ރެފަރެންޑަމްގަ ނޫނެކޭ ބުނަން ޖެހެނީ ބަސް ބުނުމުގެ މިނިވަންކަމާ ހައްގުތަކާ ބާރުތައް އަތުގަ އޮންނަން އެދޭތީ: ކުޑޫ
ސަރުކާރު ޖަވާބުދާރީ ކުރުވުމަށް ހުރި މަގުތައް ބަންދުވެފައިވާ ކަމަށް ވިދާޅުވެ، ރައްޔިތުންގެ މަޖިލީހުގެ މެންބަރު މުހައްމަދު އިބްރާހިމް (ކުޑޫ) ކަންބޮޑުވުން ފާޅުކުރައްވައިފި. ވަޒީރުންނާ ކުރާ ސުވާލުތަކަށް ޖަވާބު ނުލިބުމާއި ދައުލަތުގެ މީޑިއާއިން އިދިކޮޅު ފަރާތްތަކަށް ފުރުސަތު ނުދޭކަން ފާހަގަކުރައްވައި، އޭނާ ވިދާޅުވީ ރައްޔިތުންގެ ބާރުތައް ދެމެހެއްޓުމަށްޓަކައި އިންތިޚާބުތައް އެއްކޮށްލުމާ ދެކޮޅަށް ވޯޓު ދޭންޖެހޭ ކަމަށް. އެހެންކަމުން، މިނިވަންކަމާއި ހައްގުތައް ރައްކާތެރިކުރުމަށްޓަކައި މި ބަދަލަށް "ނޫނެކޭ" ބުނުމަށް އޭނާ ވަނީ ގޮވާލައްވާފަ.
ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) | ރާއްޖެ އެމްވީ
ރައްޔިތުންގެ މަޖިލީހުގެ އިންތިޚާބާއި ރިޔާސީ އިންތިޚާބު އެއްކޮށްލުމާ މެދު ނަގާ ފެންނަ ނުފެންނަ ވޯޓުގައި ނޫނެކޭ ބުނަން ޖެހެނީ އެއީ ރައްޔިތުންގެ މިނިވަންކަމާއި ބަސް ބުނުމުގެ މިނިވަންކަމާ ރައްޔިތުންގެ ހައްގުތަކާ ރައްޔިތުންގެ ބާރުތައް ރައްޔިތުންގެ އަތުގައި އޮންނަން އެދޭތީ ކަމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ވިދާޅުވެއްޖެ އެވެ.
ހޮނިހިރު ދުވަހުގެރޭ ރާއްޖެޓީވީން ގެނެސްދިން ނޫނެކޭ ކެމްޕޭން ޕްރޮގްރާމްގައި ވާހަކަ ދައްކަވަމުން މެންބަރު ވިދާޅުވީ މިހާރު ވެސް މި ސަރުކާރު ޖަވާބުދާރީ ކުރުވޭނެ ގޮތެއް ނެތް ކަމަށެވެ. ރައްޔިތުންގެ މަޖިލީހުގައި ތިބެ އިދިކޮޅު އެމްޑީޕީ އިން އެތައް މަސައްކަތެއް ކުރި ނަމަވެސް މި ސަރުކާރު ޖަވާބުދާރީ ކުރުވޭނެ ހުރިހާ މަގެއް އޮތީ ބަންދުވެފައި ކަމަށް ކުޑޫ ވިދާޅުވި އެވެ.
މިހާރު ވެސް ސަރުކާރު ޖަވާބުދާރީ ކުރުވާނެ ގޮތެއް ނެތް. އަޅުގަނޑުމެން ރައްޔިތުންގެ މަޖިލީހުގަ ގަވާއިދެއް އޮންނާނެ. އަޅުގަނޑުމެން ލިޔާ ސިޓީތަކަށް ޖަވާބުދެއްވަން ޖެހޭނެ. ސަރުކާރު އޮފީސްތަކުން ވެސް އަޅުގަނޑުމެން އަހާ އެއްޗިއްސަށް ހޭ ވެސް އަހާނުލާނެ. މިވަގުތު މިހާތަނަށް 60 އަށް ވުރެ ގިނަ ސުވާލު ވަޒީރުންނަށް ފޮނުވިފަ ވާނީ. ގާނޫނީ ގޮތުން ޖަވާބުދާރީ ވާންޖެހޭ މުއްދަތު ހަމަވެފަ. ހަމަ އެއްވެސް އެއްޗަކަށް ޖަވާބުދާރީ ނުވެ އެ ތިއްބަވަނީ ނޫންތޯ. އަޅުގަނޑުމެންނަށް ކިހިނެއްތޯ ސަރުކާރު ޖަވާބުދާރީ ކުރުވޭނީ. ރައްޔިތުންނާ ކޮންމެހެން ފޯރުކޮށްދޭން ޖެހޭ ޚިދުމަތްތަކުގަ ވެސް ސަރުކާރު ޖަވާބުދާރީރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ)
ކުޑޫ ވިދާޅުވީ އިދިކޮޅު ޕާޓީ އެއް އޮންނަން ޖެހޭ ކަމަށެވެ. އަދި އިދިކޮޅު ޕާޓީ ގެ ޒިންމާއެއް ވެސް އޮންނަ ކަމަށާ ނަމަވެސް މިއަދު އެމްޑީޕީ އަށް އެ ޒިންމާ އަދާކުރެވޭނެ ހުރިހާ މަގެއް މި ސަރުކާރުން އޮތީ ބަންދު ކޮށްފައި ކަމަށެވެ.
މިސާލަކަށް އިދިކޮޅުގެ އަޑު އިއްވުމަށް ދައުލަތުގެ މީޑިއާ އިން ވެސް ފުރުސަތު ނުދޭކަން ފާހަގަ ކުރައްވައި މެންބަރު ވިދާޅުވީ ދައުލަތުގެ މީޑިއާ އާ ގުޅޭ ގާނޫނެއް ވެސް އޮންނަ ކަމަށެވެ. އެއީ ހަމަހަމަ މީޑިއާ އަކަށް ވާން ޖެހޭނެ ކަަމަށް ބަޔާން ކޮށްފައިވީ ނަމަވެސް އެކަން އެގޮތަށް ނުވާ ކަމަށް ކުޑޫ ވިދާޅުވި އެވެ.
މެންބަރު ވިދާޅުވީ މި ސަރުކާރު އައި ފަހުން ދައުލަތުގެ މީޑިއާ އިން އިދިކޮޅުގެ އަޑު އިއްވާފައި ނުވާ ކަމަށެވެ. އަދި މިއަދާ ހަމައަށް ވެސް އެއްވެސް ފުރުސަތެއް ވެސް އިދިކޮޅަށް ދީފައިނުވާއިރު އެއީ އެމްޑީޕީ އިން ނާންނާތީ ކަމަށް އެ ބޭފުޅުން މިހާރު ސުވާލު ކުރިއަސް ވިދާޅުވާނެ ކަމަށް ކުޑޫ ވިދާޅުވި އެވެ. އެހެން ނަމަވެސް އެއީ ކަނޑައެޅިގެން ދޮގެއް ކަމަށާ ދައުލަތުގެ މީޑިއާ އިން އިދިކޮޅަށް ފުރުސަތު ނުވެސް ދޭނެ ކަމަށް ކުޑޫ ވިދާޅުވި އެވެ. ސަބަބަކީ އެއީ އެހެން އޮޕަރޭޓް ކުރާ ތަނަކަށް އެތަން ނުވުން ކަމަށް ކުޑޫ ވިދާޅުވި އެވެ.
އެހެންކަމުން ފެންނަ ނުފެންނަ ވޯޓުގައި ނޫނެކޭ ބުނަން ޖެހެނީ އެއީ ރައްޔިތުންގެ މިނިވަންކަމާއި ބަސް ބުނުމުގެ މިނިވަންކަމާއި ރައްޔިތުންގެ ހައްގުތަކާ ރައްޔިތުންގެ ބާރުތައް ރައްޔިތުންގެ އަތުގައި އޮންނަން އެދޭތީ ކަމަށް މެންބަރު ތަކުރާރު ކޮށް ވިދާޅުވި އެވެ.
