ މި މަހުގެ އެގާރަ އިނގޭތޯ. އެހެންވީމަ އަޅުގަނޑު އުއްމީދުކޮށްގެން މަސައްކަތްކުރަމުން މި ގެންދަނީ. މި ޓެކްސީ ލައިނަކީ ހަމަ ޑަންލާފަ އެއްދުވަހު ފުލް ފުލެޖް އޮޕަރޭޝަނަކަށް ނެރެވޭނެ ކަންތައްތައް، އޭގެ އެޕްލިކޭޝަން ޕްރޮސެސްއަކާ ހުޅުވާލަމުން ގެންދާނީ މި ވަކި މިންގަނޑު ތެރޭގައި. އެކަމަކު ޓެކްސީލައިންގެ އިފްތިތާޙުކޮށް ލިމިޓެޑް ސަރވިސްތަކެއް ފެށުމަށް އަޅުގަނޑުމެން މަސައްކަތްކުރަނީ އިރާދަކުރެއްވިއްޔާ މި މަހުގެ 18 އަށް. އީދަށް މި ކަންތައް ފެށޭތޯ އެމް.ޓީ.ސީ.ސީ.ން މަސައްކަތްކުރަމުން ދަނީ. އެ އެމް.ޓީ.ސީ.ސީ.ން ސަރުކާރާ ގުޅިގެން އިރާދަކުރެއްވިއްޔާ އަޅުގަނޑުމެން ހަމަ މިހާރު މި އޮތް ތާވަލާ އެއްގޮތަށް މި ކަންތައް ކުރެވޭތޯ ބަލަނީ އިނގޭތޯ؟ 

  ޓްރާންސްޕޯޓް މިނިސްޓަރު މުޙައްމަދު އަމީން - 4 މާޗް 2026  

ޓެކްސީ ލައިންގެ ހިދުމަތް ފަށާނެ 4 ވަނަ ތާރީހެއް ރައީސް ޑރ. މުހައްމަދު މުއިއްޒުގެ ސަރުކާރުން ދީފައިވާ އިރު، އެ ތާރީހުތައް ފަހަނައަޅައި ވަނީ ގޮސްފަ އެވެ. ޓެކްސީ ލައިންގެ ހިދުމަތް ފެށޭނެ ތާރީހަކާއި ގުޅޭގޮތުން ޓްރާންސްޕޯޓް މިނިސްޓްރީގެ މީޑިއާ އޮފިޝަލެއް ރާއްޖެއެމްވީ އަށް މައުލޫމާތު ދެއްވަމުން ވިދާޅުވީ ޓެކްސީ ލައިންގެ ފުރަތަމަ ބެޗް އަދި ރާއްޖެ ނާންނަ ކަމަށެވެ. އަދި ހިދުމަތް ފަށާނެ ދުވަހަކާއި، ޓެކްސީތައް އަންނާނެ ތާރީހެއް ސާފުކޮށްލަން ޖެހޭނެ ކަމަށެވެ. 

މީގެ ކުރިން  "ރައްޔިތުންނާއެކު ކުރިއަށް - ހަފުތާ 104" މިނަމުގައި ސޯޝަލް ސެންޓަރުގައި ބޭއްވި ރަސްމިއްޔާތުގައި ރައީސް ޑރ. މުހައްމަދު މުއިއްޒު ވިދާޅުވީ އެންމެ ލަސްވެގެން ފެބްރުއަރީ މަހުގެ ތެރޭގައި ހިދުމަތް ފެށޭނެ ކަމަށެވެ. ނަމަވެސް ފެބްރުއަރީ މަސް ނިމިގެން ދިޔަ އިރު ވެސް ހިދުމަތް ނުފަށަ އެވެ.

އެންމެ ފުރަތަމަ މި ހިދުމަތް ފެށުމަށް ސަރުކާރުން ދިން ތާރީހަކީ މިދިޔަ އަހަރުގެ ޖުލައި މަސް ތެރެ އެވެ. ނަމަވެސް ސަރުކާރުން ބުނި ގޮތަށް ޖުލައި މަހުގެ ފުރަތަމަ ހަފްތާގައި ވެސް ހިދުމަތް ނުފެށި މިދިޔަ އަހަރުގެ އޮގަސްޓް މަހުގެ މެދުތެރޭގައި ފަށާނެ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވި އެވެ. ނަމަވެސް މިއަދާ ހަމައަށް އައި އިރުވެސް ހިދުމަތް ފަށާފައި ނުވާ އިރު މިކަމާއި ގުޅޭ ތަފްސީލެއް ވެސް ސަރުކާރުން ނުދެ އެވެ.

މާލެ ސަރަހައްދުގައި ޓެކްސީގެ ޚިދުމަތް ދިނުމަށް ސަރުކާރުން ވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީއާ ހަވާލުކޮށްފަ އެވެ. މި މަސައްކަތް އެމްޓީސީސީއާ ހަވާލުކުރެވުނީ މިދިޔަ އަހަރުގެ ފެބްރުއަރީ މަހުގެ ތެރޭގަ އެވެ.