އެމެރިކާގެ އަސްކަރީ ބޭސް ތަކަށް އީރާން އިން ހަމަލާ ދޭތީ ކަންބޮޑުވާ މޭރުމަކުން ރައީސް މުޢިއްޒު ވާހަކަ ދައްކަވައިފި

އެމެރިކާ އާއި އިޒްރޭލް އިން އީރާންއާ ދެކޮޅަށް ކުރިއަށް ގެންދާ ހަނގުރާމައިގެ ރައްދުގައި، އެމެރިކާގެ އަސްކަރީ ބޭސް ތަކާއި، އެމްބަސީ ތަކަށް އަމާޒުކޮށް ހަމަލާ ދިނުމަކީ ކަންބޮޑުވާ ކަމެއް ކަމަށް ދޭހަވާ މޭރުމަކުން ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ވާހަކަ ދައްކަވައިފި އެވެ. 

އެމެރިކާ އާއި އިޒްރޭލް އިން އީރާންއާ ދެކޮޅަށް ހަނގުރާމަ ފެށުމާ އެކު، ރައްދުގައި އީރާން އިން ހަމަލާ ދެމުން އަންނަނީ އެމެރިކާގެ އަސްކަރީ ބޭސް ތަކުގެ އިތުރުން، އެމްބަސީ ތަކަށް އަމާޒުކޮށެވެ. އެގޮތުން މެދު އިރުމަތީގައި ހުރި އެމެރިކާގެ އަސްކަރީ ތަން ތަނަށް އަމާޒުކޮށް އީރާން އިން ހަމަލާ ދެމުން އަންނައިރު، އީރާން އިން ބުނެފައި ވަނީ ހަމަލާ އަޒާމު ކުރާނީ އެމެރިކާގެ އަމާޒު ތަކަށް ކަމަށެވެ. ނަމަވެސް، އެއްވެސް ޤައުމެއްގެ އާންމު ރައްޔިތުން ދިރި އުޅޭ ތަންތަނަށް ހަމަލާ ނުދޭނެ ކަމަށް އީރާން އިން ބުނެފައިވެ އެވެ. 

ހޯމަ ދުވަހު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް މުޢިއްޒު ވަނީ، އީރާން އިން މެދު އިރުމަތީގެ އަމާޒު ތަކަށް ދެމުން އަަންނަ ހަމަލާތައް ހުއްޓާލުމަށް ގޮވާލައްވައިފަ އެވެ. ރައީސް މުޢިއްޒު ވިދާޅުވީ އީރާން އިން އިޒްރޭލް އަށް އަމާޒުކޮށް ހަމަލާ ދިނުމަށް އެދޭ ކަމަށާއި، އެއީ އެމަނިކުފާނު ވަރަށް އެދޭ ކަމެއް ކަމަށެވެ.

ރައީސް މުޢިއްޒު ވިދާޅުވީ ހަނގުރާމައިގައި ހަމަލާ ދޭ އެއްވެސް ފަރާތަކުން ދެމުން އެ ގެންދަނީ ދީގެން ވާނެ ހަމަލާ ތަކެއް ނޫން ކަމަށެވެ. އަދި އީރާން އިން ހަމަލާ ދޭ ނަމަ، ދޭން ޖެހޭނީ ސީދާ އިޒްރޭލް އަށް ކަމަށް ރައީސް ވިދާޅުވި އެވެ. އެއާ އެކު ރައީސް ވިދާޅުވީ މުސްލިމް އަދި އަރަބި ޤައުމު ތަކަށް ހަމަލާ ދިނުމުން މަރުވާނީ މުސްލިމުން ކަމަށާއި، ހަލާކު ވާނީ މުސްލިމުންގެ ތަންތަން ކަމަށެވެ. 

އެ ހަނގުރާމައިގައި ހަމަލާ ދޭ އެއްވެސް ފަރާތަކުން އެ ދެނީ ދީގެން ވާނެ ހަމަލާއެއް ނޫން. އީރާން އިން ހަމަލާ ދެންޏާ ދޭން ޖެހޭނީ، ސީދާ އިޒްރޭލް އަށް. އެއީ އަޅުގަނޑުމެން ޤަބޫލު ކުރާ ގޮތް. އިޒްރޭލް އަށް ހަމަލާ ދޭންވީ ރެޔާއި ދުވާލު. އެހެނެއް ނޫން މުސްލިމް އަރަބި ޤައުމު ތަކަށް ހަމަލާ ދިނީމަ ހަމަ މުސްލިމުން މަރުވާނީ. 

ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު

ރައީސް މުޢިއްޒު މިހެން ވިދާޅުވެފައި ވީ ނަމަވެސް، އީރާން އިން މެދު އިރުމަތީގެ ޤައުމު ތަކަށް އަމާޒުކޮށް ސީދާ ހަަމަލާ ދީފައި ނުވެ އެވެ. އެ ޤައުމު ތަކުގައި ހުރި އެމެރިކާގެ އަސްކަރީ ބޭސް ތަކާއި، އެމްބަސީ ތަކަށް އަމާޒުކޮށް އީރާން އިން ދެމުން އަންނަ ހަމަލާތައް ހުއްޓުވަން މަސައްކަތް ކުރުމުގެ ތެރޭގައި، ބައެއް ޤައުމު ތަކުގެ ސަރަހައްދު ތަކަަށް އެ ހަމަލާތަކުގެ ބައެއް އަމާޒުވެފައިވެ އެވެ. 

ތަކުރާރުކޮށް އީރާން އިން ވަނީ މެދު އިރުމަތީގައި ހުރި އެ ޤައުމުގެ އެކުވެރިންނަށް ހަމަލާ ނުދޭނެ ކަމަށް ބުނެފަ އެވެ. ނަމަވެސް، އެ ޤައުމު ތަކުގައި އެމެރިކާގެ އަސްކަރީ ތަންތަން ހުންނައިރު، އީރާން އިން އަތް ބަނދެގެން ނޯންނާނެ ކަމަށް އެ ޤައުމުން ބުނެފައިވެ އެވެ.