ރައީސް މުއިއްޒު ސަރުކާރުގެ ސިޔާސަތެއް ނެތް، ސިޔާސަތަކަށް ގެންގުޅެނީ ''ގަނޑުކަނޑާ ފޮތަކާއި ކަޅު ދަބަހެއް'' : މެންބަރު ޒިޔާދު
މެންބަރު ޒިޔާދު ވިދާޅުވީ ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމަށް ސަރުކާރުން ބޭނުންވަނީ ޚަރަދު ކުޑަކުރަން ކަމަށް ބުނި ނަމަވެސް، ސަރުކާރުގެ އަމަލުތައް ހުރި ގޮތުން އެކަން ރައްޔިތުން ގަބޫލުނުކުރާ ކަމަށް. ސަރުކާރު ހިންގާ ޕީއެންސީން ވަޒީފާގެ ނުފޫޒާއި ފައިސާ ބޭނުންކޮށްގެން ކެމްޕޭން ކުރަމުންދާ ކަމަށް ތުހުމަތު ކުރައްވައި، މެންބަރު ޒިޔާދު ވިދާޅުވީ ސަރުކާރުގެ ސިޔާސީ މަގާމުތަކާއި އެމްބަސީތަކަށް ބޮޑު ހޭދައެއް ކުރާ ކަމަށް.
ރައްޔިތުންގެ މަޖިލީހުގެ ޖަލްސާގައި ވައިކަރަދޫ ދާއިރާގެ މެމްބަރު ޙުސެއިން ޒިޔާދު ވާހަކަ ދައްކަވަނީ | ރައްޔިތުންގެ މަޖިލިސް
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުގެ ސިޔާސަތެއް ނެތް ކަމަށާއި، ސިޔާސަތަށް ގެންގުޅެނީ '' ގަނޑުކަނޑާ ފޮތަކާއި ކަޅު ދަބަހެއް '' ކަމަށް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެ އެވެ.
ރާއްޖެޓީވީގެ ނޫނެކޭ ކެމްޕޭން ޕްރޮގްރާމްގައި ވާހަކަދައްކަވަމުން މެންބަރު ޒިޔާދު ވިދާޅުވީ، ރިޔާސީ އިންތިޚާބާއި ރައްޔިތުން މަޖިލީހުގެ އިންތިޚާބު އެއްކޮށްލުމަށް ބޭނުންވާ ސަބަބުގެ ގޮތުގައި ފުރަތަމަ ދެއްކީ ހަރަދުގެ ވާހަކަ ކަމަށެވެ. ނަމަވެސް ސަރުކާރުން ކަންކަން ކުރާ ގޮތުން އެކަން ރައްޔިތުން ގަބޫލުނުކުރި ކަމަށް އޭނާ ވިދާޅުވި އެވެ.
ކޮންމެ ގޮތަކުން ވެސް ދެ އިންތިޚާބު އެއްކޮލުމަށް ނަގާ ރެފަރެންޑަމް ކާމިޔާބު ކުރަން ސަރުކާރުން ބޭނުންވާކަން ފާހަގަކުރައްވައި މެންބަރު ޒިޔާދު ވިދާޅުވީ، ސިޔާސަތެއް ރައްޔިތުންނަށް ވިއްކަން ޖެހޭ ކަމަށެވެ. ޕީއެންސީގެ ހަގީގީ ސިޔާސަތެއް ނެތް ނަމަވެސް ސިޔާސަތެއްގެ ގޮތުގައި ގެންގުޅެނީ ގަނޑުކަނޑާ ފޮތަކާއި، ކަޅު ދަބަހެއް ކަމަށެވެ.
އެގޮތުން އެރަށެއްގައި ވަޒީފާގައި ނެތީ ކިތައް މީހުންތޯ އާއި، އެ އާއިލާއަކަށް އެވަގުތަކު އެންމެ ބޭނުންވާ ކަންކަން ބަލައި، ވަޒީފާގެ ޕްރޮމޯޝަންތައް ދެމުންދާ ކަމަށް މެންބަރު ޒިޔާދު ވިދާޅުވި އެވެ.
ބަލާނީ އަބަދުވެސް ވަޒީފާ. ކިތައް ކުދިންތޯ މި ރަށުގައި އުޅެނީ ވަޒީފާ ނުލިބި، ކޮން އާއިލާއަކަށް ވަޒީފާއަށް ދީގެންތޯ އެ އާއިލާ މީހުންގެ ވޯޓު ލިބޭނީ، ކާކަށްތޯ ކޯއްޗެއް، ކޮން ގޮތެއް ހަމަޖައްސައިދީގެންތޯ މިކަން ކުރެވޭނީ؟ އެއީ ސިޔާސަތަކީ. ގެންގުޅޭނީ ހަމަ ގަނޑުކަނޑާ ފޮތަކާއި ކަޅު ދަބަހަކާ. އެއީ ސިޔާސަތަކީ. އެ ސިޔާސަތުތަކާ އެއްކޮށް ރައްޔިތުންގެ ކުރިމައްޗަށް ނުކުތީމަ މިހެން އެވަނީ. ރަށަކުން އަޑެއް ނީވޭ ޚަރަދުގެ ވާހަކައެއް. ހަރަދުގެ ވާހަކަ ކިހިނެއްތޯ ދައްކާނީ؟ އިންތިޚާބު ފަސް އަހަރު އެއް އަހަރު ބާއްވާ އިންތިޚާބެއްގައި މި ކިޔަނީ ފަންސާސް މިލިއަން ޚަރަދުވެއޭ. އެ ބޮޑޭ. މަހަކު ފަންސާސްހަތަރެއް މިލިއަން އެމްބަސީތަކަށް އެބަ ހަރަދު ކުރޭ. މަހަކު ފަންސާސްހަތަރެއް މިލިއަން. އެ ރަށެއްގެ ރައްޔިތުންނަށް އިނގޭނެތާ ނުކަތާވަރަށް އެތަނުގައި މުވައްޒަފު އެބަ ތިބިކަން. އެ ރަށުގެ ރައްޔިތުންނަށް އިނގޭތޯ އައްޔަންކުރި. މި ކައުންސިލުން އަދަދު މަދުކުރި ފަހަކުން ތިނަކަށް. މަދުކޮށްފައ 5 އައްޔަންކޮށްފައި އެބަހުރި. އޭގެ ޑަބަލް މުސާރައިން. އެކަން އެރަށުގައި އުޅޭ ރައްޔިތުންނަށް ފެންނާނެ. އަދި ބަޔަކު ޓީވީން ކޮންމެ އެއްޗެއް ކިޔަސް، މި ފެންނަން ހުރި ކަންކަން.ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު
މީގެ އިތުރުން މެންބަރު ޒިޔާދު ވިދާޅުވީ، ޕީއެންސީން ކެންޕޭން ކުރަމުންދަނީ ތަފާތު ސްޓައިލެއްގައި ކަމަށެވެ.
އެއީ މަޖުބޫރުން މުވައްޒަފުން ނެރިގެން ކަމަށާއި، އެމުވައްޒަފުންނަށް ރުފިޔާ ދީގެން ކަމަށެވެ.
އެހެންކަމުން ޕީއެންސީން ކުރިއަށް ގެންދާ ހުރިހާ ހަރަކާތްތައް ހަރަދު އިންތިހާއަށް ބޮޑުވާނެ ކަމަށް އޭނާ ވިދާޅުވި އެވެ. އަދި ވިދާޅުވީ ޕީއެންސީގެ ހަރަދު ބޮޑުވި ނަމަވެސް ދިވެހި ރައްޔިތުން އިންތިޚާބުތަކަށް ވަރަށް ހޭލުންތެރި ކަމަށާއި، މިވާނުވާ ރައްޔިތުންނަށް އެނގޭ ކަމަށެވެ.
